ސްޕެނިޝް ލީގު: މަލާގާ ބަލިކޮށް ރެއާލް އިން ލީގު ތަށި ކަށަވަރުކޮށްފި

ސްޕެނިޝް ލަލީގާގައި މަލާގާ ބަލިކޮށް ރެއާލް މެޑްރިޑުން ލީގު ތަށި ކަށަވަރުކޮށްފި އެވެ.

އާދީއްތަ ދުވަހުގެ ރޭ ލީގުގައި ކުޅުނު ފަހު މެޗު މަލާގާއާ ވާދަކޮށް ރެއާލް އިން މެޗު ކާމިޔާބުކުރީ 0-2 ގެ ނަތީޖާއަކުންނެވެ.

މަލާގާ ދަނޑުގައި ކުޅުނު މި މެޗު ފެށިގެން ދެވަނަ މިނެޓުގައި ރެއާލް އިން ވަނީ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ކްރިސްޓިއާނޯ ރޮނާލްޑޯ އެވެ. މިއާއެކު ރޮނާލްޑޯ ވެގެންގޮސްފައިވަނީ ޖެހިޖެހިގެން ސްޕެނިޝް ލީގުގެ 8 ސީޒަނުގައި 25 ލަނޑު ޖެހި ދެވަނަ ކުޅުންތެރިޔާއަށެވެ. ކުރިން މި ރެކޯޑް އޮތީ ބާސެލޯނާގެ ލިއޮނެލް މެސީ އަތުގައެވެ.

ރޮނާލްޑޯގެ މި ލަނޑަށް ފަހު ވެސް ރެއާލް އިން ދިޔައީ މަލާގާގެ ހާފަށް ބާރުބޮޑުކޮށް ފުލުފުލުގައި ލަނޑޫ ޖެހުމަށް ފުރުސަތު ތަނަވަސްކުރަމުންނެވެ. އެގޮތުން ކަރިމް ބެންޒެމާއަށް ލިބުނު ފުރުސަތުތައް ހިމެނެއެވެ.

މީގެ އިތުރުން މަލާގާގެ ރަމިރޭޒް އަށް ވެސް ވަނީ ނަތީޖާ ހަމަހަމަކުރަން ފުރުސަތުތައް ލިބިފައެވެ. އެހެންނަމަވެސް ރެއާލްގެ ވަރުގަދަ ޑިފެންސާ އެކު ރަމިރޭޒްގެ ހަމަލާތައް ވަނީ ދިފާއުކޮށްފައެވެ.

ފުރަތަމަ ހާފް ނިމުނީ 0-1 ގެ ނަތީޖާއިން މަލާގާގެ މައްޗަށް ރެއާލް ކުރީގައި އޮވެގެންނެވެ.

ދެވަނަ ހާފްގައި މަލާގާއިން އެޓީމުގެ ކުޅުން ރަނގަޅުކޮށްފައިވާއިރު، އެޓޭކިން ގޭމެއް ވަނީ ފެނިގެންގޮސްފައެވެ. އެގޮތުން ރެއާލްގެ ދެވަނަ ހާފްގައި ފަހަތަށް ޖެހިގެން ޑިފެންސްކުރި އިރު، ކައުންޓާގައި އެޓީމުން ދިޔައީ ނުރައްކާކުރަމުންނެވެ.

ރެއާލް އިން މެޗުގެ ލީޑު ފުޅާކުރީ 55 ވަނަ މިނެޓޫގައި ރަފައެލް ވެރާންގެ އެހީތެރިކަމާ އެކު ކަރިމް ބެންޒެމާ ކާމިޔާބުކުރި ލަނޑުންނެވެ. މި ލަނޑަށް ފަހު މަލާގާގެ ފަރާތުން މޮޅު ކުޅުމެއް ފެނިގެންދިޔައިރު، ރެއާލްގެ ކީޕަރު ކޭލޯ ނަވާސްގެ ފަރާތުން މޮޅެތި ސޭވްތަކެއް ވަނީ ފެނިގެންގޮސްފައެވެ.

މި ނަތީޖާއާއެކު ރެއާލް އޮތީ ކުޅުނު 38 މެޗުން ލިބުނު 93 ޕޮއިންޓާއެކު ޕޮއިންޓް ތާވަލުގެ އެއްވަނައިގަ އެވެ. މެޗުން ބަލިވި މަލާގާ އޮތީ ކުޅުނު 38 މެޗުން ލިބުނު 46 ޕޮއިންޓާއެކު ޕޮއިންޓް ތާވަލުގެ 11 ވަނައިގަ އެވެ.

ރެއާލް އިން ހަތަރު އަހަރު ތެރޭގައި ފުރަތަމަ ފަހަރަށް ސްޕެނިޝް ލީގުގެ ތަށި ކަށަވަރުކޮށްފައިވާއިރު، މިއީ އެޓީމު ކާމިޔާބުކުރި 33 ވަނަ ލަލީގާ ތަށްޓެވެ. އެޓީމާ އެންމެ ކައިރިން ވާދަކުރި ބާސާ އަށް ލިބިފައިވަނީ 90 ޕޮއިންޓެވެ. އެގޮތުން ރެއާލް އިން ލީގު ކަށަވަރުކުރީ ތިން ޕޮއިންޓްގެ ލީޑަކާއެކުގައެވެ.

މީގެ އިތުރުން ޔުއެފާ ޗެމްޕިއަންސް ލީގު ކާމިޔާބުކުރުމުގެ ފުރުސަތު ވެސް އެޓީމަށް އަދި އެބައޮތެވެ. ޗެމްޕިއަންސް ލީގު ފައިނަލުގައި އެޓީމު ނިކުންނާނީ އިޓަލީގެ ޗެމްޕިއަން ޔުވަންޓަސްއާ ދެކޮޅަށެވެ.