ބ. އަތޮޅުގައި އިންޓަކަނެކްޓެޑް ކަރަންޓު ވިއުގައެއް ގާއިމްކޮށްދޭނެ ފަރާތެއް ހޯދަނީ
ގުޅާލަން ނިންމާފައިވަނީ ބ. ގޮއިދޫ، ފުޅަދޫ އަދި ފެހެންދޫ
ފެނަކަ
ބ. އަތޮޅު ގޮއިދޫ، ފުޅަދޫ އަދި ފެހެންދޫގެ ކަރަންޓު ނެޓްވޯކް އެއްވިއުގައަކުން ގުޅާލައި، ބ. ގޮއިދޫގައި ސެންޓްރަލް ޕަވަރ ސްޓޭޝަން އެއް ގާއިމްކޮށްދޭނެ ބަޔަކު ހޯދަން ފެނަކައިން އަނެއްކާވެސް އިޢުލާންކޮށްފިއެވެ.
މި މަސައްކަތަށް އަލުން ހުޅުވާލަފައިވަނީ ފެނަކައިން ކުރިން ކޮށްފައިވާ އިޢުލާނަށް އެއްވެސް ފަރާތަކުން އަންދާސީ ހިސާބު ހުށަހަޅާފައި ނުވާތީކަމަށް އެ އިދާރާއިން ބުނެއެވެ. އަދި މި ފަހަރު މި ފުރުސަތު މި ހުޅުވައިލަނީ ރާއްޖެއާއި ރާއްޖެއިން ބޭރުގެ ކުންފުނިތަކަށް ވެސް ފުރުސަތު ލިބޭނޭ ގޮތަށް ކަމަށް އެ އިދާރާއިން ވަނީ ބުނެފައެވެ. މި މަސައްކަތުގެ ބިޑް ސެކިއުރިޓީއަކީ 10،000 ޔޫއެސް ޑޮލަރު ނުވަތަ އެ އަދަދަށްވާ ދިވެހި ފައިސާއެވެ. އަދި ބިޑް ސެކިއުރިޓީ ހުށަހަޅާއިރު އޮރިޖިނަލް ބޭންކް ގެރެންޓީ ލެޓަރ ނުވަތަ ބޭންކް ގެރެންޓެޑް ސްޓޭމްޕް ޖަހާފައިވާ ޗެކަކާއެކު މޯލްޑިވްސް މަނިޓަރީ އޮތޯރިޓީގައި ރަޖިސްޓްރީ ކޮށްފައިވާ އިންޝުއަރެންސް ކުންފުންޏެއްގެ އިންޝުއަރެންސް ޕޮލިސީގެ އޮރިޖިނަލް ހުށަހަޅަންޖެހެއެވެ.
މި މަސައްކަތުގެ ބިޑްގައި ބައިވެރިވުމަށް ރަޖިސްޓްރީވުމަށް ހުޅުވާލާފައިވަނީ 06 ސެޕްޓެމްބަރ 2021 އިން 19 އޮކްޓޯބަރ 2021 ގެ 08:00 – 15:00 އާ ދެމެދުގައެވެ. އަދި މަޢުލޫމާތު ސާފުކުރުމުގެ ސުންގަޑިއަކީ 18 އޮކްޓޯބަރ 2021 ގެ މެންދުރުފަހު 15:00 ކަމަށްވާއިރު، އަންދާސީ ހިސާބު ހުށަހެޅުމުގެ ސުންގަޑިއަކީ 20 އޮކްޓޯބަރ 2021 ވަނަ ދުވަހުގެ ހެނދުނު 10:00 އެވެ.
