ރިހިވެލި ބީޗް ރިސޯޓު ހިންގުމުގެ ލައިސެންސް ޓޫރިޒަމް މިނިސްޓްރީން ބާތިލް ކޮށްފިއެވެ.

ޓޫރިޒަމް މިނިސްޓްރީން ބުނީ ސިވިލް ކޯޓުގެ އަމުރަށް ރިއާޔަތް ކުރުމަށްފަހު، 2 ސެޕްޓެންބަރު ވީ ބުރާސްފަތި ދުވަހު ރިހިވެލި ބީޗް ރިސޯޓުގެ ހިންގުމުގެ ލައިސަންސް ބާތިލް ކޮށްފައިވާ ކަމަށެވެ. ލައިސަންސް ބާތިލް ކޮށްފައިވަނީ އެރިސޯޓުގެ މައްސަލަތަކެއް ފެންމަތިވެފައިވަނިކޮށެވެ.

ރިހިވެލި ބީޗް ރިސޯޓު ހިންގުމުގެ ލައިސަންސް ބާތިލްކޮށްފައިވާއިރު، މާހަލް ޓުއަރސް ޕްރައިވެޓް ލިމިޓެޑުން ސަބްލީޒްކޮށްފައިވާ ރިހިވެލި ބީޗަށް އަރައި، މަސްލަހަތު ގެއްލޭފަދަ ކަމެއް ހިންގާފައި ނުވާނެކަމަށް އެ ކުންފުނީގެ 7 ހިއްސާދާރުން ބުނެފައިވެއެވެ. ކުންފުނީގެ ހިއްސާދާރުން ނެރުނު ނޫސްބަޔާނެއްގައި ބުނީ މުވައްޒަފުން އެ ރިސޯޓުން ބޭލުމަށް، ކުންފުނީގެ މެޖޯރިޓީ ހިއްސާދާރުން ކަމަށް ބުނެ ބަޔަކު އެ ރިސޯޓަށް އަރައި ހިންގި އަމަލު ހަރުކަށި އިބާރާތުން ކުށްވެރި ކުރާ ކަމަށެވެ. އަދި އެކަން ހިންގާފައިވަނީ ކުންފުނީގެ ހިއްސާދާރުންގެ ބައިވެރިވުން އޮވެގެން ނޫން ކަމަށާއި، ތަނުގެ މަސްލަހަތު ގެއްލޭފަދަ އެއްވެސް ކަމެއް ހިންގުމަކީ ހިއްސާދާރުންގެ ހައިސިއްޔަތުން އެއްވެސް ވަރަކަށް ތާއީދުކުރާ ކަމެއް ނޫންކަމަށެވެ.

މީގެ އިތުރުން ކުންފުނީގެ ހިއްސާތަަކަށް ބަދަލު ގެނެސްފައިވާ ގޮތާއި، ޑިރެކްޓަރުންގެ ބޯޑާމެދު ގާނޫނީ މައްސަލަތަކެއް އުފެދިފައިވާތީ އެ މައްސަލަތައް ޝަރުއީ ކޯޓުތަކުގައި ކުރިއަށްދާކަން ވަނީ ފާހަގަކޮށްފައެވެ. ރިހިވެލި ބީޗް ރިސޯޓުގެ އުމްރާނީ ހާލަތު ބަދަލުކޮށް، އެރަށް ފަތުރުވެރިންނަށް ހުޅުވާލުމުގެ މަސައްކަތް ކުރަމުންދާ ކަމަށް މާހަލް ޓުއަރސް ޕްރައިވެޓް ލިމިޓެޑުން ވަނީ ބުނެފައެވެ.

