އޮކްޓޯބަރ މަހުގެ 15 ވަނަ ދުވަހު ފަތުރުވެރިންނަށް އިންޑިއާ ހުޅުވާލަނީ
7 އޮކްޓޯބަރު 2021 | ބުރާސްފަތި 14:422020 ވަނަ އަހަރުގެ މާޗް މަހު އިންޑިޔާއިން ވަނީ އެހެން ގައުމުތަކުން އެގައުމަށް އެތެރެވާ މީހުންނަށް ވިސާ ދޫކުރުން މެދުކަނޑާލާފައި
ނިއުދިއްލީގައި ހުންނަ އިންދިރާގާނދީ އިންޓަރނޭޝަނަލް އެއަރޕޯޓް
ކޮވިޑް-19ގެ ސަބަބުން ބަންދުކޮށްފައިވާ އިންޑިޔާ އޮކްޓޯބަރ މަހުގެ 15 ވަނަ ދުވަހު ފަތުރުވެރިންނަށް ހުޅުވާލުމަށް ހަމަޖެހިފައިވާކަމަށް އިންޑިޔާ ސަރުކާރުން ބުނެފިއެވެ.
އެކަމާގުޅިގެން އިންޑިޔާގެ ހޯމް މިނިސްޓްރީން ނެރެފައިވާ ބަޔާނެއްގައި ބުނެފައިވަނީ އެކި ކަންކަމަށް ބެލުމަށްފަހު ޗާރޓަރ ފްލައިޓްތަކުގައި އަންނަ ފަރާތްތަކަށް ޓުއަރިސްޓް ވިސާ ދޫކުރުމަށް ހަމަޖެހިފައިވާކަމަށެވެ. އެގޮތުން އޮކްޓޯބަރ މަހުގެ 15 ވަނަ ދުވަހުން ފެށިގެން ޗާރޓަރ ފްލައިޓްގައި އަންނަ ފަރާތްތަކަށް އެފުރުސަތު ހުޅުވިގެންދާނެކަމަށް ވަނީ ބުނެފައެވެ. ޗާރޓަރ ފްލައިޓް ނޫން ފްލައިޓްތަކުގައި އިންޑިޔާއަށް އަންނަންބޭނުންވާ ފަތުރުވެރިންނަށް އެގައުމަށް އެތެރެވެވޭނީ ނޮވެމްބަރ މަހުގެ 15 ވަނަ ދުވަހުން ފެށިގެން ކަމަށްވެސް ހޯމް މިނިސްޓްރީގެ ބަޔާނުގައި ބުނެފައިވެއެވެ.
2020 ވަނަ އަހަރުގެ މާޗް މަހު އިންޑިޔާއިން ވަނީ އެހެން ގައުމުތަކުން އެގައުމަށް އެތެރެވާ މީހުންނަށް ވިސާ ދޫކުރުން މެދުކަނޑާލާފައެވެ. ނަމަވެސް ބައެއް ކެޓަގަރީތަކަށް ނިސްބަތްވާ މީހުންނާއި ޑިޕްލޮމެޓުންނާއި ވިޔަފާރިވެރިންނަށް އޭގެފަހުން އެގައުމަށް އެތެރެވުމުގެ ހުއްދަ ވަނީ ދީފައެވެ.
މިއަހަރުގެ ކުރީކޮޅު އިންޑިޔާއަށް ވަނީ ކޮވިޑްގެ ނުރައްކާތެރި ރާޅެއް އަރާފައެވެ. އޭރު ބައެއް ދުވަސްވަހު ދުވާލެއްގެ މައްޗަށް ހަތަރު ލައްކަ މީހުންނަށް ކޮވިޑްޖެހި, ސާޅީސް ހާސް މީހުން މަރުވެފައިވެސްވެއެވެ.
ނަމަވެސް މިހާރު ކޮވިޑްގެ ހާލަތު ވަނީ އާންމު ހާލަތަށް ރުޖޫއަވެފައެވެ.
