ކުޅިވަރުގެ ދާއިރާއިން ޝަރަފުވެރިކަމުގެ ގައުމީ އިނާމު ކުރީގެ މަޝްހޫރު ރެފުރީ މައްލާ ޅަތުއްތުއަށް ލިބިވަޑައިގެންފިއެވެ.
ބުދަ ދުވަހުގެރޭ ގައުމީ ދުވަސް ފާހަގަކުރުމުގެ ގޮތުން ބޭއްވުނު ރަސްމީ ޖަލްސާގައި މި އިނާމު މައްލާއަށް ހަވާލުކޮށްދެއްވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙެވެ.
މައްލާ ފާހަގަކުރެވިފައިވަނީ ރާއްޖޭގައި އުފެދުނު އެންމެ މޮޅު ފުޓްބޯޅަ ރެފުރީންގެ ތެރޭގައެވެ. އެގޮތުން މައްލާ ވަނީ 1969 ވަނަ އަހަރުން ފެށިގެން 1995 ވަނަ އަހަރާ ހަމައަށް ރާއްޖޭގެ ހުރިހާ ޑިވިޝަނުގެ ރެފުރީކަން ކުރައްވާފައެވެ. އެކަމުގެ އަގުވަޒަންކުރެއްވުމުގެ ގޮތުން މީގެ ކުރިން 1990 ވަނަ އަހަރު އާންމު ޚިދުމަތުގެ ހިތްވަރުދިނުމުގެ އިނާމުވެސް މައްލާ ހާސިލުކުރެއްވިއެވެ.
މި ރަސްމިއްޔާތުގައި ކުޅިވަރުގެ ދާއިރާން ހިތްވަރުދިނުމުގެ ގައުމީ އިނާމު ތިން ބޭފުޅަކު ވަނީ ހޯދާފައެވެ.
1. އިބްރާހީމް މުޙައްމަދު
ކުޅިވަރުގެ ދާއިރާއިން ކުޅިވަރު ހިންގުމާއި، ކުޅިވަރަށް ޚިދުމަތްކުރުމުގެ ރޮނގުން އިބްރާހީމް މުޙައްމަދު ގައުމީ އިނާމު ހާސިލްކުރެއްވިއިރު، އޭނާ ފާހަގަވަގެންދަނީ ވޭތުވެދިޔަ 28 އަހަރު ދުވަހުގެ ތެރޭގައި ރާއްޖޭގައި ބާސްކެޓްބޯޅަ ކުރިއަރުވުމަށާއި، ބާސްކެޓްބޯޅައަށް ގިނަ ޚިދުމަތްތަކެއް ކުރެއްވި ބޭފުޅެއްގެ ގޮތުގައެވެ.
2. ފާޠިމަތު ސާލިޔާ
ސާލިޔާ ފާހަގަވެގެން ގޮސްފައިވަނީ އަންހެން ފުޓްބޯޅަ ކުރިއެރުވުމަށް ގިނަ މަސައްކަތްތަކެއް ކުރެއްވި ފަރާތެއްގެ ގޮތުގައެވެ. މީގެ އިތުރުން ފާއިތުވެދިޔަ 13 އަހަރު ދުވަހުގެ ތެރޭގައި ގައުމީ ޓީމަށާއި މާލޭގެ ކުލަބުތަކުގެ އިތުރުން އަތޮޅު ތެރޭގެ ގިނަ ކުލަބުތަކަށް ސާލިޔާ ކުޅެފައިވެއެވެ.
3. ޢަލީ ރަޝީދު
ޓޭބަލް ޓެނިސް އެސޯސިއޭޝަނުގެ ރައީސް ޢަލީ ރަޝީދު ފާހަގަކުރެވިގެން އަންނަނީ ވަރަށް ހަގު އުމުރުގައި ޓީޓީ ކުޅެން ފަށައި، ގައުމީ ފެންވަރުގައި މެދު ނުކެނޑި 20 އަހަރު ޓީޓީ ކުޅެއްވި ފަރާތެއްގެ ގޮތުގައެވެ. މީގެ އިތުރުން ޢަލީ ރަޝީދު އަންނަނީ ޓޭބަލް ޓެނިސް އެސޯސިއޭޝަނުގެ ރައީސްގެ ހައިސިއްޔަތުން ރާއްޖޭގެ ޓީޓީއަށް ގިނަ ޚިދުމަތްތަކެއް ކުރައްވަމުންނެވެ.
