އިނގިރޭސި ޕްރިމިއާ ލީގުގައި ހޮނިހިރު ދުވަހު ހަވީރު ކުޅުނު މެޗުން ފަސޭހަކަމާއެކު ވަޓްފޯޑް ބަލިކޮށް ތާވަލުގެ އެއްވަނައަށް ލިވަޕޫލް ޖެހިލައިފިއެވެ.

ރަށުން ބޭރުގައި ކުޅުނު މެޗުން ލިވަޕޫލް މޮޅުވީ 5-0 ގެ ތަފާތު ބޮޑު ނަތީޖާއަކުންނެވެ.

މި މެޗުގައި ލިވަޕޫލުގެ ފަރާތުން މޮޅު ކުޅުމެއް ފެނިގެންދިޔައިރު، މެޗުގެ ވަރަށް ކުރީކޮޅު އެ ޓީމުން ވަނީ ލީޑު ނަގާފައެވެ. މެޗު ފަށައިގެން ނުވަވަނަ މިނެޓުގައި މުހައްމަދު ސަލާހު ދިން ހިތްގައިމު ޕާހަކުން މި ލަނޑު އެ ޓީމަށް ކާމިޔާބުކޮށްދިނީ ސަޑިއޯ މާނޭއެވެ. މިއީ މާނޭ ޕްރިމިއާ ލީގުގައި ކާމިޔާބުކުރި 100 ވަނަ ލަނޑެވެ.

މާނޭގެ ލަނޑުން ލިވަޕޫލުން ލީޑު ނެގިއިރު، މެޗުގެ 37 ވަނަ މިނެޓުގައި ޖޭމްސް މިލްނާ ދިން ބޯޅައަކުން ރޮބާޓޯ ފިރްމީނޯ ވަނީ ލަނޑެއް ޖަހައި، ލިވަޕޫލަށް ލީޑު ފުޅާކޮށްދީފައެވެ. އަދި ދެވަނަ ހާފު ފަށައިގެން ހަތްވަނަ މިނެޓުގައި ލިވަޕޫލުގެ ތިންވަނަ ލަނޑުވެސް ޖަހައިދިނީ ފިރްމީނޯއެވެ.

އޭގެ ދެ މިނެޓު ފަހުން ލިވަޕޫލުގެ ހަތަރުވަނަ ލަނޑު ކާމިޔާބުކޮށްދިނީ މެޗުގައި މޮޅު ކުޅުމެއް ދެއްކި ސަލާހެވެ. އޭނާ މި ލަނޑު ކާމިޔާބުކޮށްފައިވަނީ އޭރިއާ ތެރެއިން ވަޓްފޯޑުގެ ތިން ކުޅުންތެރިއެއް ކައިރިން ނައްޓާލުމަށްފަހުއެވެ. އަދި މެޗުގެ އިތުރު ވަގުތުގައި ނިކޯ ވިލިއަމްސް ދިން ބޯޅައަކުން ފިރްމީނޯ ވަނީ ލަނޑެއް ޖަހައި، މި މެޗުގައި ހެޓްރިކް ހަދާފައެވެ.

މި މޮޅާއެކު ތާވަލުގެ އެއްވަނައަށް ލިވަޕޫލް ޖެހިލީ ކުޅުނު އަށް މެޗުން ލިބުނު 18 ޕޮއިންޓާއެކުއެވެ. ދެވަނައިގައި އޮތް ޗެލްސީއަށް ހަތް މެޗުން 16 ޕޮއިންޓް ލިބިފައިވާއިރު، ލީގުގައިހޮނިހިރު ދުވަހުގެރޭ ކުޅޭ މެޗުން ބްރެންޓްފޯޑް ބަލިކޮށް އެ ޓީމަށް އަލުން އެއްވަނައަށް އެރޭނެއެވެ.