ޖަރުމަން ލީގުގައި އާދީއްތަ ދުވަހުގެރޭ ކުޅުނު މެޗުން ބަޔާ ލެވަކޫސެން ބަލިކޮށް ތާވަލުގެ އެއްވަނައަށް އެންމެ ފަހުގެ ޗެމްޕިއަން ބަޔާން މިއުނިކް ޖެހިލައިފިއެވެ.

ރަށުން ބޭރުގައި ކުޅުނު މެޗުން ބަޔާން މޮޅުވީ ފަސޭހަކަމާއެކު 5-1 ގެ ނަތީޖާއަކުންނެވެ.

މި މެޗުގައި ބަޔާނުން މޮޅު ކުޅުމެއް ދެއްކިއިރު، އެ ޓީމުން ފަސް ލަނޑުވެސް ކާމިޔާބުކޮށްފައިވަނީ ފުރަތަމަ ހާފުގައެވެ. އަދި އޭގެ ތެރެއިން ހަތަރު ލަނޑު ކާމިޔާބުކޮށްފައިވަނީ ހަތް މިނެޓުގެ ތެރޭގައެވެ.

މި މެޗުގައި ބަޔާނުން ލީޑު ނަގާފައިވަނީ މެޗު ފަށައިގެން ހަތަރުވަނަ މިނެޓުގައެވެ. ޑަޔުޓް އުޕަމެކާނޯ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ރޮބަޓް ލެވަންޑޯސްކީއެވެ. އަދި މެޗުގެ 30 ވަނަ މިނެޓުގައި އަލްފޮންސޯ ޑޭވީސްގެ އެހީއާއެކު ލެވަންޑޯސްކީ ވަނީ އިތުރު ލަނޑެއް ޖަހައި، ބަޔާނުގެ ލީޑު ފުޅާކޮށްދީފައެވެ.

އޭގެ ހަތަރު މިނެޓު ފަހުން އޭރިއާ ތެރެއިން ފޮނުވާލި ހަމަލާއަކުން ތޯމަސް މުލާ ބަޔާނުގެ ތިންވަނަ ލަނޑު ޖަހައިދިންއިރު، އޭގެ ފަހުން ބަޔާނުގެ ސާޖް ގްނަބްރީ ވަނީ ގާތް ގާތުގައި ދެ ލަނޑު ޖަހާފައެވެ. މި މެޗުގައި ލެވަކޫސެނުން ކާމިޔާބުކުރި ހަމައެކަނި ލަނޑު ދެވަނަ ހާފުގައި ކާމިޔާބުކޮށްދިނީ ޕެޓްރިކް ޝިކްއެވެ. އޭނާ މި ލަނޑު ކާމިޔާބުކޮށްފައިވަނީ ފްލޯރިއަން ވާޓްޒް ދިން ޕާހަކުންނެވެ.

މި މެޗަށް ނުކުތްއިރު ބަޔާނަށް ތާވަލުގެ އެއްވަނަ މަގާމު ގެއްލުނީ ހޮނިހިރު ދުވަހުގެރޭ ކުޅުނު މެޗުން މައިންޒް އަތުން 3-1 ގެ ނަތީޖާއަކުން ބޮރޫޝިއާ ޑޯޓްމުންޑް މޮޅުވުމުންނެވެ. އެކަމަކު ލެވަކޫސެން އަތުން ހޯދި މޮޅާއެކު ތާވަލުގެ އެއްވަނައަށް ބަޔާން އަލުން ޖެހިލިއިރު، އެ ޓީމަށް ވަނީ ކުޅުނު އަށް މެޗުން 19 ޕޮއިންޓް ލިބިފައެވެ. އަދި ދެވަނައިގައި އޮތް ޑޯޓްމުންޑަށް އަށް މެޗުން ލިބިފައިވަނީ 18 ޕޮއިންޓެވެ. މީގެ އިތުރުން ބަޔާން އަތުން ބަލިވި ލެވަކޫސެން އޮތީ ތާވަލުގެ ތިންވަނައިގައި އަށް މެޗުން 16 ޕޮއިންޓާއެކުއެވެ.