ވަރަށް ދެރަވޭ، ދަތްޕިލަޔާއި ހެދި އަހަރެންނަށް ލޯބިވެރިޔަކު ނުލިބޭ!

ކިތަންމެ ރީތި އަދި ކިތަންމެ ޒުވާން އަންހެންކުއްޖަކަސް ލޯބީގައި ނާކާމިޔާބުވެދާނެއެވެ. ލޯބިވާ ބައިވެރިޔަކު ނުލިބި ހުސްކޮށްހުރެ އުމުރު ހޭދަކުރަން ޖެހިދާނެއެވެ. އިނގިރޭސިވިލާތުގެ އުމުރުން 25 އަހަރުވީ ލިލީ މެގްނޯއަށް ދިމާވެފައިވަނީ މިކަހަލަ ގޮތެކެވެ.

ލިލީއަކީ ކިތަންމެހާވެސް ރީތި ކުއްޖެކެވެ. އޭނާގެ ހުވަފެނަކަށް ވެފައި އޮތީ މޮޑެލްކުރުމެވެ. ލޯބިވާ ބައިވެރިޔަކާއެކު ހަޔާތުގެ ދުވަސްތައް ވޭތުކުރުމެވެ. އުމުރުން 24 އަހަރާ ހަމަޔަށް ހުރިހާ ކަމެއް ދިޔައީ ބަރާބަރަށެވެ. އެކަމަކު އެހިސާބުން ނަސީބު ބަދަލުވެގެން ހިނގައްޖެއެވެ.

ލިލީގެ ރީތިކަން ހުތުރުކަމަށް ބަދަލުވެ ލޯބިވެރިޔާ ދުރަށް ދިޔައީ މަތީ ދަތްޕިލައިން ދެ ދަތެއް ވެއްޓި ޕްލާސްޓިކް ދަތްޕިލައެއް ޖަހައިގެން އުޅެން ޖެހުނު ހިސާބުންނެވެ. އޭނާގެ ދެ ދަތެެއް ވެއްޓެން މެދުވެރިވީ ކުޑައިރު ސްކޭޓްބޯޑް ކުރަން އުޅެނިކޮށް ވެއްޓި ހިރުގަނޑަށް ލިބުނު ގެއްލުމެއްގެ ސަބަބުން މާފަހަކުންނެވެ.

އޭރުގެ ލޯބިވެރިޔާ ދުރަށް ދިޔުމަށްފަހު ދެންވެސް ލޯބި ލިބޭތޯ ލިލީ ގަދައަޅައެވެ. އެކަމަކު ވާގޮތަކީ ޑިނަރ ޑޭޓަކަށް ގޮސްފައި އެނބުރި ގެޔަށް ދާންވާއިރަށް ލޯބިވެރިޔާ ގެއްލެނީއެވެ. ލިލީއަށް ކެވެނީ އެއްކަލަ ޕްލާސްޓިކް ދަތްޕިލާ ނަގައި ކުރިމަތީގައި ހުންނަ ފެންތައްޓެއްގެ ތެރޭގައި ބާއްވައިގެން އިނދެއެވެ. މި މަންޒަރު ފެނުމާއެކު ލޯބިވެރިޔާ ދުވެ ފިލަނީއެވެ. މިގޮތަށް ދިހަ ބާރަ ޒުވާނުން ފިލައިފިއެވެ.

ލިލީ މިހާރު ހުރީ މިކަމަށް ވަރަށް ބޮޑަށް ހޭނިފައެވެ. އޭނާ ބުނެފައިވަނީ ދެ ދަތެއް މަދުކަން އެނގިގެން ދުރަށްދާ ކަހަލަ ލޯބިވެރިން އަރަފޯދިގެން ނުވާ ކަމުގައެވެ. އޭނާގެ އުނިސިފައަށް ފަރުވާލެއް ނުބަހައްޓައި އެތެރޭގެ ރީތިކަމަށް އެދޭ ލޯބިވެރިޔަކު އަދި ފެންނާނެ ކަމަށާއި އެފަދަ ލޯބިވެރިޔެއްގެ އިންތިޒާރުގައި ހުރިކަމަށް ވެސް ބުންޏެވެ.

ލިލީ މިހާރު ވަނީ ދަތްޕިލައިގެ އުނިސިފަ އޭނާގެ ކެރިއަރު ބައްޓަންކުރުމުގެ އެންމެ ރީތި ސިފަކަމުގައި ހަދައިފައެވެ. ޓިކްޓޮކްގައި ލިލީ ވަނީ ޕްލާސްޓިކް ދަތްޕިލާ ނަގައިގެން ކާން އިންނަ މަންޒަރު ފެންނަ ވީޑިއޯތަކާއި ދެ ދަތް މަދުކަން ފެންނަ އެހެން ވީޑިއޯތައްވެސް ހިއްސާކޮށްފައެވެ. އޭނާގެ ހިތްވަރާއި ކެރުން ފާހަގަކޮށް އެތައްހާސް ބަޔަކު މިހާރު އޭނާ ފޮލޯކުރެއެވެ. އޭނާގެ ޕޯސްޓުތަކަށް ލައިކްދެއެވެ.