ޕްރައިމަރީން އެމަނިކުފާނު ބައްޔެއް ނުވާނެ ކަމަށް އެމްޑީޕީގެ ރައީސް މުޙައްމަދު ނަޝީދު ވިދާޅުވެއްޖެއެވެެ.

މޭ 6ގެ ހަމަލާއަށްފަހު ފުރަތަމަ ފަހަރަށް ނޫސްވެރިންނާ ބައްދަލުކުރައްވައި ވާހަކަދައްކަވަމުން ރައީސް ނަޝީދު ވިދާޅުވީ، އެމަނިކުފާނަކީ މޮޅު ވުމަށް އިންތިޚާބުތަކުގައި ވާދަކުރައްވާ ބޭފުޅެއް ކަމަށެވެ.

ޕްރައިމަރީއާ ނުލައި ޓިކެޓް ދެވޭ އުސޫލެއް އެމްޑީޕީގައި ނޯންނަ ކަމަށާއި، މިފަހަރު ޕްރައިމަރީއާ ނުލައި ރައީސް އިބްރާހީމް މުޙައްމަދު ޞާލިޙަށް ޓިކެޓް ލިބިވަޑައިގަތީ, އެމްޑީޕީ ކޮންގްރެސްއިން ޚާއްސަ ހާލަތެއް ކަމަށް ކަަނޑައަޅައި ނިންމި ނިންމުމާ ގުޅިގެން ކަމަށެވެ.

2023ގައި ވެސް އެމްޑީޕީގެ ރިޔާސީ ޓިކެޓް ކަނޑައެޅިގެންދާނީ ޕްރައިމަރީއަކުންކަން ދޭހަވާ ގޮތަށް ރައީސް ނަޝީދު ވާހަކަފުޅު ދެއްކެވިއެވެ. އެމަނިކުފާނު ވިދާޅުވީ ކުރިއަށް އޮތް އެމްޑީޕީގެ ޤައުމީ މަޖިލީހުގެ އިންތިޚާބު ކާމިޔާބު ކުރެވޭނެކަމަށް ގަބޫލުފުޅު ކުރައްވާކަމަށެވެ. އަދި ތާއީދު ކުރައްވާނީވެސް ޤައުމީ މަޖިލީހުގައި ބަރުލަމާނީ ނިޒާމަށް ތާއީދު ކުރައްވާ ބޭފުޅުންނަށް ކަމަށެވެ. ވަކި ބަޔަކަށް ތާއީދު ކުރެއްވުމަކީ އެމަނިކުފާނުގެ އަމިއްލަފުޅު ކަމެއް ކަމަށާއި، އެމްޑީޕީގެ މެމްބަރެއްގެ ހައިސިއްޔަތުން އެ ޕާޓީގެ އަސާސީ ގަވާއިދުން އެމަނިކުފާނަށް އެ ފުރުސަތު އޮންނަ ކަމުގައި ވިދާޅުވިއެވެ. އަދި ވެރިކަން ހިންގުމަށް އެމްޑީޕީން އަބަދުވެސް އެދޭ ނިޒާމަަކީ ބަރުލަމާނީ ނިޒާމު ކަމަށް އެމަނިކުފާނު ވިދާޅުވިއެވެ.

ރައީސް ނަޝީދު ވިދާޅުވީ އެމަނިކުފާނުގެ އުންމީދަކީ, ނިޒާމާބެހޭގޮތުން އަންނަ އަހަރު ރައްޔިތުންގެ ފެންނަ ނުފެންނަ ވޯޓެއް ނެގުން ކަމަށާއި، އެ ޖާގަވެސް އެބައޮތް ކަމަށެވެ.

އެމްޑީޕީގެ ރިޔާސީ ޓިކެޓް އެޕާޓީގެ ޕާލަމެންޓަރީ ގްރޫޕްގެ ކުރީގެ ލީޑަރ، އަދި މިހާރުގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ދޭން ނިންމައިފައިވަނީ 2018ވަނަ އަހަރުގެ ޖޫން މަހު އއ. އުކުޅަހުގައި ކުރިއަށް ގެންދިޔަ އެމްޑީޕީގެ ކޮންގްރެސްގައެވެ. ރައީސް ޞާލިޙަށް ޓިކެޓްދޭން ހުށަހެޅި ހުށަހެޅުން ފާސްވީ ކޮންގްރެސްގައި ބައިވެރިވި 791 މެންބަރުންގެ އިއްތިފާޤުންނެވެ.