ތާލިބާނުންގެ ކޮންޓްރޯލްގެ ދަށުގައިވާ ކާބުލްގައި، އަންހެން އެކްޓިވިސްޓުންތަކެއް ނުކުމެ ހަމަހަމަކަން ގާއިމް ކުރުމަށް ގޮވާލައި މުޒާހާރާކޮށްފިއެވެ.
ހުކުރު ދުވަހު ކުރިއަށް ގެންދިޔަ މި މުޒާހަރާ ބާއްވާފައިވަނީ ވިމަން ޕޮލިޓިކަލް ޕާޓިސިޕޭޝަން ނެޓްވޯކުންނެވެ. ނުރައްކާ އޮތް ނަމަވެސް މި ގްރޫޕުން ވަނީ ހުކުރު ދުވަހު ފިނޭންސް މިނިސްޓްރީގެ ކުރިމަތީގައި މުޒާހަރާކޮށްފައެވެ. އެމީހުން ގޮވަމުން ދިޔައީ ސަރުކާރުގައި އަންހެނުން ބައިވެރި ކުރުމަށާއި، ގާނޫނުއަސާސީއެއް އެކުލަވާލުމަށެވެ.
އާންމުވެފައިވާ ވީޑިއޯތަކުން ފެންނަ ގޮތުން މުޒާހަރާކުރަމުން ދިޔަ އަންހެނުންނާއި ތާލިބާންގެ ގާޑުންނާއި ދެމެދު ކުރިމަތިލުންތަކެއް ހިނގާފައިވެއެވެ. އަދި މުޒާހަރާ ފެށުމުގެ ކުރިން އެތަނުން ދިއުމަށް ފިރިހެނަކު ގޮވާ އަޑު އިވޭކަމަށް ވެސް މީޑިއާތުގައި ވަނީ ރިޕޯޓްކޮށްފައެވެ.
އެއްވި މީހުންގެ އަދަދު ނިސްބަތުން މަދުކަމަށް މީޑިއާތަކުން ރިޕޯޓްކޮށްފައިވާ އިރު، މުޒާހަރާގެ ބައިވެރިން ލައިވް ކުރި ވީޑިއޯތަކުން ފެންނަ ގޮތުގައި އެތަނުގައި ތިބީ މަދު އަދަދެއްގެ ބައެކެވެ. ނަމަވެސް މިއީ ތާލިބާނުންގެ ވެރިކަމުގައި ހަމަހަމަކަން ހޯދުމަށް ނުކުމެ ކުރި ޗެލެންޖެއްކަމަށް މީޑިއާތަކުގައި ބުނެފައިވެއެވެ.
ތާލިބާން ޖަމާއަތުން އަންނަނީ ސަރުކާރު އުފެއްދުމަށްޓަކައި އެ ޖަމާއަތުގެ އެތެރޭގައި މަޝްވަރާތަކެއް ކުރަމުންނެވެ. އަދި މަސައްކަތް ކުރާ އަންހެނުން ތިބެން ޖެހޭނީ ގޭގައި ކަމަށް ބުނެފައިވާ އިރު، ތާލިބާނުން ވަނީ އޮފީސްތަކުގައި މަސައްކަތް ކުރާ އަންހެނުން އެމީހުންގެ މަސައްކަތް ދޫކޮށް ދިއުމަށް ވެސް އަންގާފައެވެ.
އެހެންނަމަވެސް ތާލިބާނުންގެ ލީޑަރު ވަނީ މުޖްތަމައުގައި އަންހެނުން ބޮޑު ރޯލެއް އަދާކުރަނެކަމަށް ވިދާޅުވެ އަންހެނުންނަށް ތައުލީމް ހާސިލް ކުރުމުގެ ފުރުސަތުދޭނެކަމަށް ވިދާޅުވެފައެވެ. ނަމަވެސް އިސްލާމީ އުސޫލުތައް ކަމަށް ބުނެ އަންހެނުން އާންމުތަންތަނަށް ނުކުތުމާއި މަސައްކަތް ކުރުން ހުއްޓުވަފާނެކަމުގެ ބިރު ހީވެފައިވެއެވެ. މީގެ 20 އަހަރު ކުރިން ތާލިބާނުންގެ ބާރުގެ ދަށުގައި އަފްގާން އޮތް އިރު ވެސް އަމަލުކުރި ގޮތަށް އަމަލުކޮށްފާނެކަމުގެ ބިރު އާންމުންގެ ތެރޭގައި ފެތުރިފައިވެއެވެ.
