އެމްޓީސީސީގެ ޚާއްސަ ހޮޓްލައިން 1650 ތަޢާރަފުކޮށްފި

މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ން ރައްޔިތުންނަށް ފޯރުކޮށްދެމުންދާ ޚިދުމަތްތައް ފުޅާކޮށް ހިލޭ ގުޅޭ ގޮތް ހަމަޖައްސައިފިއެވެ.

އާދިއްތަ ދުވަހު ހޮޓެލް ޖެންގައި ބޭއްވި ޚާއްސަ ރަސްމިއްޔާތެއްގައި އެމްޓީސީސީގެ ޚާއްސަ ހޮޓްލައިން 1650 އިފްތިތާޙުކޮށްދެއްވީ އެމްޓީސީސީގެ ސީއީއޯ އާދަމް ޢާޒިމެވެ.

މިހޮޓްލައިން އިފްތިތާޙު ކޮށްދެއްވައި ޢާޒިމް ވިދާޅުވީ, އެމްޓީސީސީން ވަރަށް ގިނަ ޚިދުމަތްތައް އާންމު ރައްޔިތުންނަށް ފޯރުކޮށްދެމުންދާ ކަމަށެވެ. އަދި ހިލޭ ގުޅޭ ހޮޓްލައިނާއެކު ރައްޔިތުންގެ ސުވާލުތަކަށް ވީހާވެސް އަވަސް ފުރުސަތެއްގެ ތެރޭގައި ޖަވާބު ދެވޭނެ ކަމަށް ޢާޒިމް ވިދާޅުވިއެވެ. އަދި އެމްޓީސީސީގެ ވަކިވަކި ނަންބަރުތަކަށް ގުޅައިގެން, އުފެދޭ ސުވާލުތަކަށް ޖަވާބު ހޯދުމުގެ ބަދަލުގައި, އެއް ނަންބަރަކުން ހުރިހާ ބާވަތެއްގެ ސުވާލުތަކަކަށް ޖަވާބު ލިބޭނެ ކަމަށް އޭނާ ވިދާޅުވިއެވެ.

ޢާޒިމް ވިދާޅުވީ އެމްޓީސީސީގެ ހުރިހާ ޑިވިޜަންތަކާ ގުޅުންހުރި ސުވާލުތަކަށް މިހޮޓްލައިން މެދުވެރިކޮށް ޖަވާބު ހޯދޭނެ ކަމަށެވެ. އޭގެތެރޭގައި ޓްރޭޑިންގ، ޓްރާންސްޕޯޓް، ވަޒީފާއާއި ގުޅުންހުރި ސުވާލު، އިންޖިނިއަރިންގ އަދި ޑޮކިންގ ޚިދުމަތް، ޕްރޮކިއުމަންޓް، ފިނޭންސް، ހިއްސާ، އެޑްމިން އަދި އެމްޓީސީސީން ހިންގާ އެކިއެކި މަޝްރޫޢުތަކާ ގުޅުންހުރި ސުވާލުތައް ހިމެނޭކަން އޭނާ ފާހަގަކުރެއްވިއެވެ.

އެމްޓީސީސީން އާއްމުކޮށްފައިވާ ތަފާސް ހިސާބުތަކަށް ބަލާއިރު މަހެއްގެ މައްޗަށް 2055 ކޯލް އެކިއެކި ކަންކަމުގައި އައިސްފައިވެއެވެ. އެއީ އެވްރެޖްކޮށް ދުވާލެއްގެ މައްޗަށް 114 ކޯލެވެ. މީގެތެރެއިން އެންމެ ގިނައިން އާންމުން ގުޅާފައިވަނީ "ކަށަވަރު ޝޯރޫމް"ގެ ވިޔަފާރިއާބެހޭ ކަންކަން އޮޅުންފިލުވުމަށް ކަމަށާއި، ވިޔަފާރީގެ ދާއިރާއިން އެކަނި މަހެއްގެ މައްޗަށް 1233 ކޯލު އައިސްފައިވާކަމަށް އެމްޓީސީސީން ބުނެއެވެ.

މި ހޮޓްލައިނަށް އަންނަ ކޯލުތައް އެހެން ޑިވިޒަން އަކަށް ނުވަތަ އެހެން ފަރާތަކަށް ޕާސްއެއް ނުކުރާނެ އެވެ. "ކޯލްބެކް" ޚިދުމަތް ލިބި، ކޯލެއް މިސްވެއްޖެއްޔާ އެ ކަސްޓަމަރަކަށް އެމްޓީސީސީން ގުޅާނެ އެވެ. ހޮޓްލައިންގެ ޚިދުމަތް ދޭނީ އެކުންފުނީގެ ކޯލް ސެންޓަރ މުވައްޒަފުންނެވެ. އެމުވައްޒަފުންނަކީ ކަސްޓަމަރުންނަށް ޚިދުމަތް ދިނުމާގުޅޭ ޚާއްސަ ތަމްރީން ހަދާފައިވާ މުވައްޒަފުންނެވެ.