އައްޑޫގެ ގުޅިފައި އޮތް 4 އަވަށް މޮނިޓަރިންގއަށް ލުމާއެކު އައްޑޫ ސިޓީ ކައުންސިލުން އެސިޓީގައި ޚާއްސަ ފިޔަވަޅުތަކެއް އަޅައިފިއެވެ.

އައްޑޫގެ ހަތަރު އަވަށް ކަމަށްވާ ހިތަދޫ، މަރަދޫ، މަރަދޫފޭދޫ އަދި ފޭދޫ މޮނިޓަރިންގއަށް ލާފައި ވަނީ އޮގަސްޓު 28ވަނަ ދުވަހުއެވެ.

އެގޮތުން މި ހަތަރު އަވަށުގައި, އާއްމުކޮށް ބާއްވާ އެއްވުންތަކާއި ޕާޓީތައް ބޭއްވުން ދެ ހަފްތާއަށް ވަނީ މެދުކަޑާލާފައެވެ. މި އަވަށްތަކުގެ ސްކޫލްތައް ދެ ހަފުތާއަށް ބަންދުކޮށްފައިވާއިރު، މިނިސްޓްރީ އޮފް އެޑިއުކޭޝަނުން އަންގާ ގޮތެއްގެމަތިން ގްރޭޑް 9 އަކުން މަތީގެ ގްރޭޑްތަކުގެ ކިޔެވުން, ރައްކާތެރިކަމުގެ ފިޔަވަޅުތަކާއެކު ކުރިއަށްގެންދިއުމަށް ވަނީ ނިންމާފައެވެ.

އޭގެ އިތުރުން އޮގަސްޓް 29ވަނަ ދުވަހުގެ ރޭގަނޑު 9:00ން ފެށިގެން ފަތިހު 4:00ގެ ނިޔަލަށް، ކާފިއު ވަގުތު ކަމުގައިހަމަޖައްސައި، މިވަގުތު ތަކުގައި ބޭރަށް ނިކުތުން ވަނީ މަނާކޮށްފައެވެ. އަދި ކޮންމެހެން ބޭރަށް ދާންޖެހޭނަމަ އައްޑޫ އީ.އޯ.ސީގެ ހުއްދައާއެކު ބޭރަށް ދެވޭނެ ކަމަށް ކައުންސިލުން ބުނެއެވެ.

މޮނިޓަރިންގއަށް ލެވުނު ހަތަރު އަވަށުގެ ގާޑިޔާ، ހޮޓާ/ކެފޭ/ރެސްޓޯރެންޓް ފަދަ ކާބޯތަކެތީގެ ޚިދުމަތްދޭ ތަންތަނުން ރޭގަނޑު 9:00ގެ ނިޔަލަށް ހުޅުވައިގެން ޚިދުމަތްދިނުމާއި، އަދި 10:00އާ ހަމައަށް, މިދެންނެވުނު ތަންތަނުން ޑެލިވަރީގެ ޚިދުމަތް ދެވޭނެ ކަމަށްވެސް ކައުންސިލުން ބުނެއެވެ. ކައުންސިލުން ބުނީ ފިހާރަތަކުން ހުޅުވައިގެން ޚިދުމަތްދެވޭނީ ރޭގަނޑު 9:00ގެ ނިޔަލަށް ކަމަށެވެ. އަދި 10:00ގެ ނިޔަލަށް ޑެލިވަރީގެ ޚިދުމަތްދެވޭނެ ކަމަށެވެ.

ކައުންސިލުން ވަނީ އޮގަސްޓް 30ވަނަ ދުވަހުން ފެށިގެން އައްޑޫ ސިޓީން ފުރާ އެންމެންގެ ޕީ.ސީ.އާރް ނެގެޓިވް ނަތީޖާއަކާއެކު ފުރުމުގެ ހުއްދަ ދިނުމާއި, ޒަރޫރީ ބޭނުމަށް ދަތުރުކުރާ އެންމެހައި ފަރާތްތައް އެޅިފައިވާ ފިޔަވަޅުތަކާ އެއްގޮތަށް އަމަލުކުރުމަށް ހެލްތު ޕްރޮޓެކްޝަން އެޖެންސީން އަންގާފައިވާ އެންގުން ތަކުރާރުކޮށްފައެވެ. މޮނިޓަރިންގ ހާލަތުގައި އައްޑޫއިން ދަތުރުކުރެވޭނީ އައްޑޫ އީ،އީ.އޯ.ސީގެ ހުއްދަ ލިބިގެން ކަމަށާއި މިއެންގުންތަކަކީ ހުރިހާ ރައްޔިތުންގެ ސަލާމަތާއި ރައްކާތެރިކަމަށްޓަކައި އަންގާ އެންގުންތަކެއް ކަމަށް ކައުންސިލުން ވަނީ ފާހަގަކޮށްފައެވެ.

އައްޑޫގެ ހަތަރު އަވަށް ނުވަތަ ރަށާއެކު ޖުމުލަ 9 ރަށެއް އޮގަސްޓު 28 ވަނަ ދުވަހު ވަނީ މޮނިޓަރިންގއަށް ލައިފައެވެ.