ނާއިބުރައީސްގެ އަރިހަށް ބަންގްލަދޭޝްގެ ސަފީރު އިހުތިރާމުގެ ޒިޔާރަތެއް ކުރައްވައިފި
22 ސެޕްޓެމްބަރު 2021 | ބުދަ 13:39ރާއްޖޭގެ ތަރައްގީއަށް ވެދެއްވަމުން ގެންދަވާ އެހީތެރިކަން ފާހަގަކުރެއްވި
ނައިބު ރައީސް ބަންގްލަދޭޝްގެ ސަފީރާއެކު ބޭއްވެވި ބައްދަލުކުރެއްވުމުގެ ތެރެއިން،
ރައީސުލްޖުމްހޫރިއްޔާގެ ނާއިބު ފައިސަލް ނަސީމްގެ އަރިހަށް، ބަންގްލަދޭޝް ސަރުކާރުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު، ރިއަރ އެޑްމިރަލް މުހައްމަދު ނަޒްމުލް ހަސަން، އިހުތިރާމްގެ ޒިޔާރަތެއް ކުރައްވައިފިއެވެ.
މިބައްދަލުކުރެއްވުން ކުރިޔަށްގެންދަވާފައިވަނީ ބުދަ ދުވަހުގެ ހެނދުނު ރައީސުލްޖުމްހޫރިއްޔާގެ އޮފީހުގައެވެ.
މި ބައްދަލުކުރެއްވުމުގައި، މި އަހަރު ރާއްޖެއާއި ބަންގްލަދޭޝްއާ ދެމެދު ގުޅުން ގާއިމުކުރެވުނުތާ 43 އަހަރު ފުރުމާއި ގުޅިގެން، ދެބޭފުޅުންވެސް ވަނީ އެކަން ފާހަގަ ކުރައްވާފައެވެ. އަދި ދެގައުމުގެ ގުޅުން އިތުރަށް ބަދަހި ކުރުމަށް ކުރެވެންހުރި މަސައްކަތްތަކުގެ މައްޗަށް އަލިއަޅުވާލައްވާ ދެބޭފުޅުންވެސް ފުޅާ ދާއިރާއެއްގައި މަޝްވަރާކުރެެއްވިއެވެ.
މި ބައްދަލުކުރެއްވުމުގައި ނާއިބުރައީސް ފައިސަލް ނަސީމް ވަނީ ރާއްޖޭގެ ތަރައްގީއަށްޓަކައި އެކިއެކި ގޮތްގޮތުން ބަންގްލަދޭޝްގެ ފަރާތުން ވެދެއްވަމުން ގެންދަވާ އެހީތެރިކަން ފާހަގަކުރައްވާ އެކަމުގެ އަގުވަޒަންކުރައްވާ، އެކަމަށް ބަންގްލަދޭޝް ސަރުކާރަށް ޝުކުރު އަދާކުރައްވާފައެވެ. އެމަނިކުފާނުގެ ވާހަކަފުޅުގައި، އިންސާނީ ވަަސީލަތް ތަރައްގީ ކުރުމަށް ޓެކްނިކަލް އަދި ވޮކޭޝަނަލްގެ އެކި ރޮނގުރޮނގުން މީހުން ތަމްރީނު ކުރުމަށް ބަންގްލަދޭޝްގެ ފަރާތުން ރާއްޖެއަށް ވެދެއްވަމުން ގެންދަވާ އެހީތެރިކަން ޚާއްސަގޮތެއްގައި ފާހަގަކުރެއްވިއެވެ. އަދި ރާއްޖޭގައި މިހާރުވެސް ޚިދުމަތުގައި ތިބި ޑޮކްޓަރުންނާއި ސްޕެޝަލިސްޓުން މަދުކަން ފާހަގަކުރައްވާފައިވެއެވެ.
ނާއިބުރައީސްގެ ވާހަކަފުޅުގައި، ކޮވިޑް 19 ގެ ހާލަތުގައި ބަންގްލަދޭޝް ސަރުކާރުން ރާއްޖެއާއެކު ބޭއްވެވި ގާތް ރަހްމަތްތެރިކަމަށް، ބަންގްލަދޭޝް ސަރުކާރަށް ޝުކުރު އަދާކުރައްވާފައިވެއެވެ. އެގޮތުން ބަންގްލަދޭޝްއަށް ކިޔަވަން ގޮސްތިބި ކުދިންނަށް އެހާލަތުގައި ދިމާވި ދަތިތައް ހައްލުކުރުމަށް ދިވެހި ސަރުކާރާއެކު ކުރެއްވި މަސައްކަތަށް ތައުރީފުކުރެއްވިއެވެ.
މި ބައްދަލުކުރެއްވުމުގައި، ބަންގްލަދޭޝް ސަފީރު ދެއްކެވި ވާހަކަފުޅުގައި، ރާއްޖޭގައި މަސައްކަތްކުރާ ބިދޭސީ އާބާދީގެ ބޮޑު ބައެއް ހިއްސާކުރަނީ ބަންގްލަދޭޝްގެ ރައްޔިތުންކަން ފާހަގަކުރައްވާފައިވެއެވެ. އަދި އެގޮތުން ރާއްޖޭގައި މަސައްކަތްކުރާ އެ ފަރާތްތަކަށް ކުރިމަތިވެފައިވާ އަދި ކުރިމަތިވަމުންދާ އެކިއެކި މައްސަލަތަކުގެ މައްޗަށް ފުޅާ ދާއިރާއެއްގައި ވާހަކަފުޅު ދައްކަވާފައިވެއެވެ.
މި ދެ ބޭފުޅުންގެ ވާހަކަފުޅުގައި، ދެ ގައުމުގެ ގާތް ރަހުމަތްތެރި ގުޅުން އިތުރު ހަރުފަތަކަށް ގެންދިއުމަށް ޝައުގުވެރިކަން ފާޅުކުރައްވައި، ދޭދޭ ގުޅުންތައް އިތުރަށް ހަރުދަނާ ކުރެވިދާނެ ގޮތްތަކުގެ މައްޗަށް އަލިއަޅުވާލެއްވިއެވެ.
