ވެމްކޯއިން ކުނި ބަލައި ނާންނަ ނަމަ ހޮޓްލައިން ނަންބަރަށް މައުލޫމާތު ވައިބަރ ކޮށްލާ
އައިޑީކާޑު ނަންބަރާއި ވެމްކޯގެ އެކައުންޓް ނަންބަރާއި ގޭގެ އެޑްރެސް ވައިބަރ ކުރުމަށް ވަނީ އެދިފައި
ވެމްކޯ އިން ކުނި ނަގަނީ
ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ކުނި ނުނެގި ހުންނަ ގެތަކުގެ މައުލޫމާތު ހިއްސާކުރުމަށް އެދި ކަސްޓަމަރުންނަށް ޚާއްސަ ހޮޓްލައިނެއް ގާއިމުކޮށްފިއެވެ.
ވެމްކޯ އިން ބުނީ ޚިދުމަތަށް ރަޖިސްޓްރީވެފައިވާ ކަސްޓަމަރުންގެ ގެތަކުން ކުނި ނުނެގި ހުންނަ ނަމަ ވެމްކޯގެ ހޮޓްލައިން ނަންބަރު 7998047ށް މައުލޫމާތު ވައިބަރ ކުރުމަށް އެދޭ ކަމަށެވެ. އަދި އައިޑީކާޑު ނަންބަރާއި ވެމްކޯގެ އެކައުންޓް ނަންބަރާއި ގޭގެ އެޑްރެސް ހިއްސާކުުރުމުން ވެމްކޯ އިން އަވަހަށް ޖަވާބު ލިބިގެންދާނެ ކަމަށެވެ.
ވެމްކޯ އިން މި ޚިދުމަތް ތައާރަފުކޮށްފައިމިވަނީ ކުނި ބަލައި ނުގޮސްގެން ބައެއް ކަސްޓަމަރުން އެ މައުލޫމާތުތައް ސޯޝަލް މީޑިއާގައި ހިއްސާކޮށްފައިވާ ދަނޑިވަޅެއްގައެވެ. ވެމްކޯ އިން ބުނީ މި ޚިދުމަތުގެ ސަބަބުން ކަސްޓަމަރުންނަށް ޚިދުމަތް ފޯރުކޮށްދީ ކަންތައްތައް ކައިރިން މޮނީޓަރ ކުރަން އިތުރަށް ފަސޭހަވެގެންދާނެ ކަމަށެވެ.
ވެމްކޯ އިން މިހެން ބުނެފައިވާއިރު ވެމްކޯގެ ޚިދުމަތް ހޯދުމަށް ރަޖިސްޓްރީކުރުމަށް އެންމެ ފަހުން ހުޅުވާލި ފުރުސަތުގައި މިހާތަނަށް ރަޖިސްޓްރީކޮށްފައިވަނީ އެންމެ 2،000 މީހުން ކަމަށް ވެސް އެކުންފުނިން ވަނީ ބުނެފައެވެ. ވެމްކޯގެ މާކެޓިން އެންޑް ޕަބްލިކް ރިލޭޝަންސް އޮފިސަރ އަޙުމަދު ޢާޒިމް ވިދާޅުވީ މާލެ އަދި ވިލިމާލޭގައި އެކަނިވެސް 45،000 އަށްވުރެ ގިނަ ގޭބީސީ އެބަހުރި ކަމަށް ރެކޯޑުތަކުން ދައްކާ ކަމަށެވެ. އެއީ ހުޅުމާލޭގެ ގޭބީސީތައް ނުލައި ކަމަށް އޭނާ ވިދާޅުވިއެވެ.
ޢާޒިމް ވިދާޅުވީ ވެމްކޯއިން މާލެ ސަރަހައްދުން ކުނި ނެގުމުގެ ޚިދުމަތް ދޭ ގޮތަށް މިހާރު ބަދަލުތަކެއް ގެނެސްފައިވާކަމަށެވެ. ސެޕްޓެމްބަރު 7 ވަނަ ދުވަހުން ފެށިގެން ގޭގެއަށް ގޮސްގެން ކުނި ނެގުމަށް ވެމްކޯއިން ނިންމި ނިންމުމާ ގުޅިގެން ވެމްކޯގެ ޚިދުމަތަށް ރަޖިސްޓްރީ ނުކުރާ ގޭބީސީތަކަށް ރަޖިސްޓްރީކުރުމަށް 2 ހަފުތާގެ މުއްދަތެއް ދީފައިވާކަން އޭނާ ފާހަގަކުރެއްވިއެވެ. އެއީ އޮކްޓޯބަރު 1އާ ހަމައަށް ކަމަށާއި، އެ މުއްދަތުގައި މަގުމަތީގައި ހުރި ކުނިވެސް ނަގާފައިވާކަމަށް ވިދާޅުވިއެވެ.
ޢާޒިމް ވިދާޅުވީ އޭރު ވެމްކޯގެ ޚިދުމަތަށް ރަޖިސްޓްރީކޮށްފައިވަނީ އެންމެ 9،000 ގޭބީސީން ކަމަށެވެ. 20 އިންސައްތަ ވެސް ޚިދުމަތާ ގުޅިފައިނުވާތީ ޚިދުމަތާ ގުޅުމަށް އިތުރުކޮށްދިން މުއްދަތުގައި ވެމްކޯގެ ޚިދުމަތް ހޯދުމަށް އެދި އަލަށް ރަޖިސްޓްރީކޮށްފައިވަނީ އެންމެ 2،000 ގޭބީސީން ކަމަށް ޢާޒިމް ވިދާޅުވިއެވެ. އަދި މިހާތަނަށް ވެމްކޯގެ ޚިދުމަތާ ގުޅިފައިވަނީ އެންމެ 12،000 ގޭބީސީން ކަމަށެވެ.
ވެމްކޯއިން މިހާރު ކުނި ނަގަމުންދަނީ ހަމައެކަނި ރަޖިސްޓްރީކޮށްފައިވާ ގޭގެއިންނެވެ. މަގުމަތީގައި ބަހައްޓާފައި ހުންނަ ކުނި ނެގުމުގެ މަސައްކަތް މިހާރު ވެމްކޯއިންނެއް ނުކުރެއެވެ. ވެމްކޯއިން މަގުމަތިން ކުނި ނެގުމުގެ ޚިދުމަތް ދިނީ ކޮވިޑް-19ގެ ހާލަތާ ގުޅިގެންނެވެ. އެއީ އެ ދުވަސްވަރު ގޭގެއަށް ގޮސް ކުނި ނެގުމަކީ ރައްކާތެރި ކަމެއް ކަމުގައި ނުވާތީއެވެ.
