މޭ 6 ގެ ހަމަލާގައި ރައީސް ނަޝީދަށް ލިބިވަޑައިގެންނެވި ޒަޚަމްތަކަށް ޖަރުމަންވިލާތުގައި ފަރުވާ ހޯއްދެވުމަށް ފަހު މިހާރު އިނގިރޭސިވިލާތުގައި ހުންނެވިއިރު، އެމަނިކުފާނަށް ބޭނުންވާ ހުރިހާ ޚަރަދެއް މިހާރުވެސް ދައުލަތުން ދަނީ ކުރަމުންނެވެ.
ރައީސް ނަޝީދު ސެޕްޓެމްބަރު މަހު މާލެ ވަޑައިގަންނަވާނެކަމަށް އެމަނިކުފާނު ވެސް އަދި އެމަނިކުފާނުގެ އާއިލާއިން ވެސް ވިދާޅުވެފައި ވަނިކޮށް، އެމްޑީޕީގެ ޗެއަރ ޕަރސަން ޙަސަން ލަޠީފް ވަނީ އިންކުއަރީގެ ރިކޮމެންޑޭޝަނަށް އަމަލުކުރަން ރާވާފައިވާގޮތް އެނގުމުން ނޫނީ، އެމަނިކުފާނު މާލެ ވަޑައިގަތުމަކީ އެދެވޭ, އަދި ރުހެވޭ ކަމެއް ވެސް ނޫން ކަމަށް ވިދާޅުވެފައެވެ. އެގޮތުން އެމްޑީޕީގެ ޗެއަރ ދެކެވަޑައިގަންނަވާ ގޮތް އެއީ އަބަދުވެސް އެމަނިކުފާނު ވިސްނަވާނެ ކަމެއްކަމަށް ވިދާޅުވެ، ރައީސް ނަޝީދުވެސް ވަނީ އެމަނިކުފާނުގެ ޗުއްޓީގެ މުއްދަތު އިތުރު ކޮށްދިނުމަށް މަޖިލީހުގަައިވެސް އެދިވަޑައިގަންނަވާފައެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި އެމަނިކުފާނު އެދިވަޑައިގަންނަވާ ޚަރަދުތައް މިހާރުވެސް ދައުލަތުން ގެންދަނީ ފޯރުކޮށްދެމުންނެވެ. އެގޮތުން މިހާތަނަށްވެސް އެމަނިކުފާނަށް ދައުލަތުން ބޮޑު ޚަރަދުތަކެއް ކޮށްފައިވާކަން ރާއްޖެއެމްވީއަށް ވަނީ މައުލޫމާތު ލިބިފައެވެ.
އެކަމާ ގުޅޭގޮތުން ސަރުކާރުގެ ބަހެއް ހޯދާލަން މަސައްކަތް ކުރުމުން ސަރުކާރުން ވަނީ މަޖިލީހުގެ ރައީސްގެ ހައިސިއްޔަތުންނާއި، ކުރިން ރައީސްކަން ކުރައްވާފައިވާ ބޭފުޅެއްގެ ހައިސިއްޔަތުން އެމަނިކުފާނުގެ ސިއްހީ ކަންކަމަށް ދައުލަތުން ކުރަންޖެހޭ ޚަރަދުތައް ކުރާނެ ކަމަށް ބުނެފައެވެ.
ރައްޔިތުންގެ މަޖިލީހުގެ ޖަލްސާގައި އެމަނިކުފާނު ފޮނުއްވާފައިވާ ސިޓީއެއްވެސް ވަނީ އިއްވާފައެވެ. ސިޓީގައި އެމަނިކުފާނު ވިދާޅުވީ 6 މެއިގައި އެމަނިކުފާނަށް ދިން ހަމަލާ ރާވައި ހިންގި ފަރާތްތަކުގެ ތަހުގީގު އަދި ނުނިމި ކުރިއަށްދާކަމަށް ދިވެހި ފުލުހުންގެ ޚިދުމަތުން ބުނެފައިވުމާއެކު އެ ތަހުގީގު ނިމި، އެކަންރާވައި ހިންގި ފަރާތްތައް އިންސާފުގެ ކުރިމައްޗަށް ގެނެވި، ހައްޔަރުކޮށްފައި ބޭތިއްބުމުގެ ކުރީގައި އެމަނިކުފާނު ރާއްޖެ ވަޑައިގަތުމަކީ އެމަނިކުފާނުގެ އާއިލާއާއި ހެޔޮއެދޭ އެތައް ބަޔަކާއި އަދި އެމަނިކުފާނު ވެސް ޖެހިލުންވެވަޑައިގަންނަވާ ކަމެއް ކަމަށެވެ.
