އިންޑިއާ-މޯލްޑިވްސް ރައުންޑްޓޭބަލް "ކަނެކްޓް ޓު ޓްރެވެލް" ބައްދަލުވުން ބާއްވައިފި

އިންޑިއާ ހައިކޮމިޝަންއިން, މިނިސްޓްރީ އޮފް ޓުއަރިޒަމްއާއި އެމްއެމްޕީއާރްސީއާ ގުޅިގެން ހޮޓެލް ޖެންގައި އިންޑިއާ-މޯލްޑިވްސް ރައުންޑްޓޭބަލް "ކަނެކްޓް ޓު ޓްރެވެލް" ބައްދަލުވުން އޮކްޓޫބަރު 12 ވަނަ ދުވަހު ބާއްވައިފިއެވެ.

އިންޑިއާގެ ޓުއަރ އެންޑް ޓްރެވެލް އެޖެންސީތަކާއި، ޓުއަރ އޮޕަރޭޓަރުންގެ އިތުރުން ޓްރެވެލް ލިޔުންތެރިން އަދި މުމްބާއީގެ އޯޓީއެމް ތަމްސީލު ކުރާ ފަރާތްތައް ހިމެނޭ ވަފުދެއް ވަނީ މި ބައްދަލުވުމުގައި ބައިވެރިވެވަޑައިގެންފައެވެ. މީގެ އިތުރުން ރާއްޖޭގެ ފަތުރުވެރިމުގެ ދާއިރާގެ އެކިއެކި ހިއްސާދާރުން ވެސް ބައިވެރިވިއެވެ. އިންޑިއާގެ ވަފްދު މި ބައްދަލުވުމަށް ފަހު އިންޑިއާ އަދި ރާއްޖޭގެ ފަތުރުވެރިކަން އިތުރަށް ގުޅުވުމަށް ރާއްޖޭގެ އެކި ރަށްރަށަށް ޒިޔާރަތް ކުރާނެއެވެ.

އިންޑިއާގެ މި ވަފްދުގެ އަމާޒަކީ ރާއްޖޭގެ ޓުއަރިޒަމްގެ، އެންމެ މަތީ ފަންތީގެ އަދި އެމްއައިސީއީ، ގެސްޓްހައުސް އަދި ފިލްމު ޕްރޮޑަކްޝަންއަށް ޚާއްސަ ކޮށްގެން އިންޑިއާއާ ފަތުރުވެރިކަމުގެ ގުޅުން ބަދަހި ކުރުމެވެ.

އޯޓީއެމްގެ އޮންލައިން ޕްލެޓްފޯމް ބީ2ބީ ޓްރެވެލް މާޓްއަކީ އިންޑިޔާގެ އެންމެ ބޮޑު އަދި އެންމެ ގިނަ ބައިނަލްއަޤްވާމީ ޓްރެވެލް އެޖެންސީތަށް އަދި ފަތުރުވެރިން ބޭނުންކުރާ މިފަދަ ޕްލެޓްފޯމް އެވެ. މި ބައްދަލުވުމަށް އަދި އިންޑިއާ ވަފްދުގެ ދަތުރުތަކުގެ ޓްރެވެލް ޕާޓްނާޒް އަކީ އިންޑިގޯ އެއަރލައިންސް، ޓީއެމްއޭ އަދި މަންތާ އެއަރއެވެ.

އިންޑިގޯ އަކީ ބަޖެޓް އެއާލައިންސް ތެރެއިން ދުނިޔޭގައި އެންމެ ބާރަށް ކުރިއަރަމުން އަންނަ އެއް އެއާލައިނެވެ. އަދި އިންޑިއާގެ 6 ސިޓީއަކުން މާލެއަށް ހަފްތާއަކު 35 ފްލައިޓް ރާއްޖެއާއި އިންޑިއާ ގުޅާލަދޭ އެންމެ ބޮޑު އެއާލައިންއެވެ.

