ކްރިމިނަލް ކޯޓުގައި ބްރާސްފަތި ދުވަހު ތާވަލުކޮށްފައިވާ, ޓެރަރިސްޓެއް ކަމަށް ބުނާ މުޙައްމަދު އަމީނުގެ ޝަރީއަތް އިދާރީ މައްސަލައަކާއި ގުޅިގެން ކެންސަލްކޮށްފިއެވެ.

ބުރާސްފަތި ދުވަހަށް ތާވަލުކޮށްފައިވަނީ އޭނާގެ މައްޗަށް އުފުލާފައިވާ 2 ދައުވާއާ ގުޅިގެން ހުށަހަޅާފައިވާ އިންޓެލިޖެންސް ރިޕޯޓާއި ގުޅޭގޮތުން ހެކި ނެގުމެވެ. މިދިޔަ މަހުގެ 27 ވަނަ ދުވަހު ވެސް ދައުލަތުން ހުށަހަޅާފައިވާ ހެކި ނެގުމަށް ތާވަލު ކުރި ނަމަވެސް، ދިފާއަށް އައު ވަކީލަކު ގުޅިފައިވާތީ އެ ދުވަހު ހެކި ބަސް ނެގުން މަޑު ޖައްސާލުމަށްފަހު ބުރާސްފަތި ދުވަހަށް އަލުން ޝަރީއަތް ތާވަލު ކުރިއެވެ.

އޮގަސްޓް މަހުގެ 27 ވަނަ ދުވަހު ކްރިމިނަލް ކޯޓުގައި ބާއްވާފައިވަނީ, ދައުލަތުން އަމީނާ ދެކޮޅަށް ހުށަހަޅާފައިވާ ހެކިންގެ ހެކިބަސް ނެގުމަށް ބޭއްވި އަޑުއެހުމެކެވެ. އެގޮތުން ދައުލަތުން ހުށަހަޅާފައިވާ އިންޓެލިޖެންސް ރިޕޯޓް ތައްޔާރު ކުރި ފަރާތުގެ ހެކިބަސް ނެގުމަށް ނިންމާފައިވީ ނަމަވެސް، ހެކިބަސް ނެގިފައެއް ނުވެއެވެ. އެއީ އަމީނުގެ ގާނޫނީ ވަކީލުންގެ ޓީމާ އައު ވަކީލަކު ގުޅިވަޑައިގަތުމުންނެވެ.

ޓެރަރިޒަމްގެ އަމަލެއް ކުރަން ރޭވުމުގެ ކުށުގެ ދައުވާއާއި ޓެރަރިސްޓު ޖަމާއަތެއްގައި ބައިވެރިވުމުގެ ކުށުގެ ދައުވާ އުފުލާފައިވާ އަމީނުގެ ޝަރީއަތުގެ އަޑުއެހުމެއް ބުރާސްފަތި ދުވަހު ބާއްވާފައިވާއިރު، މި އަޑު އެހުމުގައި އަމީން ވަނީ ޖަލުގައި އޭނާއާމެދު ތަފާތުކުރުން ގެންގުޅޭކަމަށް ބުނެފައެވެ.

ދައުލަތުން އެކަމަށް އިންކާރުކޮށްފައިވާއިރު، ދެފަރާތުގެ މި ވާހަކަތާއި ގުޅިގެން އަމީނުގެ މައްސަލަ ބައްލަވާ އިސް ގާޒީ އަޙުމަދު ޝަކީލް ވަނީ އެކަން އިތުރަށް ބައްލަވާނެކަމަށް ވިދާޅުވެފައެވެ.

އޮގަސްޓް 27ވަނަ ދުވަހުގެ އަޑު އެހުމުގައި ދައުލަތުން ހުށަހަޅާފައިވާ ހެކިތަކުގެ އިތުރުން އިންޓެލިޖެންސް ރިޕޯޓް ތައްޔާރުކުރި އޮފިސަރުގެ ހެކި ބަސް ނެގުމަށް ނިންމާފައިވީނަމަވެސް، އަމީނުގެ ވަކީލުންގެ ޓީމާ ގުޅިވަޑައިގެންނެވި އައު ގާނޫނީ ވަކީލު އެ ރިޕޯޓް ކިޔާލުމަށްފަހު ހެކިބަސް ނެގުމަށް އެދިވަޑައިގަތެވެ.

ދިފާއާ އަލަށް ގުޅިވަޑައިގެންފައިވަނީ ވަކީލު އިސްމާޢީލް ވިޝާމެވެ. އޭނާ ވިދާޅުވީ އެ ރިޕޯޓުފައި ވަރަށް ބޮޑެތި ކަންތައްތަކެއް އެބަހުރި ކަން ޓީމުގެ އެހެން ވަކީލުންގެ ފަރާތުން އެނގިފައިވާ އިރު، އަމީނުގެ މައްޗަށް އުފުލާފައިވާ ދެ ދައުވާއާއި ގުޅިގެން 50 އަހަރުގެ ޖަލު ހުކުމެއް އައުން އެކަށީގެންވާ ކަމަށެވެ. އެހެންކަމުން ހެކިބަސް ނެގުމުގެ ކުރިން ރިޕޯޓް ބަލާލަން ބޭނުންވާކަމަށް ވަކީލު ވިޝާމް ވަނީ ވިދާޅުވެފައެވެ.

