ސްޓްރެޓީޖިކް އެކްޝަން ޕްލޭންގައި ހުރި ކަންކަން ކުރެވޭނެކަމުގެ ޔަގީންކަން އެބައޮތް: އެސްޖީ ޙަސަން ޒަކަރިއްޔާ
16 ސެޕްޓެމްބަރު 2021 | ބުރާސްފަތި 17:56މިއަހަރުގެ އެކްޝަން ޕްލޭން ވަރަށް ތަފާތުވާނެ
ރާއްޖެޓީވީގެ ފަލަސުރުޚީ ޕްރޮގްރާމްގައި އީސީގެ އެސްޖީ ޙަސަން ޒަކަރިއްޔާ ވާހަކަދައްކަވަނީ
އިލެކްޝަން ކޮމިޝަން (އީސީ)ގެ ސްޓްރެޓީޖިކް އެކްޝަން ޕްލޭންގައި މައިގަނޑު ހަތަރު ލަނޑުދަޑިއެއް އެކުލަވާލީ ގާބިލުކަން ކުރި މިންވަރަށް ބެލުމަށްފަހު، އެކަންކަން ކުރެވޭނެ ކަމުގެ ޔަގީންކަމާއެކު ކަމަށް އެކޮމިޝަންގެ އެސްޖީ ޙަސަން ޒަކަރިއްޔާ ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި އެސްޖީ ޙަސަން ވިދާޅުވީ, މިފަހަރު ސްޓްރެޓީޖިކް ޕްލޭންގައި މައިގަނޑު ހަތަރު ލަނޑުދަނޑިއެއް ފާހަގަކޮށްފައިވާ ކަމަށާއި، މިއަހަރުގެ އެކްޝަން ޕްލޭންގައި 2020 އަހަރުގެ އެކްޝަން ޕްލޭންގައި ހުރި ބައެއް ކަންކަން ހިމަނާފައިވާ ކަމަށެވެ. ނަމަވެސް މިއަހަރުގެ އެކްޝަން ޕްލޭން ވަރަށް ތަފާތުވާނެ ކަމަށް އޭނާ ވިދާޅުވިއެވެ.
މީގެ ކުރީގެ ސްޓްރެޓީޖިކް އެކްޝަން ޕްލޭންއަށް އިޝާރާތް ކުރައްވައި ޙަސަން ވިދާޅުވީ, އެޕްލޭންގައި 8 ލަނޑުދަޑިއެއް ހާސިލުކުރުމަށް ނިންމާފައިވާ ކަމަށެވެ. ނަމަވެސް ކޮންމެ 5 އަހަރަކުން ޖެހިޖެހިގެން 3 އިންތިޚާބެއް އަންނައިރު، އެހެން މަސައްކަތްތައް ކުރުމަށް ލިބެނީ ދެއަހަރު ކަމަށާއި، ދެއަހަރުގެ ތެރޭގައި އެކްޝަން ޕްލޭންގެ ހުރިހާ ލަނޑުދަނޑިއެއް ހާސިލުކުރުމަކީ ކޮމިޝަނަށް ވަރަށް ދަތި އުނދަގޫ ކަމެއް ކަމަށެވެ.
އަދި ކޮމިޝަނުން ކުރަން ބޭނުންވާ ވަރަށް ގިނަ މަސައްކަތްތައް އެބަހުރި ކަމަށާއި، މިހާރު އެންމެ ބޮޑު ސަމާލުކަމެއް ދެނީ އެންމެ މުހިންމު މަސައްކަތްތައް ކުރުމަށް ކަމަށެވެ. އަދި ތަޖުރިބާއަށް ބެލުމަށްފަހު މިހާރު އެކުލަވާލާފައިވާ އެކްޝަން ޕްލޭންގައި މިހާރު ހުންނާނީ އެންމެ މުހިންމު މަސައްކަތްތައް ކަމަށެވެ. ލަނޑުދަޑިތައް 4އަށް ބަދަލުކުރި ނަމަވެސް އެމަސައްކަތްތައް ކުރެވޭނެ ކަމުގެ ޔަގީންކަން އެބައޮތް ކަމަށެވެ.
އީސީއިން ކުރިއަށް އޮތް 5 އަހަރަށް އެކުލަވާލާފައިވާ އެ ކޮމިޝަންގެ ސްޓްރެޓީޖިކް އެކްޝަން ޕްލޭން އިފްތިތާހުކޮށްފައިވަނީ ބުދަ ދުވަހުގެ ރޭ ބޭއްވި ޚާއްސަ ރަސްމިއްޔާތެއްގައެވެ.
"ކުރިމަގު ރޭވުން" މި ނަމުގައި އިފްތިތާހުކުރި ސްޓްރެޓީޖިކް އެކްޝަން ޕްލޭންގައި އިލެކްޝަންސް ކޮމިޝަންގެ އިސްތިރާޖީ އެޖެންޑާއާއި، ކޮމިޝަންގެ ތަސައްވުރަށް ވާސިލުވުމަށް ގެންނަން ކަނޑައަޅާފައިވާ މައިގަނޑު ބަދަލުތަކާއި، ހާސިލުކުރަން ބޭނުންވާ ނަތީޖާތަކުގެ މަގުޗާޓު އެކުލަވާލާފައިވެއެވެ.
