ބުދަ ދުވަހުގެރޭ ބޭއްވުމަށް ތާވަލުކުރި ގައުމީ މަޖިލީހުގެ ޖަލްސާ ފަސްކޮށްފިއެވެ.

މި ޖަލްސާ ފަސްކޮށްފައިވަނީ ބުދަ ދުވަހުގެރޭގެ ޖަލްސާއަށް ތާވަލުކޮށްފައިވާ ފަނޑިޔާރުންގެ މަޖިލީހަށް މެމްބަރުން ހޮވުމަށް ވޯޓު ނެގުމުގެ ކުރިން އިތުރު ވަގުތު ބޭނުންވާ ކަމަށް ބައެއް މެމްބަރުން ވިދާޅުވުމުންނެވެ. ބުދަ ދުވަހުގެރޭ ބޭއްވުމަށް ހަމަޖެހިފަައި އޮތް, ގައުމީ މަޖިލީހުގެ 184ވަނަ ޖަލްސާއަށް ތާވަލް ކޮށްފައި އޮތީ 2 ކަމެކެވެ. އެއީ ފަނޑިޔާރުންގެ މަޖިލީހަށް މެމްބަރުން ހޮވުމާއި، މޭ6 ކޮމިޓީން މައުލޫމާތު ހިއްސާ ކުރުމެވެ.

އެމްޑީޕީ ގައުމީ މަޖިލީހުގެ ބައްދަލުވުން މިފަހަކަށް އައިސް ކޮންމެ ހަފުތާއަކު ބާއްވަމުން އަންނައިރު، މި ބައްދަލުވުންތަކަކީ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދަށް ދިން ހަމަލާގެ ތަހުގީގު ކުރިޔަށްދާގޮތް ބެލުމަށް އުފެއްދި "މޭ ހައެއް" ކޮމެޓީގެ ހޯދުންތަކުގެ މައުލޫމާތު ގައުމީ މަޖިލީހާ ހިއްސާކުރުމަށް ބާއްވަމުން ގެންދާ ބައްދަލުވުންތަކެކެވެ.

މޭ6 ކޮމިޓީން އަންނަނީ ރައީސް ނަޝީދަށް ދިން ހަމަލާއާ ގުޅިގެން ސަރުކާރުގެ އެކި އިދާރާތަކާ ބައްދަލުކޮށް ހަމަލާގެ މައުލޫމާތު ހޯދަމުންނެވެ. އެ މައުލޫމާތުތައް ގައުމީ މަޖިލީހުގެ ޖަލްސާ ތަކުގައި އެ ކޮމިޓީން އަންނަނީ މެމްބަރުންނާ ހިއްސާ ކުރަމުންނެވެ. އަދި އެކަމާ ގުޅޭ ގޮތުން މެމްބަރުންގެ ޚިޔާލު ހުށަހެޅުމަށްވެސް ވަނީ ފުރުސަތު ހުޅުވާލައެވެ.

ގައުމީ މަޖިލީހުގެ ޖަލްސާތައް މިހާރު ބާއްވަމުން އަންނަނީ، އޮންލައިން ކޮށެވެ.