ކޮވިޑް-19ގެ ވެކްސިންގެ ދެ ޑޯޒް ފުރިހަމަކޮށްފައި ތިބި ނަމަވެސް އިންޑިޔާއަށް އެތެރެވާ އިނގިރޭސިވިލާތުގެ ރައްޔިތުން 10 ދުވަހުގެ ކަރަންޓީނުގެ މުއްދަތެއް ފުރިހަމަކުރަންޖެހޭ ގޮތަށް އިންޑިޔާއަށް ހަމަޖައްސައިފިއެވެ.

ހޯމަ ދުވަހުން ފެށިގެން މި ގަވާއިދަށް އަމަލުކުރަން ފަށާނެއެވެ. އެއާއެކު އިންޑިޔާއަށް އެތެރެވާ އިނގިރޭސިވިލާތުގެ ކޮންމެ ރައްޔިތަކުވެސް 10 ދުވަހުގެ މުއްދަތުގެ ކަރަންޓީނު ފުރިހަމަކުރަންޖެހޭނެއެވެ.

ގަވާއިދަށް މިގެނައި ބަދަލާ ގުޅޭގޮތުން އިންޑިޔާ ސަރުކާރުން ބުނެފައިވަނީ ބަދަލު ގެނެސްފައިވަނީ ދެ ގައުމުގެ ދެމެދުގައިވާ ގުޅުމުގެތެރެއިން ލިބިދޭ ޚާއްސަ ކަންތައްތައްތަކެއްގެ ދަށުންކަމަށެވެ.

އިންޑިޔާގައި އުފައްދަމުން އަންނަ އެސްޓްރަޒެނިކާ ވެކްސިން ނުވަތަ ކޮވިޝީލްޑް ވެކްސިން ޖަހާފައިވާ މީހުންނަށް އިނގިރޭސިވިލާތަށް އެތެރެވުމުގައި އެގައުމުން ގެންގުޅޭ ސިޔާސަތާއެކު އިންޑިޔާ އާއި އިނގިރޭސިވިލާތުގެ ގުޅުމަށް ވަނީ އެކަމުގެ ހިޔަނިއެޅިފައެވެ. ކޮވިޝީލްޑް ވެކްސިންގެ ދެ ޑޯޒް ފުރިހަމަކޮށްފައިވީ ނަމަވެސް އިނގިރޭސިވިލާތަށް އެތެރެވާ އިންޑިޔާގެ ރައްޔިތުންވެސް ކަރަންޓީނުވާންޖެހެއެވެ.

އެހެންނަމަވެސް ކޮވިޝީލްޑް ވެކްސިން ފުރިހަމަކޮށްފައިވާ އެހެން ގައުމުތަކުގެ ރައްޔިތުންގެ މައްޗަށް މިގަވާއިދަށް އިނގިރޭސިވިލާތުން އަމަލެއް ނުކުރެއެވެ.

އިނގިރޭސިވިލާތުގައި ކޮވިޝީލްޑް ވެކްސިން ޖެހުމުގެ ހުއްދަދީފައިވަނީ މިދިޔަ ސެޕްޓެމްބަރ މަހުއެވެ. އެއީވެސް ދެ ގައުމުގެ ދޭތެރޭ ބަހުގެ އެތައް ހަމަލާއެއް ބަދަލުކޮށް ތަފާތުކުރުން ގެންގުޅޭކަމަށް އިންޑިޔާއިން ބުނަމުންދިޔުމާއެކުއެވެ.

ކޮވިޝީލްޑް ވެކްސިނަކީ އިންޑިޔާގައި އާބާދީގެ ބޮޑުބަޔަކު ޖަހާފައިވާ އަދި ޖަހަމުން އަންނަ ވެކްސިނެވެ. މިހާތަނަށް އައިއިރު އިންޑިޔާގައި ކޮވިޝީލްޑް ވެކްސިންގެ 720 މިލިއަން ޑޯޒް ވަނީ ދީފައެވެ. ކޮވިޝީލްޑް ވެކްސިނަކީ އިނގިރޭސިވިލާތުގައި ޖަހަމުން އަންނަ އެސްޓްރަޒެނިކާ ވެކްސިންގެ ފޯމިޔުލާ ބޭނުންކޮށްގެން އިންޑިޔާގައި އުފައްދާފައިވާ ވެކްސިނެވެ.

އިނގިރޭސިވިލާތަށް އެތެރެވާ ފަތުރުވެރިންނާ މެދު ހޯމަ ދުވަހުން ފެށިގެން އަމަލުކުރަން ފަށާ އައު ގަވާއިދުގައި ވެކްސިން ފުރިހަމަކޮށްފައިވާ ގިނަ ގައުމުތަކެއްގެ ރައްޔިތުންނަށް ކަރަންޓީނާ ނުލާ އެގައުމަށް އެތެރެވެވެއެވެ. ނަމަވެސް އެލިސްޓުގައިވެސް އިންޑިޔާގެ ނަމެއްނެތެވެ. މަސްރަހު އިތުރަށް ހޫނުވީ މިސަބަބާހެދިއެވެ.

މިދިޔަ މަހު އިންޑިޔާގެ ފޮރިން މިނިސްޓަރ ސުބްރަމާނިޔަމް ޖައިޝަންކަރު ވަނީ އދ ގެ އާންމު ބައްދަލުވުމުގެ ހަވާސާގެ ތެރެއިން އިނގިރޭސިވިލާތުގެ އޮފިޝަލުންނާ ބައްދަލުކުރައްވާ ކަރަންޓީނުގެ މައްސަލައަށް ހައްލެއް ގެނައުމަށް އެދިވަޑައިގެންފައެވެ.