ކެފޭ އުސޫލުން މަސްތުވާތަކެތި ބޭނުންކުރާ ތަންތަނުގައި ފުލުހުން ޑިއުޓީ އަދާކުރަން ފަށައިފިއެވެ.
ފުލުހުން ބުނީ މާލޭގައި ކެފޭ އުސޫލުން މަސްތުވާތަކެތި ބޭނުންކުރާ ކަމަށް ފާހަގަ ކުރެވިފައިވާ ތަންތަނަށް މީހުން ވަނަ ނުދީ އެކަން ހުއްޓުވުމަށް ހޯމަ ދުވަހުގެ ހެނދުނު 7:00ން ފެށިގެން ފުލުހުން ޚާއްސަ އޮޕަރޭޝަނެއް ފަށާފައިވާ ކަމަށެވެ. އެގޮތުން އެފަދަ ތަންތާނގައި 24 ގަޑިއިރު ފުލުހުން ޑިއުޓީ ކުރަމުންދާނެ ކަމަށާއި، ކެފޭ އުސޫލުން މަސްތުވާތަކެތި ބޭނުން ކުރާ 25 ތަނެއްގެ ވެރިފަރާތަކަށް ގާނޫނީ އިންޒާރުދީފައިވާ ކަމަށެވެ.
އަދި އެފަދަ 8 މައްސަލައެއްގައި ދައުވާ ކުރުމަށް ޕީޖީއަށް ފޮނުވާފައިވާ އިރު، އިތުރު 4 މައްސަލައެއްގެ ތަހުގީގު ނިންމައި ޕްރޮސެކިއުޓް ކުރުމުގެ މަސައްކަތް ކުރަމުންދާ ކަމަށާއި, އަދި 1 ގޭގެ މައްސަލައިގައި ޕީޖީން ވެރިފަރާތަށް ދައުވާ ކުރުމަށް ކޯޓަށް ފޮނުވާފައިވާ ކަމަށް ފުލުހުން މައުލޫމާތުދެއެވެ.
ޕްރޮސެކިއުޓަރ ޖެނެރަލްގެ އޮފީހުން ބުނެފައިވަނީ މ. ބްރައިޓްފްލާވަރ ގޭގައި ކެފޭއުސޫލުން މަސްތުވާތަކެތި ވިއްކައި ވިޔަފާރިކުރާކަމަށް ތުހުމަތުކުރެވުނު މައްސަލާގައި, އެ ގޭގައި މީހުން މަސްތުވާތަކެތި ބޭނުންކޮށް، އެ ތަކެތީގެ ވިޔަފާރިކޮށް، އެ ތަކެތި ޕެޑްލް ކުރާކަމަށް ގަބޫލުކުރެވޭ ހާލަތު އޮވެ، ނުވަތަ އެގޮތަށް ގަބޫލުކުރާނެ ފުރުސަތު އޮވެ، އެކަން ހުއްދަކޮށްފައިވާ ކަމަށެވެ. އަދި މި މައްސަލައިގައި ދައުވާކޮށްފައިވަނީ މ. ބްރައިޓްފްލާވަރ ޙުސައިން ޔޫސުފްގެ މައްޗަށް ކަމަށެވެ.
މަސްތުވާތަކެއްޗާބެހޭ ގާނޫނުގެ 127 ވަނަ މާއްދާގެ (ހ)އާ ހަވާލާދީ، އެ މާއްދާގެ (ށ)ގެ ދަށުން، ގެއެއް ނުވަތަ އިމާރާތެއް ނުވަތަ ގެއަކުން ނުވަތަ އިމާރާތަކުން ބައެއް، ޖަދުވަލު 1ގައި ވާ މަސްތުވާއެއްޗެއް ނުވަތަ ޖަދުވަލު 2 ގައި ވާ މަސްތުވާއެއްޗެއް، ޓްރެފިކްކުރުމަށް ނުވަތަ ޕެޑެލްކުރުމަށް ނުވަތަ އުފެއްދުމަށް ނުވަތަ ނުވަތަ އެއިން ކަމެއް ކުރުމަށްކަން ގަބޫލުކުރެވޭ ހާލު، ނުވަތަ އެގޮތަށް ގަބޫލުކުރާނެ ފުރުސަތު އޮވެ، އެ ތަނެއްގެ ވެރިފަރާތުން ނުވަތަ އެތަނެއްގައި އުޅޭ ފަރާތުން ނުވަތަ އެ ތަނެއްގެ މަސްއޫލިއްޔަތު އުފުލާފަރާތުން ހުއްދަ ދިނުން ނުވަތަ ހުއްދަކުރުމުގެ ކުށުގެ ދައުވާ ކުރުމަށް 2 ސެޕްޓެންބަރު 2021 ދުވަހު ކްރިމިނަލް ކޯޓަށް ހުށަހަޅާފައިވާކަމަށެވެ.
މިއީ ކެފޭ އުސޫލުން މާލޭގައި މަސްތުވާތަކެތި ވިއްކާ މައްސަލައިގައި, މަސްތުވާތަކެއްޗާބެހޭ ގާނޫނުގެ ދަށުން ގޭގެ ވެރިފަރާތުގެ މައްޗަށް ދައުވާކުރެވުނު ފުރަތަމަ ފަހަރު ކަމަށް ޕީޖީން ބުނެއެވެ.
