އުސޫލުތަކާ ޚިލާފަށް ފަތުރުވެރިން ބައިތިއްބާ ތަންތަން ހޯދުމުގެ އިންސްޕެކްޝަނެއް ސަރުކާރުން ފަށާފައިވާއިރު މިހާތަނަށް 26 ތަނެއް ބަލާފައިވާކަމަށް ޓޫރިޒަމް މިނިސްޓްރީން ބުނެފިއެވެ.

ރާއްޖެއެމްވީއަށް މައުލޫމާތު ދެއްވަމުން ޓޫރިޒަމް މިނިސްޓްރީގެ ސީނިއަރ ޕޮލިސީ ޑިރެކްޓަރ އިބްރާހިމް ފަރްހާދު ވިދާޅުވީ މި 26 ތަނުގެ ތެރޭގައި ހިމެނެނީ 16 ގެސްޓް ހައުސް އާއި ތިން ހޮޓަލުގެ އިތުރުން ދުވަހު ކުއްޔަށް ދޭ ހަތް ތަން ކަމަށެވެ. އެގޮތުން 19 ތަނެއް ހިންގަނީ ގަވާއިދާ އެއްގޮތަށް ނަގަން ޖެހޭ ހުއްދަތައް ނަގައިގެން ކަމަށްވާއިރު ދުވަހު ކުއްޔަށް ދޭ ހަތް ތަނެއް ހިންގަމުން އަންނަނީ ޤަވާއިދާ ޚިލާފަށް ކަމަށެވެ.

ފަރުހާދު ވިދާޅުވީ އިންސްޕެކްޝަންގެ ތެރެއިން ފާހަގަކުރެވުނު ކަންތައްތައް ރަނގަޅު ކުރުމަށް އަންގާފައިވާ ކަމަށެވެ. އެގޮތުން މާސްކް އަޅައިގެން އުޅުމާއި ސެނެޓައިޒް ކުރެވޭނެ އިންތިޒާމު ހަމަޖެއްސުން ފަދަ ކަންތައްތައް ވަގުތުން ރަނގަޅުކުރުމަށް ގެސްޓް ހައުސްތަކަށާއި ހޮޓެލްތަކަށް އަންގާފައިވާއިރު ބޯޑު ފަދަ ތަކެތި ހަރުކުރަން ޖެހޭނެ ނަމަ، ތިން ދުވަހާއި ފަސް ދުވަހުގެ މުއްދަތެއް ދިނުމަށްފަހު، އެކަންތައްތައް ރަނގަޅުކޮށް މިނިސްޓްރީއަށް މެއިލް މެދުވެރިކޮށް އެންގުމަށް އެދިފައިވާނެ ކަމަށެވެ.

ފަރުހާދު އިތުރަށް ވިދާޅުވީ ބައެއް ގެތަކުގައި ވެސް ގެސްޓް ހައުސްތައް ހަދާފައި ހުންނަ ކަމަށާއި މިނިސްޓްރީއަށް އެޕްލިކޭޝަން ފޯމް ހުށަހެޅުމުން އިންސްޕެކްޓް ކުރުމަށްފަހު، 4 ދުވަހުން އޮޕަރޭޓް ކުރުމުގެ ހުއްދަ ދޫކުރަމުންދާ ކަމަށެވެ. ހުރިހާ އެންމެން އެކުގައި ރައްކާތެރިކަމުގެ ގޮތުން އަޅަން ޖެހޭ ފިޔަވަޅުތަައް އަޅައި، ޤަވާއިދުގެ ތެރެއިން މި ސިނާއަތުގައި މަސައްކަތް ކުރުމަށް ފަރުހާދު ވަނީ ނަސޭހަތްތެރިވެވަޑައިގެންފައެވެ.

މި އިންސްޕެކްޝަން މި މަހުގެ 18 ވަނަ ދުވަހު ފެށީ, އިމިގްރޭޝަނާއި ފުލުހުންނާއި ޓޫރިޒަމް މިނިސްޓްރީއާ އިކޮނޮމިކް މިނިސްޓްރީގެ އިތުރުން ލޯކަލް ގަވަރމަންޓް އޮތޯރިޓީއާ ގުޅިގެންނެވެ. އިންސްޕެކްޝަނާ ގުޅޭގޮތުން ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނީ ރާއްޖެއަށް އަންނަ ފަތުރުވެރިން ޖުލައި 26ން ފެށިގެން, މާލެއާއި މީހުން ދިރިއުޅޭ އެހެން ރަށްރަށުގައި ޗުއްޓީ ހޭދަކުރުމަށް ތިބެވޭނީ ދުނިޔޭގެ ސިއްހަތު ޖަމިއްޔާއިން އިމަރޖެންސީ ޔޫސްއަށް ލިސްޓްކޮށްފައިވާ, ނުވަތަ މޯލްޑިވްސް ފުޑް އެންޑް ޑްރަގް އޮތޯރިޓީން ރާއްޖޭގައި ބޭނުންކުރުމަށް ހުއްދަ ދީފައިވާ ކޮވިޑް-19 ވެކްސިނެއްގެ ޑޯޒްތައް ފުރިހަމަކޮށް، ރާއްޖެއަށް ދަތުރުކުރާ ތާރީޚަށް 14 ދުވަސް ވެފައިވާ ފަރާތްތަކަށާއި ވެކްސިންގެ ޑޯޒްތައް ހަމަނުވާ ފަތުރުވެރިންނަށް މީހުން ދިރިއުޅޭ ރަށްރަށުގެ ހޮޓާތަކާއި ގެސްޓް ހައުސްތަކުގައި ތިބެވޭނީ އެ ރަށެއްގެ ވެކްސިން ޖެހި މުޅި އާބާދީ 60 އިންސައްތަ މަތިވެފައިވާނަމަ ކަމަށް އެ އެޖެންސީން އިއުލާން ކޮށްފައިވާ ކަަމަށެވެ.

އެހެންނަމަވެސް އެ އުސޫލުތަކާ ޚިލާފަށް ގިނަ އަދަދެއްގެ ފަތުރުވެރިން ރާއްޖޭގައި ޗުއްޓީ ހޭދަކުރަމުންދާ ކަމުގެ މައުލޫމާތު ލިބެމުންދާތީ, އުސޫލުތައް ޤާއިމުކޮށްފައިވާ މަޤުޞަދު ހާސިލުކުރުމަށްޓަކައި އިތުރަށް ބަލަންޖެހޭ ކަންކަން ބަލައި، އުސޫލާ ޚިލާފުވާ ފަރާތްތަކާމެދު އަޅަންޖެހޭ ފިޔަވަޅުތައް އަޅަމުންދާނެ ކަމަށެވެ.