ހޯމަ ދުވަހު ވެކްސިންގެ ދެވަނަ ޑޯޒް ފުރިހަމަކުރީ 2،109 މީހުން
ފުރަތަމަ ޑޯޒް ޖެހި މީހުންގެ ޖުމްލަ އަދަދު ވަނީ 389،557ށް އަރާފައި
ވެކްސިން ޖެހުމުގެ ގައުމީ ކެމްޕޭންގެ ތެރެއިން ޓްރީ ޓޮޕް ހޮސްޕިޓަލުގައި ވެކްސިން ދިނުމުގެ މަސައްކަތް ކުރިއަށް ދަނީ
ހޯމަ ދުވަހު 2,109 މީހުން ވެކްސިންގެ ދެވަނަ ޑޯޒް ފުރިހަމަ ކޮށްފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނީ ހޯމަ ދުވަހު މާލެ ސަރަހައްދުން 140 މީހުން ވެކްސިންގެ ފުރަތަމަ ޑޯޒް ފުރިހަމަކޮށްފައިވާ ކަމަށެވެ. އަދި އަތޮޅުތެރެއިން 182 މީހުން ފުރަތަމަ ޑޯޒް ފުރިހަމަކޮށްފައިވާއިރު ވެކްސިން ޖަހާފައިވަނީ ޖުމްލަ 322 މީހުންކަމަށެވެ. މީގެއިތުރުން ވެކްސިންގެ ދެވަނަ ޑޯޒް 1،135 މީހުން ފުރިހަމަކޮށްފައިވާއިރު އަތޮޅުތެރެއިން 974 މީހުން ވަނީ ދެވަނަ ޑޯޒް ފުރިހަމަކޮށްފައި ކަމަށެވެ.
ރާއްޖެއިން ވެކްސިންގެ ފުރަތަމަ ޑޯޒް ޖެހި މީހުންގެ ޖުމްލަ އަދަދު 389،557ށް އަރާފައިވާއިރު ދެވަނަ ޑޯޒް ޖެހި ޖުމްލަ މީހުންގެ އަދަދު ވަނީ 323،679ށް އަރާފައެވެ،
ވެކްސިން ފުރިހަމަ ކުރުމަށް ކަމާބެހޭ ފަރާތްތަކުން ދަނީ ތަކުރާރުކޮށް އިލްތިމާސްކުރަމުންނެވެ. ބަލިން ދިފާއުވުމަށް ވެކްސިން ވަރަށް މުހިންމު ކަމަށާއި، ބައްޔަށް ޕޮޒިޓިވްވި ނަމަވެސް ވެކްސިން ފުރިހަމަކޮށްފައިވާނަމަ ބަލިން މީހާއަށް ކުރާ އަސަރު ކުޑަ ކަމަށް ޑޮކްޓަރުން ވިދާޅުވެއެވެ.
މީގެ އިތުރުން ރާއްޖޭގައި ކޮވިޑް-19ގައި ނިޔާވާ ގިނަ މީހުންނަކީ ވެސް ވެކްސިންގެ ޑޯޒު ފުރިހަމަ ނުކުރާ މީހުން ކަމަށް އެޗްޕީއޭއިން ބުނެފައިވެއެވެ. އެޗްޕީއޭއިން ބުނީ މެއި މަހުގެ އެއްވަނަ ދުވަހުގެ ނިޔަލަށް މިބަލީގައި ނިޔާވި މީހުންގެ ތެރެއިން 89 އިންސައްތަ މީހުންނަކީ ވެކްސިންގެ ޑޯޒު ފުރިހަމަ ނުކުރާ މީހުން ކަމަށެވެ. އެޗްޕީއޭއިން ބުނީ 3 ޖޫން އިން 23 އޮގަސްޓަށް އެޑްމިޓްކޮށްގެން ފަރުވާ ދޭން ޖެހުނު މީހުންގެ ތެރެއިން ހާލު ސީރިއަސްވެ، ހުޅުމާލޭ މެޑިކަލް ފެސިލީޓީގެ އައިސީޔޫގައި ފަރުވާ ދޭން ޖެހުނު 82 އިންސައްތަ މީހުންނަކީ ވެސް ވެކްސިންގެ ޑޯޒު ފުރިހަމަ ނުކުރާ މީހުން ކަމަށެވެ.
ކޮވިޑް-19 ކޮންޓްރޯލް ކުރުމަށް އާބާދީގެ ބޮޑު އިންސައްތައެއް ވެކްސިން ފުރިހަމަ ކުރަން ޖެހެއެވެ. އެގޮތުން އާބާދީގެ ގިނަ ބަޔަކު ވެކްސިންޖަހައި ނިންމުމަށް ބާރު އެޅުމުގެ ގޮތުން ސަރުކާރުން މިހާރު ވެކްސިނޭޝަން ޕްރޮގްރާމެއް ކުރިއަށްގެންދެއެވެ.
