އެމްޓީސީސީން މިއަހަރުގެ "ހިނިތުންވުމާއެކު" ކެމްޕޭން އިފްތިތާހުކޮށްފި
މި ކެމްޕެއިންގެ ސަބަބުން އެމްޓީސީސީ ކަސްޓަމަރުންނާ ދެމެދު އޮންނަ ގުޅުން އިތުރަށް ބަދަހިވާނެ
ހިނިތުންވުމާއެކު ކެންޕޭން އިފްތިތާހް ކުރި ރަސްމިއްޔާތުގެ ތެރެއިން،
އެމްޓީސީސީން މިއަހަރުގެ "ހިނިތުންވުމާއެކު" ކެމްޕޭން އިފްތިތާހުކޮށްފިއެވެ.
އެމްޓީސީސީން ބުނީ މި އަހަރުގެ އޮކްޓޯބަރު މަހުގެ 4ން 8ށް ފާހަގަކުރުމަށް ހަމަޖެހިފައިވާ "ދުނިޔޭގެ ކަސްޓަމަރ ސަރވިސް" ހަފުތާއާ ގުޅުވައިގެން އެމްޓީސީސީއިން މިއަހަރުގެ ހިނިތުންވުމާއެކު ކެމްޕޭން އިފްތިތާހުކޮށްފައިވާ ކަމަށެވެ.
މި ކެމްޕެއިންގެ އެންމެ ބޮޑު މަޤުޞަދަކީ ކުންފުނީގެ މުވައްޒަފުންގެ މެދުގައި ކަސްޓަމަރ ސާރވިސްގެ މުހިއްމުކަމާ މެދު ހޭލުންތެރިކަން އިތުރުކުރުމާއި ކުންފުނިން ޚިދުމަތް ލިބިގަންނަ އެންމެހާ ކަސްޓަމަރުންގެ ކަސްޓަމަރ އެކްސްޕީރިއެންސް މިހާރަށްވުރެ ރަނގަޅު ކުރުމެވެ. އަދި ކުންފުނީގެ އުންމީދަކީ ހިނިތުންވުމާއެކު މި ކެމްޕެއިންގެ ސަބަބުން އެމްޓީސީސީން ކަސްޓަމަރުންނާ ދެމެދު އޮންނަ ގުޅުން އިތުރަށް ބަދަހިވެ ކަސްޓަމަރުން ކުންފުންޏަށް ކުރާ އިތުބާރު ބޮޑުވެގެން ދިއުން ކަމަށް އެމްޓީސީސީން ބުނެއެވެ.
ހޯމަ ދުވަހު އެމްޓީސީސީގައި ބޭއްވުނު މި ރަސްމިއްޔާތު އިފްތިތާހްކޮށްދެއްވީ ކުންފުނީގެ ޗީފް އޮޕަރޭޓިންގ އޮފިސަރ ޝާހިދު ހުސައިން މޫސާއެވެ.
މި ރަސްމިއްޔާތުގައި ވާހަކަދައްކަވަމުން ޝާހިދު ވިދާޅުވީ އެމްޓީސީސީއަކީ މިގައުމުގެ ތަފާތު އެކި ސިނާޢަތްތަކުގައި ގިނަ ރައްޔިތުންތަކަކަށް ސީދާގޮތުން ޚިދުމަތް ދެމުންދާ ކުންފުންޏެއް ކަމަށާއި ކަސްޓަމަރުން ހިތްހަމަޖެހޭ ފަދަ ޚިދުމަތެއް ދިނުމަށް ކުންފުނީގެ ކޮންމެ މުވައްޒަފަކު ވެސް ގަދައަޅާ މަސައްކަތް ކުރަންވާނެ ކަމަށެވެ. މި ކެމްޕެއިން ކާމިޔާބުކަމާއެކު ކުރިއަށްގެން ދިއުމަށް ހުރިހާ މުވައްޒަފުންގެ ތަރުހީބާއި އެއްބާރުލުން ވަރަށް މުހިންމު ކަމަށާއި ހުރިހާ މުވައްޒަފުންގެ އެއްބާރުލުން މި ކެމްޕެއިނަށް ލިބޭނެކަމުގެ ފުރިހަމަ ޔަގީންކަން އޮތްކަމަށް ޝާހިދު ވިދާޅުވިއެވެ.
ހިނިތުންވުމާއެކު ކެމްޕެއިން ފެށުމުގެ ގޮތުން 10 އޮކްޓޯބަރ 2021 އިން ފެށިގެން 28 އޮކްޓޯބަރ 2021 އާ ހަމައަށް ބަހާލެވިގެން ކުންފުނީގެ ކަސްޓަމަރުންނަށް ވަރަށް ޚާއްސަ އެތައް ހަރަކާތްތަކެއް ކުރިޔަށް ގެންދިއުމަށް ވަނީ ހަމަޖެހިފައެވެ.
