މަސައްކަތްތައް ވަރަށް ކާމިިޔާބު، މިއަހަރު ވެސް ނިންމާލާނީ ރަނގަޅު ފާއިދާއާއެކު: އާޒިމް
ގާތްގަނޑަކަށް 350 މިލިއަން ރުފިޔާގެ އިކުއިޕްމެންޓްތައް އިންވެސްޓް ކުރެވިފައިވޭ
ހޯރަފުށީގައި އަޅާ ފެރީޓާމިނަލްގެ އަމަލީ މަސައްކަތް ފެށި ރަސްމިއްޔާތުގައި އެމްޓީސީސީގެ ސީއީއޯ އާދަމް އާޒިމް ވާހަކަދައްކަވަނީ،
މަސައްކަތްތައް ވަރަށް ކާމިިޔާބު ކަމަށާއި، މިއަހަރު ވެސް ނިންމާލާނީ ރަނގަޅު ފާއިދާއާއެކު ކަމަށް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމް ވިދާޅުވެއްޖެއެވެ.
އެމްޓީސީސީގެ 2020 ވަނަ އަހަރުގެ މާލީ ނަތީޖާ މިހާރު އާންމުކޮށްފައިވާއިރު ފާއިތުވި އަހަރު އެކުންފުނިން ކުރި 1.37 ބިލިއަން ރުފިޔާގެ ވިޔަފާރިން ޓެކުހަށް ކެނޑުމުގެ ކުރިން ސާފު ފައިދާގެ ގޮތުގައި 224.7 މިލިއަން ރުފިޔާ ވަނީ ލިބިފައެވެ. މިއީ އެ ކުންފުނީގެ 40 އަހަރުގެ ތާރީޚުގައި ލިބުނު އެންމެ ބޮޑު ފައިދާކަމަށް އެމްޓީސީސީން ފާހަގަކުރެއެވެ.
އެމްޓީސީސީއަށް މިހާތަނަށް ލިބުނު ކުރިއެރުންތަކާ ބެހޭ ގޮތުން ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުން އާޒިމް ވިދާޅުވީ މަގާމާ ހަވާލުވިއިރު މަޝްރޫއުތައް ނުނިމޭ މައްސަލަ އިންތިހާއަށް ބޮޑުވެފައިވާ ކަމަށެވެ. އެންމެ ފުރަތަމަ މަސައްކަތް ކުރީ މައްސަލަ ދެނެގަތުމަށް ކަމަށް އާޒިމް ވިދާޅުވިއެވެ. އެގޮތުން އިންސާނީ ވަސީލަތްތަކުގެ ދަތިކަމާއި، މަސައްކަތްތައް ކުރުމަށް ބޭނުންވާ އާލާތްތައް ނެތްކަން ފާހަގަކުރެވުނު ކަމަށް އޭނާ ވިދާޅުވިއެވެ. އަދި ވިދާޅުވީ ބޭނުން ކުރަމުން އައި ވެހިކަލްތަކަކީ ވެސް ވަރަށް ބޮޑަށް ހަވާލުވެ ގިނަ ދުވަސްވީ އެއްޗިއްސަށްވުމާއެކު ރަނގަޅަށް ބޭނުންނުހިފޭ އެއްޗެހި ކަމަށެވެ.
އާޒިމް ވިދާޅުވީ ފާއިތުވި ދެ އަހަރެއްހާ ދުވަހުގެ ތެރޭގައި ގާތްގަނޑަކަށް 350 މިލިއަން ރުފިޔާގެ އިކުއިޕްމެންޓްތައް އިންވެސްޓް ކުރެވިފައިވާ ކަމަށެވެ.
ކޮވިޑް-19ގެ ޕެންޑަމިކްއާއެކު ވެސް މަސައްކަތްތައް ނުހުއްޓި ކުރިއަށްދިޔަކަން ފާހަގަކުރައްވައި އާޒިމް ވިދާޅުވީ، އެމްޓީސީސީން އަބަދުވެސް މަސައްކަތް ކުރަނީ ތަކެތި ހޯދައިގެން އެންމެ ރަނގަޅު ނަފާ ހޯދަން ކަމަށެވެ. އަދި ކުންފުނީގެ ހިއްސާދާރުންނަށް ރަނގަޅު ހިއްސާއެއް ރަނގަޅު އާމްދަނީ އެއް ދިނުމަކީ ވެސް އަމާޒެއް ކަމަށް އާޒިމް ވިދާޅުވިއެވެ.
އާޒިމް ވިދާޅުވީ މިހާރު ކުންފުނީގެ އެތެރޭގައި ހުރި މައްސަލަތައް ހައްލު ކުރެވި، އޯގަނައިޒް ކުރެވިފައިވާ ކަމަށާއި، އުސޫލުތަކާއި އިންތިޒާމްތަކުގެ ތެރެއިން މަސައްކަތްތައް ކުރިއަށްދާ ކަމަށެވެ. އެގޮތުން މަސައްކަތްތައް ހަލުއިވެ، މަޝްރޫއުތައް ނިންމަން ކަނޑައަޅާފައިވާ ތާރީޚުތަކަށް ނިންމޭކަން އޭނާ ފާހަގަކުރެއްވިއެވެ. އަދި މިއަދު އެމްޓީސީސީއަކީ ރައްޔިތުންގެ އިތުބާރު ލިބިފައިވާ ކާމިޔާބު ކުންފުންޏެއް ކަމަށް އާޒިމް ވިދާޅުވިއެވެ.
