ޔޫވީ އަތުން އީގަލްސްއަށް ފަސޭހަ މޮޅެއް

ޔުނައިޓެޑް ވިކްޓްރީ އަތުން ހަނި މޮޅެއް ހޯދައި އީގްލްސް އިން އެސްޓީއޯ މާލެ ލީގުގެ ދެވަނަ ބުރުގެ ފެށުން ރަނގަޅު ކޮށްފިއެވެ.

ލީގުގެ ދެވަނަ ބުރުގައި މިދެޓީމް ކުޅުނު ފުރަތަމަ މެޗް އީގަލްސްއިން ކާމިޔާބުކުރީ 1-0 ގެ ނަތީޖާއަކުންނެވެ. އާދިއްތަ ދުވަހުގެ ރޭ ކުޅެން އޮތް މެޗް ވިއްސާރަ ވުމުގެ ސަބަބުން، ކުޅެފައިވަނީ ހޯމަ ދުވަހުގެ ރޭގައެވެ.

މެޗު ފެށިގެން ދެޓީމުގެ ފަރާތުންވެސް ފެނިގެން ގޮސްފައިވަނީ ވަރަށް ހަމަހަމަ ކުޅުމެކެވެ. އެގޮތުން ދެޓީމަށްވެސް ވަނީ ލަނޑެއް ކާމިޔާބުކުރުމަށް ފުރުސަތުތަކެއް ލިބި ބޭކާރުވެފައެވެ. މެޗުގެ ފުރަތަމަ ހާފު ނިމުނު އިރުގައިވެސް ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބުކުރެވިފައެއް ނުވެއެވެ. ނަމަވެސް ދެވަނަ ހާފުގައި އީގަލްސްގެ ފަރާތުން ވަނީ ރަނގަޅު ކުޅުމެއް ފެނިގެން ގޮސްފައެވެ. އެގޮތުން މެޗުގެ 66 ވަނަ މިނެޓުގައި އެޓީމުން ވަނީ މެޗުގައި ފެނިގެންދިޔަ ހަމައެކަނި ލަނޑު ކާމިޔާބުކޮށް ލީޑު ނަގާފައެވެ. މި ލަނޑު އެޓީމަށް ކާމިޔާބު ކޮށްދީފައިވަނީ އަހުމަދު ނައުފަލް އެވެ.

މި ލަނޑަށް ފަހުގައި މުޅި މެޗު ކަހަލަ ގޮތަކަށް ކޮންޓްރޯލުގެ ދަށަށް ގެނެސްގެން ކުޅެމުން ދިޔައީ އީގަލްސް އިންނެވެ. އެޓީމުން ވަނީ ގިނަ ވަގުތު ޔޫވީގެ ހާފުގައި ބޯޅަ ހިފަހައްޓައިގެން ކުޅެ އެޓޭކް ކުރެވޭތޯ މަސައްކަތް ކޮށްފައެވެ. އެގޮތުން އެޓީމުގެ އަހުމަދު ރިޒްވާން ރިޒޭގެ ކުޅުން ފާހަގަ ކޮށްލެވެއެވެ.

މެޗުން މޮޅުވެ، އީގަލްސްއިން ވަނީ ތާވަލުގެ 5 ވަނަ ޖާގަ އަލުން ހޯދާފައެވެ. ދެވަނަ ބުރު ފެށުނު އިރު 5 ވަނާގައި އީގަލްސްއިން އޮތް ނަމަވެސް ހޯމަ ދުވަހު ހަވީރު ކުޅުނު މެޗުން މާޒިޔާ ބަލިކޮށް ވިކްޓްރީއިން ވަނީ 5 ވަނައަށް އަރާފައެވެ. ނަމަވެސް އަލުން އީގަލްސްއިން 5 ވަނަ މަގާމު ހޯދީ 13 ޕޮއިންޓާއި އެކުގައެވެ.

ތާވަލުގެ 1 ވަނާގައި މިވަގުތު އޮތީ ހޯމަ ދުވަހު ލީގުގެ ފުރަތަމަ ބައްޔާއު ކުރިމަތިލާން ޖެހުނު މާޒިޔާއެވެ. އެޓީމަށް ކުޅުނު 8 މެޗުން ލިބިފައިވަނީ 21 ޕޮއިންޓެވެ. ދެވަނަނާގައި އޮތް ނިއުރޭޑިއަންޓަށް ކުޅުނު 8 މެޗުން ލިބިފައިވަނީ 18 ޕޮއިންޓެވެ. 3 ވަނާގައި ކުޅުނު 8 މެޗުން 14 ޕޮއިންޓާއިއެކު ގްރިން ސްޓްރީޓް އޮތްއިރު 4 ވަނަ މަގާމުގައި އޮތީ 11 ޕޮއިންޓާއިއެކު ޓީސީ އެވެ. ޓިސީއިންވެސް ވަނީ ލީގުގައި މިހާތަނަށް 8 މެޗު ކުޅެފައެވެ. ތީސީ އާއި 5 ވަނާގައި އޮތް ވިކްޓްރީ އާއި ޕޮއިންޓުގެ ގޮތުން ހަމަވީ ނަމަވެސް ޓީސީއަށް ކުރި ލިބެނީ ގޯލުގެ ތަފާތުންނެވެ.