ސުޕްރީމް ކޯޓުގެ 13 ވަނަ އަހަރަކީ ރައްޔިތުންނަށް އަދުލުއިންސާފު ހޯދައިދިނުމަށް ކާމިޔާބު މަސައްކަތްތަކެއް ކުރެވުނު އަހަރެއް ކަމަށް އެކޯޓުން ބުނެފިއެވެ.

ދިވެހިރާއްޖޭގެ އަދުލު އިންސާފު ގާއިމުކުރުމުގެ އެންމެ މަތީ ކޯޓުގެ ގޮތުގައި އުފެދުނު ސުޕްރީމް ކޯޓަށް 13 އަހަރު ފުރުމާއި ގުޅިގެން އެކޯޓުން ހޮނިހިރު ދުވަހު ނެރެފައިވާ ނޫސްބަޔާނުގައި ބުނީ ވޭތުވެދިޔަ 13 އަހަރުގެ ތެރޭގައި ރައްޔިތުންނަށް އަދުލުއިންސާފު ލިބިދިނުމުގައި ކާމިޔާބީތަކެއް ހާސިލުކޮށް، މި ދާއިރާ ހަރުދަނާ ކުރުމަށް އެ ކޯޓުން ގިނަގުނަ މަސައްކަތްތަކެއް ކޮށްފައިވާ ކަމަށެވެ. މި ދާއިރާ ތަރައްގީކޮށް ކުރިއެރުވުމަށް އަދިވެސް ގިނަ މަސައްކަތްތައް ކުރަން ޖެހޭ ކަމަށް އެކޯޓުން ބުނެއެވެ. މާލީ ގޮތުންނާއި އިންސާނީ ވަސީލަތްތައް ލިބުމުގައި ދަތިތަކެއް ހުރި ނަމަވެސް، ލިބެންހުރި މަދު ވަސީލަތްތަކުގެ އެހީގައި މި ދާއިރާ އިސްލާހު ކުރުމަށާއި ކުރިއެރުވުމަށް މަސައްކަތްތައް ކުރާނެ ކަމަށް ބުނެއެވެ.

ފާއިތުވެ ދިޔަ ދެ އަހަރަކީ ކޮވިޑް-19 ގެ ބަލިމަޑުކަމާ ގުޅިގެން މުޅި ދުނިޔެއަށް ބަދަލުތަކެއް ގެނުވި ދެ އަހަރުކަން ފާހަގަކޮށް ސުޕްރީމް ކޯޓުން ބުނީ އިގުތިސާދީ ހަރަކާތްތަކާއި އިދާރީ އިންތިޒާމުތަކަށް ލޮޅުންއަރައި ބޮޑެތި ގޮންޖެހުންތަކެއް ކުރިމަތިވި ނަމަވެސް މިގޮންޖެހުންތަކާއެކުވެސް ކޯޓުގެ އަމާޒަކީ މެދުކެނޑުމެއް ނެތި އަވަސްކަމާއި ހަލުވިކަމާއެކު އަދުލު އިންސާފު ފޯރުކޮށްދިނުމުގެ މަސައްކަތުގައި ދެމިތިބުން ކަަމަށެވެ.

ސުޕްރީމް ކޯޓުން ބުނީ ކޮވިޑް-19 ގެ ބަލިމަޑުކަމުގެ ސަބަބުން 2020 ވަނަ އަހަގެ ކުރީކޮޅުން ފެށިގެން އިޖުރާއީ ގޮތުންނާއި އިދާރީގޮތުން ގެނަންޖެހޭ ބަދަލުތައް ދެނެގަނެ އެ ކޯޓުގެ ޝަރީއަތްތައް ހުއްޓުމެއްނެތި ކުރިއަށް ގެންދިއުމަށް އީޖާދީ އައު ވަސީލަތްތަކުގެ ބޭނުން ހިފައި، އެ ކޯޓުގެ ޝަރީއަތްތައް ދާއިމީ ގޮތެއްގައި ދުރުން ކުރިއަށް ގެންދެވޭނެ އިންތިޒާމު ހަމަޖައްސާފައިވާ ކަމަށެވެ. މި މުއްދަތުގެ ތެރޭގައި ކޯޓުގެ ޝަރީއަތްތަކާ ގުޅޭ ކަންކަން ހަރުދަނާކުރުމަށް އިޖުރާއީ ގޮތުން ގެންނަން ފެނުނު ބަދަލުތައް ދެނެގަނެ އެކަންކަން ހައްލުކުރުމުގެ މަސައްކަތް ކުރެވިފައިވާ ކަމަށް ސުޕްރީމް ކޯޓުން ބުނެއެވެ.

އެގޮތުން ކުރެވުނު މަސައްކަތްތަކާއެކު އެ ބަދަލުތައް ކޯޓުގެ ގަވާއިދުގައި ހިމަނައި ނިމިގެން މިދިޔަ އަހަރުގެ ތެރޭގައި ކޯޓުގެ އައު ގަވާއިދު އާންމުކުރެވިފައިވާ ކަމަށް ސުޕްރީމް ކޯޓުން ބުނެއެވެ. އަދި ހާމަކަން ބޮޑު ގޮތެއްގައި ޝަރީއަތްތައް ހިންގުމުގެ ސިޔާސަތަކީ 2020 ވަނަ އަހަރުން ފެށިގެން އަމަލުކުރަމުން އަންނަ ސިޔާސަތު ކަމަށް ބުނެއެވެ.

