އދ. އަތޮޅުގެ އެއްރަށުން އަނެއް ރަށަށް ބަލިމީހުން ގެންދިއުމަށް ކުންފުންޏަކާއެކު އާސަންދައިން އެއްބަސްވުމެއްގައި ސޮއިކޮށްފި
3 ސެޕްޓެމްބަރު 2021 | ހުކުރު 02:35އެއްބަސްވުމުގައި ސޮއިކޮށްފައިވަނީ އެއް އަހަރުދުވަހުގެ މުއްދަތަށް
އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގެ ތެރެއިން
އދ. އަތޮޅުގެ އެއްރަށުން އަނެއް ރަށަށް ބަލިމީހުން ގެންދިއުމަށް އަމިއްލަ ފަރާތަކާއެކު އާސަންދައިން އެއްބަސްވުމެއްގައި ސޮއިކޮށްފިއެވެ.
އާސަންދަ ކުންފުނިން ބުނީ އދ. އަތޮޅުގެ އެއްރަށުން އަނެއް ރަށަށާއި މާލެއަށް، ބަލިމީހުން ގެންގޮސްދިނުމުގެ ޚިދުމަތް ފޯރުކޮށްދިނުމަށްޓަކައި، ސްޕީޑް ލޯންޗް ދަތުރުގެ ޚިދުމަތްދޭ ކުންފުންޏެއް ކަމަށްވާ އެޗް.އެމް.އެޗް.އައި ކޮމްޕެނީ ޕްރައިވެޓް ލިމިޓެޑާއެކު 2 ސެޕްޓެމްބަރ 2021 ވީ ބުރާސްފަތި ދުވަހު އެއްބަސްވުމެއްގައި ސޮއިކޮށްފައިވާ ކަމަށެވެ. އެއް އަހަރުދުވަހުގެ މުއްދަތަށް ވެވުނު މި އެއްބަސްވުމުގައި އާސަންދަ ކުންފުނީގެ ފަރާތުން ސޮއިކުރެއްވީ ކުންފުނީގެ ޑެޕިއުޓީ މެނޭޖިން ޑިރެކްޓަރ އިބްރާހީމް ރަޝީދެވެ. އަދި އެޗް.އެމް.އެޗް.އައި ކުންފުނީގެ ފަރާތުން ސޮއިކުރެއްވީ އެކުންފުނީގެ މެނޭޖިން ޑިރެކްޓަރ މޫސާ އިބްރާހީމެވެ.
މިއެއްބަސްވުމުގެ ދަށުން، ކުންފުނިން ކަނޑައަޅާ ކެޕޭސިޓީއެއްގެ ސްޕީޑް ލޯންޗެއްގެ ޚިދުމަތް ބަލިމީހާއަށް ލިބިގެންދާނެ ކަމަށާއި، ޚިދުމަތަށް އެދޭތާ ވަކިވަގުތެއްގެ ތެރޭގައި ދަތުރު ފެށިގެންދާނެ ކަމަށް އާސަންދައިން ބުންޏެވެ.
އާސަންދަ ކުންފުނިން އިތުރަށް ބުނީ އދ. އަތޮޅުގައި ފަށައިގަނެވުނު މި ޕްރޮޖެކްޓަކީ އަޖުމަބެލުމުގެ ގޮތުން ފެއްޓުނު ޕްރޮޖެކްޓަކަށްވާތީ، މިކަމުގެ ސަބަބުން ޚިދުމަތަށް އަންނަ ބަދަލުތައް އެކުންފުނިން ދިރާސާކޮށް، މިކަމުގެ ސަބަބުން ޚިދުމަތް އަވަސްވެ ޚިދުމަތުގެ ފެންވަރު ރަގަޅުވާކަމަށް ފާހަގަކުރެވިއްޖެނަމަ، މިޕްރޮޖެކްޓް އެހެން އަތޮޅުތަކަށް ފުޅާކުރުމަށް ވިސްނާ ކަަމަށެވެ.
