މި މަހު ކުޅެން ނިންމާފައިވާ ކްރިކެޓުގެ ޓީ20 ވޯލްޑް ކަޕް ކޮލިފައިންގައި ވާދަކުރާ ރާއްޖޭގެ ގައުމީ ކްރިކެޓް ޓީމުގެ ކުޅުންތެރިންނަށް ޖާޒީ ހަވާލުކޮށްފިއެވެ.

ގައުމީ ޓީމުގެ ކުޅުންތެރިންނަށް ޖާޒީ ހަވާލުކޮށްފައިވަނީ ކްރިކެޓް ބޯޑް އޮފް މޯލްޑިވްސް (ސީބީއެމް) އިން އާދީއްތަ ދުވަހުގެރޭ ބޭއްވި ރަސްމިއްޔާތެއްގައި، އެ ބޯޑުގެ ރައީސް މުޙައްމަދު ފައިސަލެވެ.

މި ފަހަރުގެ ކޮލިފައިންގައި ގައުމީ ޓީމު ވާދަކުރާއިރު، މިއީ ރާއްޖޭން 2019 ވަނަ އަހަރުގެ ސައުތު އޭޝިއަން ގޭމްސްގައި ވާދަކުރި ފަހުން ބައިނަލްއަގުވާމީ ކްރިކެޓް މެޗުތަކަކަށް ނުކުންނަ ފުރަތަމަ ފަހަރެވެ. ކޮލިފައިންގައި ރާއްޖެ ވާދަކުރަން ޖެހޭނީ ގަތަރު، ސައުދީ އަރަބިއްޔާ، ކުވައިތު އަދި ބަހްރޭނެވެ. މި ޒޯނުގެ ކޮލިފައިން މެޗުތައް ގަތަރުގެ ވެރިރަށް ދޯހާގައި ކުޅޭއިރު، މެޗުތައް ތާވަލުކޮށްފައިވަނީ މި މަހުގެ 23 ވަނަ ދުވަހުން ފެށިގެން 29 ވަނަ ދުވަހުގެ ނިޔަލަށެވެ.

ގައުމީ ޓީމުގެ ކުޅުންތެރިންނަށް ޖާޒީ ދިނުމަށް އާދީއްތަ ދުވަހުގެރޭ ބޭއްވި ރަސްމިއްޔާތުގައި ވާހަކަ ދައްކަވަމުން ކްރިކެޓް ބޯޑުގެ ރައީސް ފައިސަލް ވިދާޅުވީ މީގެ ކުރިންވެސް ކްރިކެޓް ބޯޑުން ދެމުން އަންނަ ބޯނަސްތައް ކުޅުންތެރިންނަށް އަލުން ދިނުމަށް ނިންމާފައިވާ ކަމަށެވެ. އެގޮތުން ކޮލިފައިންގައި މޮޅުވާ ކޮންމެ މެޗަކަށް 20،000 ރުފިޔާ ދިނުމަށް ނިންމާފައިވާ ކަމަށާއި، މި ބޯނަސް ދިނުމަށް ނިންމީ ކުޅުންތެރިންނަށް މޮޅުވުމަށް ލިބޭނެ އިތުރު ހިތްވަރެއްގެ ގޮތުން ކަމަށްވެސް ވިދާޅުވިއެވެ.

"ރާއްޖެ.އެމްވީ" އަށް ދިން ހާއްސަ އިންޓަވިއުއެއްގައި ގައުމީ ކްރިކެޓް ޓީމުގެ އަޙްމަދު ނީޝަމް ނާސިރު ބުނީ ވޯލްޑް ކަޕް ކޮލިފިކޭޝަނަށް ތައްޔާރުވާން މީގެ 18 މަސް ދުވަސް ކުރިން މަސައްކަތް ފަށާފައިވާ ކަމަށާއި، އެކަމަކު ކޮވިޑް-19 އާ ގުޅިގެން އެކިކަހަލަ ގޮންޖެހުންތައް ކުރިމަތިވި ކަމަށެވެ. އެކަމަކު ކޮލިފައިންއަށް ޓީމު ނުކުންނައިރު، ޓީމުގެ ރޫހު ރަނގަޅު ކަމަށް ވެސް ބުންޏެވެ.

މީގެ އިތުރުން ރާއްޖޭގެ ގައުމީ ޓީމުގެ ކެޕްޓަން މުޙައްމަދު މަހްފޫޒް ބުނީ ފަރިތަކުރުންތައް ދިޔައީ ވަރަށް ރަނގަޅަށް ކަމަށާއި، އެކަމަކު ކޮވިޑުގެ ހާލަތާ ގުޅިގެން ކޮންމެސް ވަރެއްގެ ގޮންޖެހުންތަކެއް ދިމާވި ކަމަށެވެ. ނަމަވެސް ކޮލިފައިންގައި ރަނގަޅު ނަތީޖާއެއް ނެރެވޭނެ ކަމުގެ އުއްމީދު އެބައޮތް ކަމަށްވެސް ބުންޏެވެ.

މި ފަހަރުގެ ކޮލިފައިންގައި ރާއްޖޭން ކުޅޭ ފުރަތަމަ މެޗުގައި މި މަހުގެ 23 ވަނަ ދުވަހު ނުކުންނާނީ ސައުދީ އަރަބިއްޔާއާ ދެކޮޅަށެވެ. އަދި ދެވަނަ މެޗުގައި މި މަހުގެ 24 ވަނަ ދުވަހު ގަތަރާ ދެކޮޅަށް ނުކުންނައިރު، ތިންވަނަ މެޗުގައި މި މަހުގެ 27 ވަނަ ދުވަހު ނުކުންނާނީ ބަހްރޭނާ ދެކޮޅަށެވެ. އަދި ކޮލިފައިންގެ ފަހު މެޗުގައި މި މަހުގެ 28 ވަނަ ދުވަހު ރާއްޖެ ނުކުންނާނީ ކުވައިތާ ދެކޮޅަށެވެ.