ގައުމީ ބާސްކެޓްބޯޅަ ޓީމުގެ ކޯޗަކަށް އިއްލެ

ގައުމީ ބާސްކެޓްބޯޅަ ޓީމުގެ ކޯޗަކަށް ތަޖުރިބާކާރު ކޯޗު އިލްޔާސް އިބްރާހިމް (އިއްލެ) ހަމަޖައްސައިފިއެވެ.

"ރާއްޖެ.އެމްވީ" އަށް މައުލޫމާތުދެއްވަމުން މޯލްޑިވްސް ބާސްކެޓްބޯލް އެސޯސިއޭޝަން (އެމްބީއޭ) ގެ ރައީސް އަޙްމަދު އާދަމް ވިދާޅުވީ އަންނަ އޮކްޓޯބަރު މަހުގެ 21 ވަނަ ދުވަހު ބަންގްލަދޭޝްގައި ބޭއްވުމަށް ހަމަޖެހިފައިވާ ސާބާ މެންސް ޗެމްޕިއަންޝިޕަށް ތައްޔާރުވުމުގެ މަސައްކަތް ފަށާފައިވާ ކަމަށާއި، އެގޮތުން ގައުމީ ޓީމުގެ އައު ކޯޗަކަށް އިއްލެ ހަމަޖައްސާފައިވާ ކަމަށެވެ.

އިއްލެ އާއެކު އެސިސްޓަންޓް ކޯޗުންގެ ގޮތުގައި ހަރަކާތްތެރިވާނީ ގައުމީ ބާސްކެޓްބޯޅަ ޓީމުގެ ކުރީގެ ކެޕްޓަން މުޙައްމަދު ޒިލާލް (ޒިލާ) އާއި، ކުރީގެ ބާސްކެޓްބޯޅަ ތަރި އަލީ ފަޒްލީ އަދި މުޙައްމަދު ނަސީރެވެ. އާދަމް ވިދާޅުވީ ގައުމީ ބާސްކެޓްބޯޅަ ޓީމަށް ޒުވާން ކޯޗުންތަކެއް ހަމަޖެއްސީ، އެ ކޯޗުންނަކީ ރާއްޖޭގެ ބާސްކެޓުގެ ކުރިމަގު ކަމަށްވާތީ ކަމަށާއި، އަދި އަލަށް ހަމަޖެއްސި ކޯޗުންނާއެކު ރާއްޖޭގެ ބާސްކެޓް ކުރިއެރުވޭނެކަމުގެ ފުރިހަމަ ޔަގީންކަން އޮތުމުން ކަމަށެވެ.

ގައުމީ ބާސްކެޓްބޯޅަ ޓީމުގެ ކޯޗަކަށް އިއްލެ ހަމަޖެއްސިއިރު، ކޯޗެއްގެ ގޮތުގައި އޭނާ ވިދާލީ ޓީރެކްސް ބާސްކެޓްބޯޅަ ކުލަބުންނެވެ. ބާސްކެޓުގެ އިތުރުން ފުޓްބޯޅައިގައިވެސް ވިދާލި އިއްލެ އަކީ މީގެ ކުރިން ގައުމީ ފުޓްބޯޅަ ޓީމަށްވެސް ކުޅުނު ކުޅުންތެރިއެކެވެ. އެގޮތުން ގައުމީ ފުޓްބޯޅަ ޓީމުން 2004 ވަނަ އަހަރު ގަދަފަދަ ދެކުނު ކޮރެއާއާ ލަނޑެއް ނުޖެހި އެއްވަރުކުރި މެޗުގައި އިއްލެ އަކީ ޓީމުގެ އެއް ނަމްބަރު ފޯވާޑެވެ. އަދި ޖެހިގެން އައި އަހަރު ރާއްޖޭގެ ކުލަބު ފުޓްބޯޅައިގައި މިހާތަނަށް ހޯދި އެންމެ ބޮޑު ކާމިޔާބު ކަމުގައިވާ، އޭއެފްސީ ކަޕުގެ ސެމީ ފައިނަލަށް ނިއު ރޭޑިއަންޓް ސްޕޯޓްސް ކުލަބު ދަތުރުކުރިއިރު އެ ޓީމުގައިވެސް އިއްލެ ހިއްސާވިއެވެ.

އެއަށްފަހު ބާސްކެޓްބޯޅައަށް އިއްލެ މުޅިން ހުސްވީ 2007 ވަނަ އަހަރެވެ. ބާސްކެޓުގައި ވިކްޓަރީ ސްޕޯޓްސް ކުލަބުން ހޯދި ކާމިޔާބުތަކުގައި އިއްލެގެ ދައުރު ބޮޑުއިރު، ކޯޗެއްގެ ގޮތުގައި އިއްލެ ވަނީ ޓީރެކްސްއާއެކު ގިނަ ކާމިޔާބީތަކެއް ހޯދާފައެވެ. ޓީރެކްސްގެ ކާމިޔާބީތަކަށްފަހު ދާދި ފަހުން އޭނާ ވަނީ އެ ޓީމުގެ ކޯޗުގެ މަގާމުން ވަކިވެފައެވެ.

"ރާއްޖެ.އެމްވީ" އާ ވާހަކަދައްކަމުން އިއްލެ ބުނީ ގައުމީ ބާސްކެޓްބޯޅަ ޓީމުގެ ކޯޗުގެ މަގާމަކީ ރާއްޖޭގައި ލިބެން އޮތް އެންމެ މަތީ މަގާމު ކަމަށާއި، އެހެންކަމުން މިއީ އޭނާއަށް ލިބުނު ބޮޑު ފަޚުރެއް ކަމަށެވެ. އަދި އެއާއެކު އޭނާގެ ޒިންމާތައްވެސް މިހާރު ބޮޑުވެފައިވާ ކަމަށް ވަނީ ބުނެފައެވެ.

އިއްލެ ބުނީ ގައުމީ ބާސްކެޓްބޯޅަ ޓީމާ ހަވާލުވިއިރު، ބޯމަތީގައި އޮތީ އޭޝިއާގެ އެންމެ ބޮޑު މުބާރާތް ކަމަށެވެ. އެހެންކަމުން ލިބިފައިވާ ކުރު މުއްދަތުގެ ތެރޭގައި އެ މުބާރާތަށް ތައްޔާރުވުމަށް މަސައްކަތްކުރަމުން އަންނަ ކަމަށާއި، އަމާޒަކީ އެ މުބާރާތުން ރަނގަޅު ނަތީޖާއެއް ހޯދުން ކަމަށްވެސް ބުންޏެވެ.

ގައުމީ ބާސްކެޓްބޯޅަ ޓީމުގެ ކޯޗަކަށް އިއްލެ ހަމަޖެއްސިއިރު، އެ ޓީމުގެ ކޯޗުގެ މަގާމުގައި އެންމެ ފަހުން ހުރީ އެމެރިކާގެ ކޯޗު ކޯރޭ އެލެކްސެންޑާއެވެ.