އިތުރު 330 މީހަކު ވެކްސިން ފުރިހަމަކޮށްފި
ރާއްޖޭގެ 85 އިންސައްތަ މީހުން ވަނީ ވެކްސިންގެ ފުރަތަމަ ޑޯޒް ޖަހާފައި
ރައީސުލްޖުމްހޫރިއްޔާގެ ނައިބު ކޮވިޑް ވެކްސިން ޖެއްސެވުން
ކޮވިޑް-19އިން ދިފާއުވުމަށް ޖަހާ ވެކްސިންގެ ދެވަނަ ޑޯޒް، އިތުރު 330 މީހަކު ޖަހާފައިވާކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ހާމަކޮށްފިއެވެ.
އެޗްޕީއޭއިން އާންމުކޮށްފައިވާ މައުލޫމާތުގައިވާގޮތުން އަންގާރަ ދުވަހު 1،154 މީހަކު ވަނީ ވެކްސިން ޖަހާފައެވެ. މީގެ ތެރޭގައި ހިމެނެނީ ވެކްސިންގެ ފުރަތަމަ ޑޯޒް ޖެހި 824 މީހަކާއި، ދެވަނަ ޑޯޒް ޖެހި 330 މީހުން ކަމަށް އެޗްޕީއޭއިން ބުނެއެވެ.
ވެކްސިންގެ ދެވަނަ ޑޯޒް ޖެހި 330 މީހުންގެ ތެރޭގައި ހިމެނެނީ މާލެ ސަރަހައްދުން ވެކްސިން ޖެހި 219 މީހުންނާއި، އަތޮޅުތެރެއިން ވެކްސިން ފުރިހަމަކުރި 111 މީހެކެވެ. މިއާއެކު ވެކްސިން ފުރިހަމަކުރި މީހުންގެ ޖުމްލަ ވަނީ 302،512 އަށް އަރާފައެވެ.
އަންގާރަ ދުވަހު ވެކްސިންގެ ފުރަތަމަ ޑޯޒް ޖެހި 824 މީހުންގެ ތެރޭގައި ހިމެނެނީ މާލެ ސަރަހައްދުން ވެކްސިން ޖެހި 357 މީހުންނާއި، އަތޮޅުތެރެއިން ވެކްސިންގެ ފުރަތަމަ ޑޯޒް ޖެހި 467 މީހުންނެވެ. މިއާއެކު މިހާތަނަށް ވެކްސިންގެ ފުރަތަމަ ޑޯޒް ޖަހާފައިވާ މީހުންގެ ޖުމްލަ ވަނީ 384،444 އަށް އަރާފައެވެ.
ރައީސް އޮފީހުން ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މަބްރޫކް އަޒީޒް ވަނީ ރާއްޖޭގެ އާބާދީގެ 85 އިންސައްތަ މީހުން ވެކްސިންގެ ފުރަތަމަ ޑޯޒް ޖަހާފައިވާކަން ހާމަކުރައްވާފައެވެ.
މަބްރޫކް ވިދާޅުވީ ވެކްސިން ޖެހޭ އާބާދީގެ ތެރެއިން 18 އަހަރުން މަތީގެ 30 ހާސް މީހުން ވެކްސިން ނުޖަހާ އެބަތިބި ކަމަށެވެ. މީގެ ތެރޭގައި ގިނަ މީހުންނަކީ ރާއްޖެއިން ބޭރުގައި ތިބި މީހުންނެވެ. އަދި އެނދުމަތިވެފައި ތިބި މީހުންނާއި، އެކިކަހަލަ އުނދަގޫތަކާއި ގުޅިގެން ވެކްސިން ނުޖަހާ މީހުން އެބަތިބި ކަމަށާއި، އެމީހުން ހޯދައި ވެކްސިން ޖެހުމުގެ މަސައްކަތް ކުރަމުންދާ ކަމަށް މަބްރޫކް ވިދާޅުވިއެވެ.
މީގެ އިތުރުން ވެކްސިންގެ ޑޯޒްތައް ފުރިހަމަ ކުރިތޯ ބެލުމަށް އެޕްލިކޭޝަނެއް ލޯންޗުކުރުމުގެ މަސައްކަތް ކުރަމުންދާ ކަމަށް ވެސް މަބްރޫކް ވިދާޅުވިއެވެ.
ވެކްސިން ފުރިހަމަނުކުރާ މީހުންނާއިމެދު ފިޔަވަޅު އަޅަން ސަރުކާރުން ނިންމާފައިވާއިރު، މިހާރުވެސް ވަނީ ވެކްސިން ނުޖަހާ މީހުންނަށް އެތެރޭގެ އުދުހުންތަކުން ދަތުރުނުކުރެވޭގޮތަށް ނިންމާފައެވެ. ވެކްސިންގެ އެއްވެސް ޑޯޒްއެއް ނުޖަހާ މީހުންނަށް ކެފޭ ރެސްޓޯރަންޓްތަކުގެ އެތެރޭގައި ޚިދުމަތް ދިނުން މަނާކުރުމަށް ނިންމާފައިވީނަމަވެސް އެ މީހުންނަށް ޓޭކްއަވޭގެ ޚިދުމަތް ލިބޭނެ ކަމަށް ސަރުކާރުން ވަނީ މީގެ ކުރިން ހާމަކޮށްފައެވެ.
