އިތުރު 165 މީހުން ކޮވިޑަށް ޕޮޒިޓިވް!
5،438 ސާމްޕަލްއެއް ޓެސްޓުކޮށްފައިވޭ
ކޮވިޑްއަށް ޓެސްޓު ކުރުމަށް ސާމްޕަލް ނެގުން
އިތުރު 165 މީހުން ކޮވިޑް-19އަށް އަލަށް ޕޮޒިޓިވްވެފައިވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
އެޗްޕީއޭއިން ބުނީ ހޯމަ ދުވަހުގެ އިރުއޮއްސި 6:00އިން އަންގާރަ ދުވަހުގެ އިރުއޮއްސި 6:00އާ ދެމެދު 5،438 ސާމްޕަލްއެއް ޓެސްޓުކޮށްފައިވާ ކަމަށެވެ. މި ސާމްޕަލްތަކުގެ ތެރެއިން ޕޮޒިޓިވްވެފައިވަނީ 165 މީހުން ކަމަށް އެޗްޕީއޭއިން ބުނެފައިވެއެވެ.
މީގެ ތެރޭގައި ހިމެނެނީ މާލެ ސަރަހައްދުން ކޮވިޑަށް ޕޮޒިޓިވްވި 51 މީހުންނާއި، އަތޮޅުތެރެއިން ޕޮޒިޓިވްވި 103 މީހުންނެވެ. މިއާއެކު މިހާތަނަށް ރާއްޖެއިން ކޮވިޑަށް ޕޮޒިޓިވްވި މީހުންގެ ޖުމްލަ 82،264 އަށް އަރާފައިވާކަމަށް އެޗްޕީއޭއިން ބުނެފައިވެއެވެ.
އެޗްޕީއޭއިން ބުނީ މިވަގުތު އެކްޓިވް ކޭހުގެ ގޮތުގައި 2،117 ކޭސް އެބަހުރި ކަމަށެވެ. މީގެ ތެރެއިން ހޮސްޕިޓަލުތަކުގައި އެޑްމިޓްކޮށްގެން ފަރުވާދެމުން ގެންދަނީ 16 މީހުންނަށް ކަމަށް އެޗްޕީއޭއިން ބުނެފައިވެއެވެ.
މީގެ އިތުރުން މިހާތަނަށް ބަލިން ފަސޭހަވެފައިވަނީ 79،907 މީހުން ކަމަށާއި، 227 މީހަކު ބަލީގައި ނިޔާވެފައިވާކަމަށް އެޗްޕީއޭއިން ވަނީ ބުނެފައެވެ.
