އަންނަން އޮތް ޖީލު ހަރުދަނާކުރުމަށް މަސައްކަތްކޮށްދެއްވާ: ނާއިބުރައީސް
ކާށިދޫ ކައުންސިލުން ވަނީ ހައްލު ބޭނުންވާ ކަންކަން ނާއިބުރައީސާ ހިއްސާކުރައްވާފައި
ނާއިބުރައީސް ކާޝިދޫގެ ކައުންސިލަރުންނާ ބައްދަލުކުރެއްވުން
އަންނަން އޮތް ޖީލު ހަރުދަނާގޮތެއްގައި ބިނާކުރުމަށް ޚާއްސަ ސަމާލުކަމެއް ދިނުމަށް ރައީސުލްޖުމްހޫރިއްޔާގެ ނާއިބު ފައިޞަލް ނަސީމް އެދިވަޑައިގެންފިއެވެ.
ނާއިބު ރައީސް މިފަދައިން އެދިވަޑައިގެންފައިވަނީ ހޯމަ ދުވަހުގެ މެންދުރުފަހު ރައީސުލްޖުމްހޫރިއްޔާގެ އޮފީހުގައި, ކ. ކާށިދޫ ކައުންސިލަރުންނާއި ބައްދަލުކުރައްވައި ދެއްކެވި ވާހަކަފުޅުގައެވެ. އެމަނިކުފާނު ވިދާޅުވީ މުޖުތަމައުގައި ހުރި ނޭދެވޭ ކަންކަން ހުއްޓުވުމަށް ކައުންސިލުގެ ފަރާތުންވެސް މަސައްކަތްތަކެއް ކުރަންޖެހޭ ކަމަށެވެ. އެގޮތުން ރަށުގައި ހޭލުންތެރިކަމުގެ ޕްރޮގްރާމްތައް ހިންގުމަށް އެމަނިކުފާނު ބާރުއެޅުއްވެވިއެވެ.
އަންނަން އޮތް ޖީލު ހަރުދަނާ ގޮތެއްގައި ބިނާކުރުމަށް ޚާއްސަ ސަމާލުކަމެއް ދިނުމަށާއި، ކުދިންނަކީ ހުނަރުވެރި ކުދިންނަށް ހެދުމަށް އެކި ޕްރޮގްރާމުތައް ހިންގުމަށްވެސް އެމަނިކުފާނު ބާރުއަޅުއްވާފައިވެއެވެ. އޭގެ ސަބަބުން ހަމަޖެހޭ މުޖުމަތަމައެއް އުފެދިގެންދާނެކަމަށް ނާއިބުރައީސް ވަނީ ވިދާޅުވެފައެވެ. މީގެ އިތުރުން އެމަނިކުފާނު ވަނީ ކުޑަކުދިންގެ ރައްކާތެރިކަމާއި ސަލާމަތަށް ޚާއްސަ ސަމާލުކަމެއް ދިނުމަށާއި އެކުދިންނަށް ދެވޭ ފޯނު ފަދަ އާލާތްތައް ރަނގަޅަށް މޮނިޓަރކުރުމަށް ބާރުއަޅުއްވާފައެވެ.
ކާށިދޫ ކައުންސިލާއެކު ބޭއްވި ބައްދަލުވުމުގައި ކާށިދޫ ކައުންސިލަރުން ވަނީ އެ ރަށުގެ ތަރައްގީއަށް ރާވާފައިވާ މަސައްކަތްތަކާއި މިހާރު ކުރިއަށްދާ މަސައްކަތްތަކާއި ރަށުގެ ރައްޔިތުންގެ ހުރި ކަންބޮޑުވުންތައް ރައީސުލްޖުމްހޫރިއްޔާގެ ނާއިބާ ހިއްސާ ކުރައްވާފައެވެ.
އެގޮތުން ކައުންސިލަރުން ވަނީ ރަށުގެ ފެނާއި ނަރުދަމާގެ މަސައްކަތް ލަސްވަމުންދާތީ އެކަމުގެ ކަންބޮޑުވުން ފާޅުކުރައްވާފައެވެ. އަދި ރަށުގެ ސިއްހީ މަރުކަޒުގެ ޚިދުމަތް ފުޅާކޮށް އަތޮޅު ހޮސްޕިޓަލަކަށް ބަދަލުކުރުމަށް ބޭނުންވާކަމުގައި އެބޭފުޅުން ފާހަގަކުރެއްވިއެވެ. މީގެ އިތުރުން ރަށުގައި އިތުރު ބަނދަރެއް ތަރައްގީކުރުމަށް ބޭނުންވާކަމަށާއި، ރަށުގައި ވަޒީފާގެ ފުރުސަތު ފަހިކޮށް ރަށުގެ އިޤްތިޞާދު ތަނަވަސްކުރުމަށް ޓުއަރިޒަމް ޞިނާޢަތް ފުޅާކުރުމަށް ޝައުގުވެރިކަން ފާޅުކުރައްވާ އެކަމުގައި ސަރުކާރުން އެހީތެރިވެދިނުމަށް ކައުންސިލުން ވަނީ ރައީސުލްޖުމްހޫރިއްޔާގެ ނާއިބުގެ އަރިހުގައި ދަންނަވާފައެވެ.
އެރަށުގެ ސިއްހީ މަރުކަޒަށް އެމްބިއުލާންސެއް ބޭނުންވާކަމަށާއި، ރަށުގެ ސްކޫލަށް ކުރިމަތިވެފައިވާ މުވައްޒަފުންގެ ދަތިކަމާއި، ވަސީލަތްތައް މަދުކަން ކައުންސިލުން ވަނީ ރައީސުލްޖުމްހޫރިއްޔާގެ ނާއިބާއި ހިއްސާކުރައްވާފައެވެ. މީގެ އިތުރުން ރަށުގެ ޒުވާނުން މަސްވެރިކަމުގެ ޞިނާޢަތަށް ޝައުގުވެރިވާކަން ފާޅުކުރައްވާކަން ފާހަގަކުރައްވައި, ރަށާ މާދުރުނޫން ހިސާބެއްގައި ކަނދުފައްޗެއް ބާއްވައިދިނުމަށް ކައުންސިލުން ވަނީ ނާއިބު ރައީސަށް ދަންނަވާފައެވެ.
މި ބައްދަލުކުރެއްވުމުގައި ނާއިބު ރައީސް ވަނީ ކާށިދޫ ކައުންސިލުން ފާހަގަކުރެއްވި ކަންކަން ހައްލުކުރުމުގައި ސަރުކާރުގެ ކަމާބެހޭ ފަރާތްތަކާއެކު މަޝްވަރާކުރައްވައިގެން މަސައްކަތް ކޮށްދެއްވާނެކަމަށާއި، ކައުންސިލުން ހުށަހެޅުއްވި ކަންކަމުގައި އެކަމާއި ގުޅޭ އިދާރާތަކާއި އިތުރަށް ވާހަކަދެއްކެވުމަށް ވިދާޅުވެފައެވެ.
