އައްޑޫ ސިޓީގައި މިވަގުތު 169 އެކްޓިވް ކޭސް ހިމެނޭ ކަމަށް އައްޑޫ އިކުއެޓޯރިއަލް ހޮސްޕިޓަލުން ބުނެފިއެވެ.

އައްޑޫ އިކުއެޓޯރިއަލް ހޮސްޕިޓަލުން އެންމެ ފަހުން އާންމުކުރި މައުލޫމާތުތަކުން ދައްކާގޮތުގައި ބުދަ ދުވަހު އިތުރު 12 މީހަކު ވަނީ އައްޑޫން ކޮވިޑަށް ޕޮޒިޓިވްވެފައެވެ.

މިވަގުތު 169 އެކްޓިވް ކޭސް ހިމެނޭއިރު، މީގެ ތެރޭގައި ހިމެނެނީ ހިތަދޫން 23 ކޭހާއި، މަރަދޫން 92 ކޭސް، މަރަދޫފޭދޫން 37 ކޭސް، ފޭދޫން 16 ކޭސް، ހުޅުދޫން އެއް ކޭސް ކަމަށް އައްޑޫ އިކުއެޓޯރިއަލް ހޮސްޕިޓަލުން ބުނެފައިވެއެވެ. އައްޑޫ އިކުއެޓޯރިއަލް ހޮސްޕިޓަލުން ބުނީ އެ ސިޓީގައި މިވަގުތު އޮތް އެކްޓިވް ކޭސްތަކުގެ ޑައިރެކްޓު ކޮންޓެކްޓުންގެ ގޮތުގައި 497 މީހަކު ފާހަގަކުރެވިފައިވާކަމަށެވެ.

މިއާއެކު މިހާތަނަށް އައްޑޫން ކޮވިޑަށް ޕޮޒިޓިވްވި މީހުންގެ ޖުމްލަ 784 އަށް އަރާފައިވާކަމަށް އެ ހޮސްޕިޓަލުން ބުނެފައިވެއެވެ. އަދި މިހާތަނަށް ބަލިން ފަސޭހަވީ 612 މީހުން ކަމަށް އައްޑޫ އިކުއެޓޯރިއަލް ހޮސްޕިޓަލުން ހާމަކޮށްފައިވެއެވެ. އަދި 3 މީހަކު ވަނީ ބަލީގައި ނިޔާވެފައެވެ.

އައްޑޫން ފެންނަ ކޮވިޑް-19ގެ ކޭސްތައް އަނެއްކާވެސް އިތުރުވާން ފަށާފައިވާއިރު އައްޑޫގައި ބަލި ކޮންޓްރޯލްކުރުމަށް މިހާތަނަށް އިތުރު ފިޔަވަޅުތަކެއް އަޅާފައެއް ނުވެއެވެ. ކޮވިޑް ކޮންޓްރޯލްކުރުމަށް އައްޑޫގައި އަޅާފައިވާ ބައެއް ފިޔަވަޅުތަކަށް މިދިޔަ ޖުލައި މަހުން ފެށިގެން ލުއި ދޭން ވަނީ ފަށާފައެވެ. އެއާއެކު އައްޑޫގައި ބަލި ފެތުރޭ މިންވަރު އަނެއްކާވެސް ވަނީ އިތުރުވާން ފަށާފައެވެ.