މީގެ ކުރިންވެސް ސިއްރު ހެކިވެރިންގެ ހެކިބަސް އުނިކުރުމަށްފަހު, ކޯޓުގައި އެ ރިޕޯޓް ކިޔުމުގެ ފުރުސަތު ދިފާއީ ވަކީލުންނަށް ދީފައިވާކަން ފާހަގަ ކުރައްވައި, ދައުލަތުން ވަނީ ރިޕޯޓް އަލުން ބެލުމުގެ ފުރުސަތު ދިނުމަށް އުޒުރުވެރިވެފައެވެ.

ނަމަވެސް މައްސަލަ ބައްލަވާ އިސްގާޒީ އަޙުމަދު ޝަކީލް ވަނީ އެ ފުރުސަތު ދިފާއަށް ދިނުމަށް ނިންމަވާފައެވެ. އަދި އަންނަ މަހުގެ 2 ވަނަ ދުވަހު ހެކިބަސް ނަގާނެ ކަމަށް ގާޒީ ވިދާޅުވިއެވެ.

މި މައްސަލައިގައި މީގެ ކުރިން ބުދަ ދުވަހު ބޭއްވި އަޑުއެހުމުގައި, ދިފާއުން ހުށައަޅާފައިވާ ހެކި ބަލައިނުގަތުމަށް ޝަރީއަތުން ނިންމެވި ނިންމެވުން މުރާޖަޢާ ކޮށްދިނުން އެދި އަމީނުގެ ވަކީލުގެ ފަރާތުން ހުށައެޅުއްވިއެވެ. ދިފާއުން ވަނީ އަމީނުގެ މައްސަލައިގައި ދައުލަތުން ތަފާތުކުރުން ގެންގުޅޭކަމަށް ތުހުމަތުކޮށްފައެވެ. ދިފާއުން ވަނީ ޝަފަވީ 5 ހެއްކެއް ހުށައަޅަން ބޭނުންވާކަން ފާހަގަކޮށްފައެވެ.

އެކަމާ ގުޅޭގޮތުން ގާޒީ ޝަކީލު ވިދާޅުވީ، ދިފާއުން ހުށަހަޅާފައިވާ 5 ހެކިންނަކީ ވެސް އަމީން ދަންނަ މީހުން ކަމަށާއި، އޭނާގެ ދީނީ ފިކުރާއި އޭނާއާ ގުޅޭ ކަންކަން ދަންނަ މީހުންކަމަށްވާތީ, ހުށަހަޅާ ހެކިންކަން ދިފާއުން ފާހަގަކޮށްފައިވާ ކަމަށެވެ. އަދި ޝަރީއަތުން ބެލި ބެލުމުގައި މި ހާލަތުގައި ހެއްކެއް ހުށައެޅުމުގެ ފުރުސަތު ދޭނަމަ އެ ހެއްކަކީ ކުރިން ދިޔަ މަރުޙަލާތަކުގެ ފަހުން ވުޖޫދުވި ހެއްކަކަށް ވާން ޖެހޭނެކަމަށް ގަބޫލުކުރެއްވޭ ކަމަށެވެ. އެގޮތުން މި ހެކިންނަކީ ކުރިން ވެސް ތިބޭނެ ހެކިންކަމަށް ގާޒީ ޝަކީލު ވިދާޅުވިއެވެ. އަދި ކިތާބީ ހެކިތަކަކީ ވެސް ކުރިން ކޮށްފައިވާ މަސައްކަތްތަކާ ގުޅޭ ހެކިތަކެއްކަން ފާހަގަ ކުރައްވައި ގާޒީ ވިދާޅުވީ، އަލަށް ފާޅުވި އެއްވެސް ހެއްކެއް ނެތް ކަމަށެވެ. ވުމާއެކު އާންމު އުސޫލުން ބަލާއިރު މިއީ ކުރިން ހުށަހެޅެން އޮވެ، ހުށަހަޅާފައި ނުވާ ހެކިތަކަކަށްވާތީ މި ހެކިތައް ބަލައިގަތުމަށް އިޢުތިރާޒް ކުރައްވާކަމަށް ގާޒީ ޝަކީލު ވިދާޅުވިއެވެ.

މި މައްސަލައިގެ ޚުލާސާ ބަޔާން އަންނަ މަހު 29ގައި އިއްވައި، އޮކްޓޯބަރު މަހުގެ ފަހު ކޮޅު ނުވަތަ ނޮވެމްބަރު މަހުގެ ކުރީކޮޅު ހުކުމް އިއްވޭނެ ކަމަށް ވެސް އިސް ގާޒީ ވިދާޅުވިއެވެ.

އަމީނަކީ އެމެރިކާއިން ޓެރަރިސްޓުންގެ ގޮތުގައި ކަނޑައަޅާ މީހުންގެ ލިސްޓުގައި ހިމެނުނު ފުރަތަމަ ދިވެއްސެވެ. އަމީނަކީ ޓެރަރިސްޓެއް ކަމަށް ކަނޑައަޅައި، އެމެރިކާގެ ޑިޕާޓްމަންޓް އޮފް ދަ ޓްރެޒަރީޒް އޮފީސް އޮފް ފޮރިން އެފެއާޒް ކޮންޓްރޯލް (އޯއެފްއޭސީ)އިން އޭނާއަށް މާލީ ދަތިކުރުމުގެ ފިޔަވަޅު ވެސް އަޅާފައިވެއެވެ.