ޠާލިބާނުންގެ އިންޒާރު އަނެއްކާވެސް އެމެރިކާއަށް

މީހުން ގެންދިޔުމަށް ދީފައިވާ މުއްދަތު އިތުރު ނުކުރެވޭނެކަމަށް ބުނެ ޠާލިބާނުން އަނެއްކާވެސް އެމެރިކާއަށް އިންޒާރު ދީފިއެވެ.

ޠާލިބާން ޖަމާއަތުން ބޭއްވި ނޫސްވެރިންގެ ބައްދަލުވުމުގައި އެ ޖަމާޢަތުގެ ތަރުޖަމާނު ޒަބިީޙުﷲ މުޖާހިދު ވިދާޅުވީ، ކާބުލް އެއަރޕޯޓުގައި ތިބި އަފްޣާންގެ ރައްޔިތުން ގެންދިޔުމަށް ދީފައިވާ މުއްދަތު އިތުރު ނުކުރެވޭނެ ކަމަށެވެ. ޔޫރަޕިއަން ޔޫނިއަނުން ބުނެފައިވަނީ، މީހުން ގެންދިޔުމަށް ދީފައިވާ މުއްދަތުގައި އެކަން ކުރުމަށް ދަތި ކަމަށެވެ.

މީހުން ގެންދިޔުމަށް ޠާލިބާނުން މުއްދަތު ދީފައިވަނީ، މިމަހުގެ 31ގެ ނިޔަލަށެވެ.

މުޖާހިދު ވިދާޅުވީ، މަސްރަޙު ހަމައަކަށް އެޅެންދެން ސަރުކާރުގައި މަސައްކަތް ކުރަމުން އަންނަ އަންހެނުން ގޭގައި މަޑުކުރުމަށް އެދޭ ކަމަށެވެ.

މުއްދަތު އިތުރު ނުކުރެވޭނެކަމަށް ޠާލިބާނުން ބުނުމާއެކު، އެމެރިކާގެ ރައީސް ޖޯ ބައިޑެން ވިދާޅުވީ، ދީފައިވާ މުއްދަތުގެ ތެރޭގައި މީހުން ގެންދިޔުމަށް މަސައްކަތް ކުރައްވާނެ ކަމަށެވެ.

ޖަރުމަންވިލާތުން ބުނީ، ކާބުލް އެއަރޕޯޓުގައި ތިބި, ރައްކާތެރިކަން ބޭނުންވާ ހުރިހާ އެންމެންނަށް ދީފައިވާ މުއްދަތުގައި ރައްކާތެރިކަން ފޯރުކޮށްދެވޭނެ ކަމުގެ ޔަގީންކަމެއް ނެތް ކަމަށެވެ.

ޠާލިބާނުން ކާބުލް އެމީހުންގެ ބާރުގެ ދަށަށް ގެންދިޔުމަށްފަހު މިވީ 9 ދުވަހުގެތެރޭގައި، އަފްޣާނިސްތާނުގައި ތިބި އެހެން ގައުމުތަކުގެ މީހުންނާއެކު 50،000ށްވުރެ ގިނަ މީހުން ވަނީ އެކި ގައުމުތަކަށް ގެންގޮސްފައެވެ.

ޠާލިބާނުންގެ ވެރިކަމާއެކު އަފްޣާން ކުރީގެ ހާލަތަށް ހިގައިދާނެ ކަމުގެ ބިރުވެރިކަން ރައްޔިތުންގެ ތެރޭގައިވަނީ އުފެދިފައެވެ. ޠާލިބާނުން ބޭއްވި ފުރަތަމަ ނޫސްވެރިންގެ ބައްދަލުވުމުގައި ބުނެފައިވަނީ، އަންހެނުންނަށް ވަޒީފާއަށް ދިޔުމަށާއި، އަންހެން ކުދިން ތަޢުލީމުން މަޙުރޫމު ކުރުމުގެ ވިސްނުން ނުގެންގުޅޭ ކަމަށެވެ.