އދ. ދަނގެތީގެ ވިޔަފާރިވެރިޔާ މަހުމޫދު އަބޫބަކުރުގެ މަރުގެ މައްސަލައިގައި ހައްޔަރުކުރި ބިދޭސީގެ މީހާގެ ބަންދުގެ މުއްދަތު ޖަހައިފިއެވެ.

ރާއްޖެއެމްވީއަށް ފުލުހުން ބުނީ މަހުމޫދު މަރާލި މައްސަލައިގެ ތުހުމަތުގައި ބިދޭސީ ފިރިހެނަކު ހޮނިހިރު ދުވަހު ހައްޔަރުކޮށްފައިވާ ކަމަށެވެ. އަދި އޭނާގެ ބަންދަށް ހޮނިހިރު ދުވަހުގެ ރޭ 15 ދުވަސް ޖަހައިދީފައިވާ ކަމަށެވެ. ނަމަވެސް އިތުރު ތަފްސީލެއް ހާމަކޮށްފައެއް ނުވެއެވެ.

މައުލޫމާތު ލިބިފައިވާ ގޮތުގައި އެ ބިދޭސީ މީހާއަކީ މަހުމޫދުގެ ހަށިގަނޑު ފެނުނު ގެޔާ ޖެހިގެން ހުރި ގެއެއްގައި އުމުރުން ދުވަސްވީ މީހަކު ބަލަން ހުންނަ މީހެކެވެ.

އޮކްޓޫބަރު މަހުގެ 14 ވީ ބުރާސްފަތި ދުވަހުގެ މެންދުރުފަހުގެ ވަގުތެއްގައި 57 އަހަރުގެ މަހުމޫދު ގެއްލިގެން ހޯދަނިކޮށް ފެނުނީ ބޮލަށާއި ފަޔަށް ގޯއްޏެއް ލައްވައި، ވަޅެއްގައި އެކޮޅުކޮޅުން އެލުވާފައިވަނިކޮށެވެ. އޭނާއަށް ވަރަށް ބޮޑަށް އަނިޔާކޮށްފައިވާ ކަމުގެ ނިޝާންތައް ހަށިގަނޑުގެ ބޭރުފުށުން ފެންނަން ހުރި ކަމަށް މަންޒަރު ދުށް މީހުން ބުނެއެވެ. އަދި ވަޅުން ނެގި ވަގުތު ވަރަށް ގިނަ ލޭ ފޭބިއެވެ.

މިމަރާ ގުޅިގެން ތަހުގީގު ކުރިއަށްދާއިރު، ގިނަ އަދަދެއްގެ ފުލުހުން ދަނީ އެރަށުގައި ހަރަކާތްތެރިވަމުންނެވެ.

މަހުމޫދުގެ ހަށިގަނޑު ފެނުނު ގެއާ ކައިރި ހިސާބުގެ ގެތައް ބަލައި ފާސްކުރުމުގެ މަސައްކަތްތައް ކުރަމުންދާއިރު، މުޅި ސަރަހައްދު ވަނީ އާއްމުންނަށް ނުވަދެވޭނެ ގޮތަށް ބަންދުކޮށްފައެވެ. އަދި މަހުމޫދުގެ އަންހެނުން މުއުމިނާ އުމަރު ވަނީ ފިރިމީހާ މަރާލި މީހުން އިންސާފު ކުރިމައްޗަށް ގެނައުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙަށް ދަންނަވާފައެވެ.

މަހުމޫދުގެ މަރުގެ މައްސަލައިގައި އެރަށުގެ ރައްޔިތުން އެންމެ ފުރަތަމަ ދެމީހަކަށް ތުހުމަތު ކުރިއެވެ. އެ ދެމީހުން ވެސް ތިބީ ފުލުހުން ބަންދުގައެވެ.