އަޒަރުބައިޖާނާއި އީރާންގެ ބޯޑަރުގައި އީރާނުން އަސްކަރީ ފަރިތަކުރުންތަކެއް
2 އޮކްޓޯބަރު 2021 | ހޮނިހިރު 11:24ފަރިތަކުރުންތަކަކީ ސަރަހައްދީ ބިރުވެރި ކަމަކަށް ވެގެންހިނގައިދާނެ : އަޒަރްބައިޖާން
އަޒަރްބައިޖާނާއި އީރާންގެ ބޯޑަރު
އަޒަރުބައިޖާނާއި އީރާން ގުޅިފައި އޮންނަ ބޯޑަރު ސަރަހައްދުގައި އީރާނުގެ އަސްކަރީ ފަރިތަކުރުންތަކެއް ފަށައިގެން ކުރިޔަށް ގެންދާތީ އެކަމަކީ ސަރަހައްދީ ބިރުވެރި ކަމަކަށް ވެގެން ހިނގައިދާނެ ކަމަށް އަޒަރުބައިޖާނުން ބުނެ އެވެ.
އަސްކަރީ ފަރިތަކުރުންތައް އާއްމުގޮތެއްގައި އީރާނުން އެގައުމުގެ އިމުގެތެރޭގައި ބޭއްވިނަމަވެސް، މިނިވަން ގައުމުތަކެއްގެ ބޯޑަރާ ގުޅޭ ހިސާބުގައި މިފަދަ ފަރިތަކުރުންތަކެއް ބޭއްވުމަކީ އެހެން މާނައެއް ނެގިދާނެ ކަމެއް ކަމަށާއި، ސޮވިއެޓް ޔުނިއަން އުވާލެނުފަހުން މިގޮތަށް އިމުން ބޭރުގައި އީރާނުން މިފަދަ ތަމްރީންތަކެއް ބާއްވާ ފުރަތަމަ ފަހަރުކަމުގައި މަސްރަޙު ދިރާސާކުރާ ފަރާތްތަކުން ވަނީ ބުނެފައެވެ.
އެގައުމުގެ އަސްކަރީ ޑިޕާޓްމަންޓުން ބުނެފައިވަނީ، މި ތަމްރީނުތަކުގައި އީރާނުން ބަރުހަތިޔާރާއި، އިލެކްޓްރޯނިކް ހަތިޔާރާއި، ޑްރޯން އަދި ގައިޑެޑް އުޅަނދު ބޭނުންކުރާނެ ކަމަށެވެ. އަދި އެސަރަހައްދުގައި އަސްކަރީ ފަރިތަކުރުންތައް ބާއްވަނީ އަޒަރުބައިޖާނަށް އަދި އަރުމޭނިއާއަށް ބިރު ދެއްކުމަކަށް ނޫންކަމަށާއި، އަޒަރުބައިޖާނާއި އަރުމޭނިއާ، ކަރަބާޚް މައްސަލާގައި ކުރި ހަނގުރާމައިގައި އައިސިސް ޖަމާއަތުން އީރާނަށް ވަދެގަތުމަށް އީރާންގެ އެސަރަހައްދު ބޭނުންކުރި ކަމަށެވެ. އަދި އީރާނުން ސަމާލުނުވިނަމަ އައިސިސް ގުރޫޕްތައް މިހާރު އުޅޭނީ އީރާން ތެރޭގައި ކަމަށްވެސް އެގައުމުގެ އަސްކަރީ ޑިޕާޓްމަންޓުންވަނީ ބުނެފައެވެ.
އަޒަރުބައިޖާންގެ ރައީސް އިލްހާމް އަލިޔޭވް ކުރިން ވިދާޅުވި ގޮތުން އީރާންގެ އަސްކަރީ އުޅަނދުތައް އަޒަރުބައިޖާނަށް ވަދެފައިވާކަމަށާއި އެ އުޅަނދުތަކުގެ ފިޔަވަޅުތައް އެސަރަހައްދުގައި ފެންނަން ހުރި ކަމަށެވެ. އަދި އެބޭފުޅާ ވިދާޅުވި ގޮތުން އީރާންގެ އެ އަމަލުތައް އަޒަރުބައިޖާނުން ބަލައެއް ނުގަންނާނެ ކަމަށާއި އެއީ އީރާނުން އެގައުމަށް އިޙްތިރާމް ނުކުރުން ކަމަށެވެ. އަދި އެބޭފުޅާ ވިދާޅުވީ ސުލްހަވެރިކަމުގައި ތިބެން ބޭނުން ނަމަ އެއްބަޔަކު އަނެއް ބަޔަކަށް އިޙްތިރާމް ކުރަން ވާނެ ކަމަށެވެ.
