ކެރެލާގައި ފެން ބޮޑުވެ، މަރުވި މީހުންގެ އަދަދު 24 އަށް!
18 އޮކްޓޯބަރު 2021 | ހޯމަ 08:48މަރުވި މީހުންގެ ތެރޭގައި 5 ކުޑަކުދިން ހިމެނޭ
ކެރެލާގައި ފެން ބޮޑުވެފައި
ދެކުނު އޭޝިއާގެ ބައެއް ގައުމުތަކަށް ކުރަމުންދާ ވިއްސާރައިގައި އިންޑިއާގެ ކެރެލާގައި ފެން ބޮޑުވެ، 24 މީހަކު މަރުވެއްޖެއެވެ.
މި ވިއްސާރައިގެ އަސަރު އެންމެ ބޮޑަށް ކުރަމުންދަނީ ކެރެލާގެ ދެކުނަށާއި، މެދުތެރެއަށް ކަމަށް ރިޕޯޓުތައް ބުނެއެވެ. ވިއްސާރައިގައި ކެރެލާގެ ގިނަ ސިޓީތަކެއްގައި ފެން ބޮޑުވެފައިވާއިރު، ގިނަ އަދަދެއްގެ ބަޔަކު ގެއްލިގެން ހޯދުމުގެ މަސައްކަތް ވެސް ދަނީ ކުރަމުންނެވެ.
މިހާތަނަށް އައިއިރު 24 މީހަކު މަރުވެފައިވާކަމަށް ވަނީ ރިޕޯޓުކޮށްފައެވެ. މަރުވި މީހުންގެ ތެރޭގައި 5 ކުޑަކުއްޖަކު ވެސް ހިމެނޭކަމަށް ވަނީ ރިޕޯޓުކޮށްފައެވެ. އަދި ކުރިއަށްއޮތްތަނުގައި މި އަދަދުތައް އިތުރުވުން އެކަށީގެންވާކަމަށް ވަނީ ރިޕޯޓުކޮށްފައެވެ.
ކެރެލާގައި ފެންބޮޑުވުމުގެ ސަބަބުން އެ ސަރަހައްދުގެ ބައެއް ހިސާބުތަކުން ބިންގަނޑު ކަނޑައިގެން ދިޔުމުގެ ހާދިސާތައް ވެސް ވަނީ ހިނގާފައެވެ. އިންޑިއާގެ ރެސްކިއު ޓީމުން ބުނީ ފެންބޮޑުވުމުގެ ހާދިސާއާ ގުޅިގެން ގެއްލުނު މީހުން ހޯދުމުގެ މަސައްކަތް ކުރަމުން އަންނަ ކަމަށެވެ.
މިއީ ސީރިއަސް ހާލަތެއް ކަމަށް ކެރެލާގެ ޗީފް މިނިސްޓަރ ޕިނަރާއީ ވިޖަޔަން ވަނީ ސިފަކުރައްވާފައެވެ. އަދި އަރަބި ކަނޑުގައި އުފެދިފައިވާ ކޮޅިގަނޑެއްގެ ސަބަބުން ކެރެލާގެ އެކި ސަރަހައްދުތަކަށް ވިއްސާރަ ކުރަމުންދާނެ ކަމުގެ އިންޒާރު އިންޑިއާގެ މީޓިއޮރޮލޮޖިކަލް ޑިޕާޓްމެންޓުން ދީފައިވާކަމަށް ވެސް ޕިނަރާއީ ވިދާޅުވިއެވެ. އެހެންނަމަވެސް އެންމެ ފަހުން ބެލި ބެލުމުން މި ހާލަތު އިތުރަށް ގޯސްވެދާނެކަމަށް ދައްކާފައި ނުވާކަމަށް އޭނާ ވިދާޅުވިއެވެ.