މީގެ 3 އަހަރު ކުރިން ރާއްޖެއަށް އެންމެ ގިނައިން ފަތުރުވެރިން އަންނަ 5 ވަނަ ގައުމުގެ ގޮތުގައި އޮތް އިންޑިއާ މިއަދު ވަނީ ލިސްޓްގެ އެއްވަނައިގައެވެ. މިއަދު ރާއްޖެ އަންނަ ކޮންމެ 4 ފަތުރުވެރިއަކުން އެކަކީ އިންޑިއާގެ ފަތުރުވެރިއެކެވެ. 2021 ފުރަތަމަ 9 މަސް ތެރޭގައި 200000 އިންޑިއާގެ ފަތުރުވެރިން ރާއްޖެ ޒިޔާރަތްކުރިއެވެ. މިއީ 2019ގައި ކޮވިޑް ޕެންޑެމިކްގެ ކުރިން ރާއްޖެ ޒިޔާރަތް ކުރި އިންޑިއާގެ ފަތުރުވެރިންގެ އަދަދަށް ވުރެ ބޮޑު އަދަދެކެވެ.

ރާއްޖެއާއި އިންޑިއާ ދެމެދު ހަފްތާއަކު 60 ފްލައިޓް ދަތުރުކުރެއެވެ. އެއީ އެއަރ އިންޑިއާ، ގޯފަރސްޓް، ސްޕައިސްޖެޓް، ވިސްތާރާ، އަދި މޯލްޑިވިއަންއެވެ. މޯލްޑިވިއަންއިން އިންޑިއާގެ 7 ސިޓީއަކަށް މާލެއިން ދަތުރުކުރެއެވެ. މީގެ އިތުރުން ކައިރި މުސްތަޤްބަލެއްގައި މާފަރު އަދި މާމިގިލި އެއާޕޯޓުންވެސް މޯލްޑިވިއަން އަދި ފްލައިމީގެ ދަތުރު އިންޑިއާއަށް ކުރަން ފަށާނެއެވެ.

އިންޑިއާއާއި ދިވެހިރާއްޖޭ އެއަރބަބްލް އެއްބަސްވުން އޯގަސްޓް މަހުގައި ގާއިމްކުރެވުނު ހިސާބުން އިންޑިއާގެ ފަތުރުވެރިންގެ ސަބަބުން ރާއްޖޭގެ އިޤްތިޞާދަށް ވަރަށް ބޮޑު ކުރިއެރުން ލިބުނެވެ. ތިންވަނަ ގައުމަކަށް ދަތުރު ކުރުމަށް އިންޑިއާގެ ރައްޔިތުންގެ ޓްރާންސިޓް މަންޒިލަކަށް ރާއްޖެ ވުމުގެ ސަބަބުން ކޮވިޑް-19 ޕެންޑެމިކްގައި އެންމެ އަސަރުކުރި ގެސްޓްހައުސްތަކަށް ވެސް ވަރަށް ބޮޑު ކުރިއެރުން ލިބުނެވެ.

އިންޑިއާ މޯލްޑިވްސް ރައުންޑްޓޭބަލް އަދި އިންޑިއާ ވަފްދުގެ ދަތުރުތަކުގެ ސަބަބުން އިންޑިއާއާއި ރާއްޖޭގެ ފަތުރުވެރިކަމުގެ ގުޅުން އިތުރަށް ކުރިއަރައި ފުޅާވެގެން ދާނެއެވެ. އިންޑިއާގެ ފަތުރުވެރިންގެ އަދަދު އިތުރުވުމުން ރާއްޖޭގެ އިޤްތިޞާދު ރަނގަޅުވެ ދެގައުމު ދެމެދު އޮންނަ ގުޅުން އިތުރަށް ބަދަހިވެގެންދާނެ ކަަމަށް އިންޑިއާ ހައިކޮމިޝަނުން ބުނެއެވެ.