ސުޕްރީމް ކޯޓުން ބުނީ 2020 ވަނަ އަހަރުގެ ފެބުރުއަރީ 16 ވަނަ ދުވަހުން ފެށިގެން ސުޕްރީމް ކޯޓު ޝަރީއަތްތަކުގެ އޯޑިއޯ ރެކޯޑިން އާންމުކުރަން ފެށިފައިވާ ކަމަށެވެ. ކޯޓުގެ ޝަރީއަތްތައް ވީޑިއޯ ކޮންފަރެންސް މެދުވެރިކޮށް 2020 ވަނަ އަހަރުގެ ޖޫން މަހުގެ 02 ވަނަ ދުވަހުން ފަށައި، ސުޕްރީމް ކޯޓުގެ ޝަރީއަތުގެ މާލަމުގައި ބޭއްވޭ ޝަރީއަތްތައް ވެސް ލައިވް ސްޓްރީމް ކުރަން ފަށާފައިވާ ކަމަށް ބުނެއެވެ.

މީގެ އިތުރުން ސުޕްރީމް ކޯޓުގެ ތަފާސްހިސާބަށް ބަލާއިރު، ސުޕްރީމް ކޯޓުގެ 13 ވަނަ އަހަރަކީ އޭގެ ކުރީ އަހަރަށްވުރެ ކާމިޔާބު އަހަރެއްގެ ގޮތުގައި ފާހަގަކޮށްފައިވެއެވެ. އެގޮތުން 2020 ވަނަ އަހަރުގެ ސެޕްޓެންބަރު 18ން މި އަހަރުގެ ސެޕްޓެންބަރު 18 ވަނަ ދުވަހާ ހަމައަށް 225 މައްސަލަ ހުށަހެޅި 121 މައްސަލަ ވަނީ ރަޖިސްޓްރީ ކުރެވިފައެވެ. ނިމިދިޔަ އަހަރުގެ ތެރޭގައި 369 އަޑުއެހުން ބޭއްވިފައިވާއިރު، 90 މައްސަލައެއްގައި ހުކުމްކުރެވިފައިވެއެވެ. މިއީ، އޭގެ ކުރީ އަހަރު ހުކުމްކުރެވުނު އަދަދަށްވުރެ 29 އިންސައްތައިގެ ކުރިއެރުމެއް ކަމަށް އެކޯޓުން ބުނެއެވެ.

ސުޕްރީމް ކޯޓުން ބުނީ އިންފޮމޭޝަން ޓެކްނޮލޮޖީގެ އައު ތަސައްވުރާއެކު، އެކޯޓުގެ ޝަރީއަތުގެ މަޖިލީސްތައް ހިންގުމުގައި، ކަރުދާސް މަދުކުރެވިފައިވާ ކަމަށެވެ. އަދި މިދިޔަ އަހަރުގެ ތެރޭގައި ހާސިލުކުރެވުނު މުހިންމު އެއް ކާމިޔާބީއަކީ ޝަރުއީ ދާއިރާގެ ކޭސް ރިޕޯޓަރ އެޕްލިކޭޝަން ތަރައްގީކޮށް، ކޯޓު އުފެދުނީއްސުރެ މިއަދާ ހަމައަށް ކޯޓުން ނިންމާފައިވާ ނިންމުންތައް އެ އެޕްލިކޭޝަނަށް އަޕްލޯޑްކޮށް، އެތެރޭގެ ބޭނުންތަކަށް އެ އެޕްލިކޭޝަން ބޭނުންކުރުމުގެ އިންތިޒާމު ހަމަޖެއްސުން ކަމަށް ބުނެއެވެ.

ކޭސް ރިޕޯޓަރ އެޕްލިކޭޝަންއަކީ ސުޕްރީމް ކޯޓުގެ ފަނޑިޔާރުންގެ މަޖިލީހުގެ އިސްނެގުމަކަށް ފެށުނު ޚާއްސަ ޕްރޮޖެކްޓެވެ. މި އެޕްލިކޭޝަން ޑިވެލޮޕްކޮށް ތަރައްގީ ކުރެވިގެންދިޔައީ ސުޕްރީމް ކޯޓުގެ ފަނޑިޔާރުންގެ ސީދާ ބެއްލެވުމުގެ ދަށުން ކަމަށް ސުޕްރީމް ކޯޓުން ބުނެއެވެ. މި މަސައްކަތަކީ، ވަރަށް ކުރު މުއްދަތެއްގެ ތެރޭގައި ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންގެ އެހީތެރިކަމާއެކު ކޮށް ނިންމާލެވުނު މަސައްކަތެކެވެ. މި މަސައްކަތުގެ ދެވަނަ ފިޔަވަހި ނިމިގެންދާއިރު މި އެޕްލިކޭޝަން ބޭނުންކުރުމުގެ އެކްސެސް ގާނޫނީ ވަކީލުންނާއި ގާނޫނު ކިޔަވާ ދަރިވަރުންނަށް ވެސް ހުޅުވައިލެވިގެން ދާނެ ކަމަށް ސުޕްރީމް ކޯޓުން ބުނެއެވެ.

އަމާޒަކީ، ލިބިފައިވާ މަދު ވަސީލަތްތަކާއެކުވެސް، އެންމެ ފުރިހަމަ ގޮތުގައި ރައްޔިތުންނަށް ޚިދުމަތް ފޯރުކޮށްދިނުމާއި، އަދުލު އިންސާފު ފޯރުކޮށްދިނުމުގައި ނަތީޖާ ނެރޭ ޒިންމާދާރު މުއައްސަސާއެއްގެ ގޮތުގައި އެ ކޯޓު ހަރުދަނާކުރުން ކަމަށް ސުޕްރީމް ކޯޓުން ބުނެއެވެ.