ކިނޮޅަހު ބަނދަރުގެ މަސައްކަތަކީ އަވަހަށް ނިންމަން ހިފާ މަސައްކަތެއް: އެމްޓީސީސީ
12 އޮކްޓޯބަރު 2021 | އަންގާރަ 02:00އެމްޓީސީސީން ވަނީ ޕްރޮޖެކްޓު ސައިޓް މޮބިލައިޒްކޮށްފައި
ރ. ކިނޮޅަސް
ރ. ކިނޮޅަހު ބަނދަރަށް ދިމާވެފައިވާ މައްސަލަ ހައްލުކުރުމަށް ޕްރޮޖެކްޓު ސައިޓް މޮބިލައިޒް ކޮށްފިއެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އިން ބުނީ ކިނޮޅަހު ބަނދަރަށް ވެލި އެޅުމުގެ މައްސަލަ ދިމާވަމުންދާތީ މިމަހުގެ 10 ވަނަ ދުވަހު އެ ކުންފުނިން އެ ރަށަށް ގޮސް ބަނދަރު ސަރަހައްދު ބަލާފައިވާކަމަށެވެ.
ބަނދަރަށް ވެލި އެރުމުގެ މައްސަލަ ހައްލުކުރުމުގެ މަސައްކަތް ކުރިއަށްގެންދާނީ އަރޖެންޓް މަސައްކަތެއްގެ ގޮތުގައި ކަމަށް އެމްޓީސީސީން ބުނެފައިވެއެވެ. އެގޮތުން މި މަސައްކަތް ފަށާނީ އެރަށަށް ވަންނަން އޮންނަ ނެރު ބެދޭނެހެން ބަނދަރު މައްޗަށް އެއްވަމުންދާ ވެލި ނެގުމުގެ މަސައްކަތުން ކަމަށް އެމްޓީސީސީން ބުނެފައިވެއެވެ.
ސޯޝަލް މީޑިއާގައި ދައުރުވަމުންދާ ފޮޓޯތަކުން ފެންނަ ގޮތުން އެރަށުގެ ފަޅުތެރެ ވަނީ ވަރަށް ބޮޑަށް ތިލަވެފައެވެ. ކިނޮޅަހުގެ ބަނދަރަށް ވެލި އެޅުމުގެ މައްސަލަ ދިމާވަމުން އަންނަތާ އެތައް އަހަރެއް ވެފައިވާ ކަމަށް އެ ރަށު ކައުންސިލުން ވަނީ ބުނެފައެވެ. ކިނޮޅަހުގެ އުތުރު ފަރާތުގައި ބަނދަރު ހަދާފައި ވަނީ 2010 ވަނަ އަހަރުއެވެ. މި ބަނދަރު ހެދީ އެ ރަށުގެ އުތުރު ފަރާތުގައި އޮންނަ ބޮޑު ދޮންވެލިގަނޑުން ބައެއް ނެގުމަށް ފަހު، ބަނދަރާއި ދޮންވެލިގަނޑު ވަކިކުރުމަށްޓަކައި, އެ ދެމެދުގައި އިންފާރެއްގެ ގޮތުގައި ހިލަ ޖެހުމަށް ފަހުގައެވެ. އެކަމަކު އޭގެ އަހަރެއްހާ ދުވަސް ފަހުން އެ އިންފާރު ހަލާކުވެ، ފަޅަށް ވެލި ވަންނަން ފެށިކަމަށް ކައުންސިލުން ބުނެއެވެ. އަދި 2012 ވަނަ އަހަރު ފެށިގެން މި މައްސަލަ ހައްލުކޮށްދޭން އެ ރަށުގެ ކައުންސިލުން ސަރުކާރުގައި އެދެމުން ގެންގޮސްފައިވެއެވެ.
