ކޮވިޑް-19ގެ ކޭސްތައް ފެނިގެން 23 ރަށެއް މޮނިޓަރިންއަށް ލާފައިވާކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.

އެޗްޕީއޭއިން އާންމުކޮށްފައިވާ މައުލޫމާތުގައި ވާގޮތުން މިވަގުތު މޮނިޓަރިންގައި އޮތީ ރ. ދުވާފަރު، އއ. ހިމަންދޫ، އދ. ހަންޏާމީދޫ، މ. މަޑުއްވަރި، ކ. ގާފަރު، ފުވައްމުލައް ސިޓީ، އދ. މަޑަވެލި، ލ. މުންޑޫ، ށ. މިލަންދޫ، އދ. މަހިބަދޫ، ވ. ތިނަދޫ، ށ. ކަނޑިތީމު، ހދ. ނޮޅިވަރަމް، މ. ވޭވަށް، ސ. ހިތަދޫ، ސ. މަރަދޫ، ސ. މަރަދޫފޭދޫ، ސ. ފޭދޫ، ހދ. ނޮޅިވަރަންފަރު، ރ. މަޑުއްވަރި، ސ. ހުޅުމީދޫ، ރ. ރަސްމާދޫ އަދި ގދ. ފަރެސްމާތޮޑާ އެވެ.

މޮނިޓަރިންއަށް ލާފައިވާ ރަށްރަށުގެ ތެރެއިން މޮނިޓަރިންގައި އޮންނަތާ އެންމެ ގިނަ ދުވަސްވީ ރ. ދުވާފަރު ކަމަށް އެޗްޕީއޭއިން ބުނެފައިވެއެވެ. ދުވާފަރު މޮނިޓަރިންގެ ހާލަތަށް ގެނެސްފައިވަނީ މެއި މަހު 25 ވަނަ ދުވަހުއެވެ. މި މަހުގެ ތެރޭގައި މޮނިޓަރިންއަށް ލާފައިވަނީ 4 ރަށެކެވެ. އެއީ ރ. މަޑުއްވަރީ، ސ. ހުޅުމީދޫ، ރ. ރަސްމާދޫ އަދި ގދ. ފަރެސްމާތޮޑާއެވެ.

މޮނިޓަރިންގެ ހާލަތަށް ރަށެއް ގެންނަނީ ބަލި ފެތުރިފައިވާ މިންވަރު ދެނެގަނެ ކޮންޓެކްޓް ޓްރޭސިންގެ މަސައްކަތް ކުރުމަށެވެ. މޮނިޓަރިންގެ ހާލަތުގައި އޮންނަ ރަށްރަށުގެ ކަންކަން އެޗްޕީއޭއިން ވަރަށް ގާތުން ބަލަމުންދެއެވެ. އަދި އެރަށެއްގެ ހާލަތު ރަނގަޅުވާ މިންވަރަށް ބަލައި، ރަށްތައް މޮނިޓަރިންއިން ނަގަމުންދެއެވެ.

ރާއްޖެއިން ފެންނަ ކޮވިޑް-19ގެ ކޭސްތަކުގެ އަދަދު މިހާރު ދަށްވި ނަމަވެސް މިދިޔަ މެއި މަހުގެ ތެރޭގައި ކޮވިޑް-19ގެ ހާލަތު ގޯސްވެ 73 ރަށެއް މޮނިޓަރިންގެ ހާލަތަށް ގެނެސްފައިވެއެވެ. އެދުވަސްވަރު މާލޭގެ އިތުރުން އަތޮޅުތެރޭގައި ކޮވިޑް-19ގެ ހާލަތު ގޯސްވާތީ ބަލި ކޮންޓްރޯލް ކުރުމަށް ގިނަ ފިޔަވަޅުތަކެއް އެޅިއެވެ. އެގޮތުން ބައެއް ރަށްރަށް މޮނިޓަރިންއަށް ލައި، ގިނަ ރަށްރަށުގައި ކާފިއު ހިންގިއެވެ.

ރާއްޖޭގައި ކޮވިޑްގެ ހާލަތު ރަނގަޅުވެ، ޚާއްސަކޮށް މާލެ ސަރަހައްދުގައި ކޮވިޑްގެ ހާލަތު ރަނގަޅުވުމާއެކު، އަޅާފައިވާ ގިނަ ފިޔަވަޅުތަކަށް މިހާރު ވަނީ ލުއި ދީފައެވެ. މިގޮތުން ވެކްސިންގެ ދެ ޑޯޒް ފުރިހަމަކޮށްފައިވާ މީހުންނަށް އަތޮޅުތެރެއަށް ދަތުރުކުރެވޭ ގޮތަށް މިހާރު ވަނީ ހުޅުވާލާފައެވެ.