މިހާރު މިއޮތް އިންތިޚާބީ ނިޒާމުން ނަތީޖާ މެނިޕިއުލޭޓެއް ނުކުރެވޭނެ : އެސްޖީ ޙަސަން ޒަކަރިއްޔާ
16 ސެޕްޓެމްބަރު 2021 | ބުރާސްފަތި 18:51ހުރިހާ އިންތިޚާބަކީ ހާމަކަން ބޮޑު ގޮތެއްގައި، ދެފުށް ފެންނަ ގޮތަށް ބާއްވާ އިންތިޚާބުތަކެއް
ރާއްޖެޓީވީގެ ފަލަސުރުޚީ ޕްރޮގްރާމްގައި އެސްޖީ ޙަސަން ވާހަކަދައްކަވަނީ
ދިވެހިރާއްޖޭގައި މިހާރު މިއޮތް އިންތިޚާބީ ނިޒާމުން ނަތީޖާ މެނިޕިއުލޭޓެއް ނުކުރެވޭނެ ކަަމަށް އިލެކްޝަން ކޮމިޝަން (އީސީ)ގެ އެސްޖީ ޙަސަން ޒަކަރިއްޔާ ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި އެސްޖީ ޙަސަން ވިދާޅުވީ, އިންތިޚާބުތަކުގައި ބަލިވާ މީހުން އަބަދުވެސް ސިސްޓަމް ގޯސްކުރާނެ ކަމަށާއި، އެއީ މުޅި ދުނިޔޭގައި އެކަން ހިނގާ ގޮތް ކަމަށެވެ. އަދި ރާއްޖޭގައި މިހާރު މިއޮތް އިންތިޚާބީ ނިޒާމު މެނިޕިއުލޭޓްކޮށް އިންތިޚާބެއްގެ ނަތީޖާ ބަދަލު ނުކުރެވޭނެ ކަމަށާއި، މެނިޕިއުލޭޓް ކުރުމުގެ ޖާގަ ވެސް ނޯންނާނެ ކަމަށެވެ. ސިޔާސީ ޕާޓީތަކާއި، ސިޔާސީ މީހުންނަށްވެސް އެކަމުގެ ޔަގީންކަން އަރުވާ ކަމަށެވެ.
ޙަސަން ވިދާޅުވީ ރާއްޖޭގައި ބާއްވާ ހުރިހާ އިންތިޚާބަކީ ހާމަކަން ބޮޑު ގޮތެއްގައި ދެފުށް ފެންނަ ގޮތަށް ބާއްވާ އިންތިޚާބުތަކެއް ކަމަށެވެ. މިހާތަނަށް ކުރިއަށް ގެންދިޔަ ހުރިހާ އިންތިިޚާބަކީ ވެސް, ހެދިފައިވާ ގާނޫނާއި ގަވާއިދުގެ ތެރެއިން ކުރިއަށް ގެންދިޔަ ވަރަށް ކާމިޔާބު އިންތިޚާބުތަކެއް ކަމަށެވެ. އަދި ދުނިޔޭގެ ހުރިހާ ހިސާބުން ރާއްޖޭގައި ބާއްވާ އިންތިޚާބުތައް އޮބްޒަރވްކުރާ ކަމަށާއި، އޮބްޒަރވްކުރުމުގެ ފުރުސަތު ފަހިކޮށްދިނުމުގެ ގޮތުން ފުރިހަމަ އިންތިޒާމުތަކެއް ހަމަޖައްސައިދޭ ކަމަށެވެ.
އެންމެ ފަހުން ބޭއްވިގެން ދިޔަ ރައްޔިތުން މަޖިލީހުގެ އިންތިޚާބަށް އަލިއަޅުއްވާލައްވައި ޙަސަން ވިދާޅުވީ, އެއިންތިޚާބު އޮބްޒަރވް ކުރުމަށްފަހު ކޮމަންވެލްތުން ނެރުނު ރިޕޯޓުގައި ރާއްޖެއަށް ވަރަށް ތައުރީފްކޮށްފައިވާ ކަމަށެވެ. އަދި ރާއްޖޭގެ އިންތިޚާބީ ނިޒާމަކީ ސަރަހައްދީ ގައުމުތަކަށް އޮތް ނަމޫނާއެއް ކަމަށް ބުނެފައިވާ ކަމަށެވެ.
ޙަސަން ވިދާޅުވީ ރާއްޖޭގައި އޮތް އިލެކްޓޯރަލް ނިޒާމަކީ ނަމޫނާ ނިޒާމެއް ކަމަށާއި، މި ނިޒާމު އެހެން ގައުމުތަކުގައި ފަތުރަން ބޭނުންވާ ކަމަށެވެ. އަދި އެކަން ކުރިއަށް އޮތް ފަސް އަހަރުގެ ތެރޭގައި ކުރެވޭނެ ކަމުގެ އުންމީދު އެބައޮތް ކަމަށް އޭނާ ވިދާޅުވިއެވެ.
