ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް މެއި 6 ވަނަ ދުވަހު ދިން ޓެރަރިސްޓު ހަމަލާގައި ބޮންގޮއްވާލި ކަމުގެ ތުހުމަތުގައި ހައްޔަރުކޮށް ދައުވާ އުފުލާފައިވާ އަދުހަމްގެ ޝަރީއަތް ސިއްރުން ކުރިއަށް ގެންދިއުމަށް ނިންމާފައިވާއިރު، އެކަމުގެ ފަހަތުގައި ސަބަބުތަކެއްވާކަމަށް ރައީސް ނަޝީދު ވިދާޅުވެއްޖެއެވެ.

ބުދަ ދުވަހު އޮތް ނޫސްވެރިންގެ ބައްދަލުވުމެއްގައި އެކަމާ ގުޅޭގޮތުން ނޫސްވެރިއަކު ވަނީ ރައީސް ނަޝީދަށް ސުވާލު އަމާޒުކޮށްފައެވެ. އެގޮތުން ރައީސް ނަޝީދު ވިދާޅުވީ، ޝަރީއަތްތައް ސިއްރުކުރަނީ އިތުރަށް ކަންކަމާ ގުޅޭގޮތުން ފާޅުވެގެންދާ ނުކުތާތަކާއި، އޭގެ ސަބަބުން ބަޔަކަށް ގެއްލުންލިބި، ބަޔަކު ޓާގެޓުވެގެންދާނެތީ ކަމަށެވެ. އަދި ފަނޑިޔާރުންގެ ސަލާމަތަށް ވެސް ޤައުމުތަކުގައި އެކަންކޮށް އުޅޭކަން ރައީސް ނަޝީދު ފާހަގަކުރެއްވިއެވެ.

މި މައްސަލައިގައި އެންމެ ފަހުން ބޭއްވި އަޑުއެހުމުގައި ޝަރީއަތުގެ މަޖިލިސް ވަކި ހިސާބަކުން ފަނޑިޔާރުންވަނީ ސިއްރުކުރައްވާފައެވެ. އެއީ ގައުމީ ސަލާމަތާ ގުޅުން ހުރި ވާހަކަތަކެއް ޝަރީއަތުގެ މަޖިލީހުގައި ދެކެވޭތީ ކަމަށާއި، އެބައި ނިމުމުން އަލުން މަޖިލިސް ހުޅުވާލާނެ ކަމަށް ފަނޑިޔާރު އެ އަޑުއެހުމުގައި ވިދާޅުވިއެވެ.

އޭގެ އިތުރުން، އެއްވެސް މަޖުބޫރުކަމެއް ނުފޫޒެއް ނެތި ހަތަރު ދައުވާއަށް ވެސް އިއުތިރާފްވާކަމަށް، އެ ޓެރަރިސްޓު ހަމަލާގައި ބޮންގޮއްވާލި ކަމުގެ ތުހުމަތުގައި ހައްޔަރުކޮށް ދައުވާ އުފުލިފައިވާ އަދުހަމް ވަނީ ބުނެފައެވެ. މި މައްސަލައިގައި އުފުލާފައިވާ ދައުވާތައް ސާފުވެއްޖެކަން ފާހަގަކޮށް އަދުހަމް ބުނީ، އެއްވެސް މަޖުބޫރު ކަމެއް އަދި ނުފޫޒެއް ނެތި އަމިއްލަ އިޚުތިޔާރުގައި 4 ދައުވާއަށް ވެސް އިއުތިރާފުވާ ކަމަށެވެ. އަދުހަމުގެ އިއުތިރާފުގެ އެއްބަސްވުން ވެސް ދައުލަތުން މިހާރު ވަނީ ކޯޓާ ހިއްސާކޮށްފައެވެ.

މި މައްސަލައާ ގުޅިގެން އަދުހަމުގެ މައްޗަށް 4 ދައުވާއެއް ވަނީ އުފުލިފައެވެ. އެއީ ޓެރަރިޒަމްގެ އަމަލެއް ހިންގަން އުޅުނު ކަމުގެ ކުށުގެ ދައުވާ އާއި، ޓެރަރިޒަމްގެ އަމަލެއް ރޭވުމުގެ ކުށުގެ ދައުވާއާއި، ޓެރަރިސްޓު ޖަމާއަތަކަށް ތާއިދުކުރުމުގެ ކުށުގެ ދައުވާގެ އިތުރުން ނުރައްކާތެރި ހަތިޔާރެއް ބޭނުންކޮށްގެ މީހެއްގެ ފުރާނަ ނަގާލަން މަސައްކަތް ކުރުމުގެ ކުށުގެ ދައުވާއެވެ.