މިއަހަރުގެ މިހާތަނަށް އައިއިރު ދައުލަތުގެ ބަޖެޓުން 20.9 ބިލިއަން ރުފިޔާ ޚަރަދުކޮށްފައިވާކަމަށް ފިނޭންސް މިނިސްޓްރީން ހާމަކޮށްފިއެވެ.

މިއަހަރަށް މަޖިލީހުން ފާސްކޮށްފައިވަނީ 34.9 ބިލިއަން ރުފިޔާގެ ބަޖެޓެކެވެ. އަހަރުގެ މިހާތަނަށް އައިއިރު ބަޖެޓުން މިވަނީ 20.9 ބިލިއަން ރުފިޔާ ޚަރަދުކުރެވިފައެވެ.

ފިނޭންސް މިނިސްޓްރީން ކޮންމެ ހަފްތާއަކު އާންމުކުރަމުން އަންނަ ތަފާސްހިސާބުގައި ވާގޮތުން މިއަހަރު ދައުލަތުގެ ބަޖެޓުން އެންމެ ބޮޑު ހޭދައެއް ކޮށްފައިވަނީ ރިކަރަންޓް ޚަރަދުތަކަށެވެ. ރިކަރަންޓް ޚަރަދުތަކަށް 15.4 ބިލިއަން ރުފިޔާ ޚަރަދުކޮށްފައިވެއެވެ. ރިކަރަންޓް ޚަރަދުތަކުގެ ތެރޭގައި ހިމެނެނީ މުވައްޒަފުންގެ މުސާރައާއި އިނާޔަތްތަކުގެ އިތުރުން، އޮފީސް ހިންގުމުގެ ޚަރަދުތަކެއެވެ. މީގެތެރެއިން މުސާރައާއި އިނާޔަތްތަކަށް 6.7 ބިލިއަން ރުފިޔާ ޚަރަދުކޮށްފައިވާއިރު، އޮފީސް ހިންގުމަށް 8.4 ބިލިއަން ރުފިޔާ ވަނީ ޚަރަދުކޮށްފައެވެ.

މީގެ އިތުރުން ކެޕިޓަލް ޚަރަދުގެ ގޮތުގައި 4.7 ބިލިއަން ރުފިޔާ ޚަރަދުކޮށްފައިވާކަމަށް ފިނޭންސް މިނިސްޓްރީން ހާމަކޮށްފައިވެއެވެ.

ޕީއެސްއައިޕީ މަޝްރޫއުތަކަށް 2.2 ބިލިއަން ރުފިޔާ ޚަރަދުކޮށްފައިވާކަމަށް ފިނޭންސް މިނިސްޓްރީން ހާމަކޮށްފައިވެއެވެ. ޕީއެސްއައިޕީ މަޝްރޫއުތަކުގެ ތެރެއިން އެންމެ ބޮޑު ޚަރަދެއް ކޮށްފައިވަނީ ދަތުރުފަތުރުގެ ދާއިރާގެ މަޝްރޫއުތައް ހިންގުމަށެވެ. މި ދާއިރާއަށް 580.4 މިލިއަން ރުފިޔާ ޚަރަދުކޮށްފައިވާއިރު، ދެވަނައަށް އެންމެ ބޮޑު ޚަރަދެއް ކޮށްފައިވަނީ ފެނާއި ނަރުދަމާގެ މަސައްކަތްތަކަށް ކަމަށް ފިނޭންސް މިނިސްޓްރީން ހާމަކޮށްފައިވެއެވެ. ސިއްހީ ދާއިރާއަށް 378.9 މިލިއަން ރުފިޔާ ޚަރަދުކޮށްފައިވާކަމަށް ފިނޭންސުން ހާމަކޮށްފައިވެއެވެ.

މީގެ އިތުރުން މިއަހަރުގެ މިހާތަނަށް ދައުލަތަށް އާމްދަނީގެ ގޮތުގައި ލިބިފައިވަނީ 12.5 ބިލިއަން ރުފިޔާކަމަށް ފިނޭންސް މިނިސްޓްރީން ހާމަކޮށްފައިވެއެވެ. އެންމެ ބޮޑު އާމްދަނީއެއް ލިބިފައިވަނީ ޓެކްސްއިންނެވެ. އެއީ 9.1 ބިލިއަން ރުފިޔާއެވެ. ޓެކްސް ނޫން އާމްދަނީގެ ގޮތުގައި 2.9 ބިލިއަން ރުފިޔާ ލިބިފައިވެއެވެ. ކެޕިޓަލް ރިސިޕްޓްގެ ގޮތުގައި 10.9 މިލިއަން ރުފިޔާ ލިބިފައިވާއިރު، ގްރާންޓްސްގެ ގޮތުގައި ލިބިފައިވަނީ 392.6 މިލިއަން ރުފިޔާކަމަށް ފިނޭންސް މިނިސްޓްރީން ހާމަކޮށްފައިވެއެވެ.