އެރިސޯޓުގެ ކުރީގެ މެނޭޖްމަންޓާއި މިހާރުގެ މެނޭޖްމަންޓާ ދެމެދު ޖެހުނު މައްސަލައަކާ ގުޅިގެން ހަމަނުޖެހުން ހިންގި މައްސަލައެއް ފެންމަތިވެފައިވާއިރު، މާހަލް ޓުއަރސްއިން ބުނީ 14 ސެޕްޓެމްބަރ 2020 ގައި އެ ކުންފުނިން ރިހިވެލި ބީޗް ރިސޯޓުގެ ސަބްލީޒް އެގްރީމެންޓް ބާތިލުކުރީ ރަނގަޅަށް ކަމަށް، 31 އޯގަސްޓް 2021ގައި ސިވިލް ކޯޓުގެ ނިންމާފައިވާ ކަމަށެވެ.

ރިހިވެލި ބީޗް ރިސޯޓު ސަބްލީޒް ކުރުމުގެ ގޮތުން "ސޭވް ދަ ޑްރީމް މޯލްޑިވްސް ޕްރައިވެޓް ލިމިޓެޑް" އާއެކު 8 މެއި 2018 ގައި އެކުންފުނިން ވި އެއްބަސްވުން ބާތިލުކުރި މައިގަނޑު އެއް ސަބަބަކީ އެއްބަސްވުމުގެ ދަށުން ދައްކަން ޖެހޭ ހެޑްލީޒް ރެންޓާއި ސަބްލީޒް ރެންޓު ނުދެއްކުން ކަމަށް މާހަލް ޓްއަރސްއިން ބުނެއެވެ.

މާހަލް ޓުއަރސްއިން ބުނީ ހެޑްލީޒް ރެންޓުގެ ގޮތުގައި 323،188.79 ޔޫއެސް ޑޮލަރު (ތިންލައްކަ ތޭވީސްހާސް އެއްސަތޭކަ އަށްޑިހަ އަށް ޔޫއެސް ޑޮލަރު ހަތްދިހަނުވަ ސެންޓް)، އަދި ސަބްލީޒް ރެންޓުގެ ގޮތުގައި 1،000،000.00 ޔޫއެސް ޑޮލަރު (އެއްމިލިޔަން ޔޫއެސް ޑޮލަރު) ނުދައްކާ ކަމަށެވެ.

ރަށުގެ ހެޑްލީޒް ރެންޓު ނުދެއްކުމުން މީރާއިން ތަކުރާރުކޮށް ނޯޓިސްދެމުން ގޮސް މިހާރު ރެޑް ނޯޓިސް ފޮނުވާފައިވާ ކަމަށް މާހަލް ޓުއަރސްއިން ބުނެއެވެ.

މާހަލް ޓުއަރސްއިން ބުނީ ކުލި ނުދެއްކުމުގެ އިތުރުން ސަބްލީޒް އެގްރީމެންޓް ބާތިލުކުރި ސަބަބުތަކުގެ ތެރޭގައި އެރަށް ވީރާނާވެ، އިމާރާތްތަކާއި ޖެޓީ ފަދަ ތަންތަން ވެއްޓޭ ހިސާބަށް ދިއުމާއި، ނަރުދަމާއާއި އަލިފާންނިވާ ނިޒާމާއި އިންޝުއަރެންސާއި ނުލައި ރަށް ހިންގުމާއި އަދި އެތަކެއް މަސްދުވަސް ވަންދެން ތަނުގެ މުވައްޒަފުންނަށް މުސާރަ ނުދިނުމާއި ރަށުގެ ތިމާވެއްޓަށް ނޭދެވޭ އަސަރުކުރާ ފަދަ ގިނަގުނަ ކަންތައްތައް ކުރުން ހިމެނޭ ކަމަށެވެ.

އެކުންފުނީގެ އަމާޒަކީ ވީހާވެސް އަވަހަށް ސަރުކާރުން ގަބޫލުކުރާ މިންގަނޑަށް ރިހިވެލި ބީޗް ރިސޯޓުގެ އުމްރާނީ ހާލަތު ބަދަލުކޮށް، ދައުލަތަށް ދައްކަންޖެހޭ ޓެކުހާއި ފީތައް ދައްކައި އެރަށް އަވަހަށް ފަތުރުވެރިންނަށް ހުޅުވާލުން ކަމަށް މާހަލް ޓުއަރސްއިން ބުނެއެވެ.