އަފްޣާން ރައްޔިތުންގެ އިންސާނީ ހައްގުތައް ރައްކާތެރިކޮށްދިނުމަށް އެޗްއާރުސީއެމްއިން އެދިއްޖެ
އަފްޣާން ރައްޔިތުންގެ އިންސާނީ ހައްގުތައް ވަނީ ގެއްލިފައި
އަފްޣާނިސްތާނުގެ ކާބުލް އެއަރޕޯޓު
އަފްޣާނިސްތާނުގެ ހާލަތާ ގުޅިގެން ކަންބޮޑުވުންފާޅުކޮށް އިންސާނީ ހައްގުތައް ކަށަވަރުކުރުމަށް ދިވެހި ސަރުކާރުން މަސައްކަތް ކޮށްދެއްވުމަށް ހިއުމަންރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް)އިން އެދިއްޖެއެވެ.
އަފްޣާނިސްތާނުގެ ހާލަތާގުޅިހެން އެޗްއާރުސީއެމުން ނެރުނު ބަޔާނެއްގައި ވަނީ އަފްޣާނިސްތާނާއި ދިވެހިރާއްޖެއަކީވެސް އޭޝިއާ ޕެސިފިކް ފޯރަމްގެ މެންބަރުންނަށް ވާއިރު އަފްޣާނިސްތާނަށް މިވަގުތު ދިމާވެފައިވާ ޙައްސާސީ ހާލަތުގައި، ޠާލިބާނުން އަމަލުކޮށްފާނެ ގޮތަކާމެދު އޭޕީއެފްއިން ކަންބޮޑުވުން ފާޅުކޮށްފައިވާ ކަމަށެވެ.
އެހެންކަމުން އަފްޣާނިސްތާނުގެ އިންސާނީ ހައްގުތަކާބެހޭ މުއައްސަސާތަކުގެ މުވައްޒަފުންނާއި އެމީހުންގެ އާއިލާތަކާއި, އެ ގައުމުގެ ކުޑަކުދިންނާއި, އަންހެނުންނާއި, އާންމު ރައްޔިތުންގެ އިތުރަށް އެގައުމުގައި ދިރިއުޅެމުންދާ އެންމެހައި ދިވެހި ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށް ދިވެހި ސަރުކާރުން ކޮށްދެވެންހުރި އެންމެހައި މަސައްކަތްތަކެއް ކޮށްދެއްވައި، އިންސާނީ ހައްގުތައް ނަގަހައްޓައި ރައްކާތެރިކުރުމަށް މަސައްކަތްކޮށްދެއްވުމަށް ސަރުކާރުގައި އެދިފައިވާނެ ކަމަށެވެ.
މިކަންކަން ކޮށްދެއްވުމަށް އެ ކޮމިޝަނުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި، ފޮރިން މިނިސްޓަރ ޢަބްދުﷲ ޝާހިދުގެ އަރިހުގައި ސިޓީއަކުން އެދިފައިވާނެ ކަމަށް އެޗްއާރުސީއެމުން ބުނެފައިވެއެވެ.
މި ސިޓީގައި އަފްޣާނިސްތާނުގެ މިވަގުތުގެ ހާލަތާގުޅިގެން ކޮމިޝަނުގެ ގިނަ ކަންބޮޑުވުންތަކެއް ހުރިކަން ފާހަގަކޮށްފައިވާ ކަމަށާއި، އެގައުމުގެ ހާލަތާ ގުޅިގެން ދިވެހި ސަރުކާރުގެ ފަރާތުން އިންސާނީ ހައްގުތައް ރައްކާތެރިކޮށް ކުރިއެރުވުމަށް ކުރައްވާ މަސައްކަތްތަކުގައި ވެދެވެންއޮތް އެހީތެރިކަމާއި ފުރިހަމައެއްބާރުލުން ފޯރުކޮށް, ކޮމިޝަނުން ސަރުކާރާއެކު ތިބިކަން ވަނީ ހާމަކޮށްފައެވެ.
އަފްޣާނިސްތާނުގެ ހާލަތު ދަނީ ދުވަހަކަށްވުރެ ދުވަހެއް ގޯސްވަމުންނެވެ. އަދިވެސް އަފްޣާނިސްތާނުން ބޭރުވާން ގިނަ ބަޔަކު ގެންދަނީ މަސައްކަތްކުރަމުންނެވެ.
