ފަރަށް އެރި ބޯޓު ފުންކުރުމަށް ލަންކާއިން އެހީވަނީ
21 އޯގަސްޓު 2021 | ހޮނިހިރު 16:41މި ބޯޓު ފަރަށް އަރާފައިވަނީ މިމަހުގެ 19 ވަނަ ދުވަހު
ފަރަށް އަރާފައިވާ ޕެނަމާގެ ބޯޓު
ކ. ރަސްފަރި ހުޅަނގު ފަރާތު ފަރަށް އެރި ކާގޯ ބޯޓު ފުންކުރުމަށް އަންނަ ހޯމަ ދުވަހު ސްރީ ލަންކާގެ ޓަގު ބޯޓެއް އަންނާނެކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)އިން ބުނެފިއެވެ.
ޕެނަމާއަށް ނިސްބަތްވާ, 190 މީޓަރުގެ ކާގޯ ބޯޓު ރަސްފަރި ހުޅަނގު ފަރާތު ފަރަށް އެރީ މިމަހުގެ 19 ވީ ބުރާސްފަތި ދުވަހު މެންދުރު 12:48 އެހާއިރުއެވެ. ބޯޓު ފުން ކުރުމުގެ މަސައްކަތް އަދިވެސް ކުރިއަށްދާއިރު، މި މަސައްކަތަށް ލަންކާގެ ޓަގު ބޯޓެއް އަންނާނެ ކަމަށާއި, މި މަސައްކަތް ކުރިއަށްދާނީ ކަމާބެހޭ ފަރާތްތަކާ މަޝްވަރާކުރުމަށްފަހުގައި ކަމަށް އެމްއެންޑީއެފުން ބުނެފައިވެއެވެ.
އެ ބޯޓު ނިސްބަތްވާ ގްރީިކުގެ ކުންފުނިން މިހާރު ވަނީ އެމީހުންގެ އެޖެންޓެއްގެ ގޮތުގައި އެންޓްރަކް މޯލްޑިވްސް ހަމަޖައްސާފައިކަމަށް އެމްއެންޑީއެފުން ބުނެފައިވެއެވެ.
މީގެ އިތުރުން ބޯޓު ފުންކޮށް ނިމުމުން ކ. ރަސްފަރި ހުޅަނގު ފަރާތު ފަރަށް ލިބުނު ގެއްލުން ބަލާނެ ކަމަށް އެންވަޔަރަމެންޓް ޕްރޮޓެކްޝަން އެޖެންސީގެ ޑިރެކްޓަރ ޖެނެރަލް އިބްރާހީމް ނަޢީމް ވަނީ ވިދާޅުވެފައެވެ. ފަރަށް ލިބިފައިވަނީ ކިހައި ބޮޑު ގެއްލުމެއްކަން ބޯޓު ފުން ނުކުރެވެނީސް ނޭނގޭނެ ކަމަށާއި، ފުން ކުރެވުނުހާ އަވަހަކަށް ފަރަށް ލިބިފައިވާ ގެއްލުންތައް ބަލާނެ ކަމަށް އޭނާ ވިދާޅުވިއެވެ. މިކަމާ ގުޅިގެން ކުރަންޖެހޭ އިތުރު މަސައްކަތްތައް ކުރާނެ ކަމަށްވެސް ނައީމް ވިދާޅުވިއެވެ.
ބޯޓު ފުންކުރުމުގެ މަސައްކަތް ކުރަމުންދާއިރު، ބޯޓު އޮތީ އެއްކޮށް ފަރަށް ލައްވެފައެވެ. އެމްއެންޑީއެފުން ބުނީ އެ ސަރަހައްދުގައި ކޯސްޓްގާޑުގެ އިތުރުން ކަމާގުޅުންހުރި ފަރާތްތަކުން ހަރަކާތްތެރިވަމުން ދާ ކަމަށެވެ. މި ހާދިސާގައި ލިބިފައިވާ ގެއްލުމުގެ މައުލޫމާތު އެމްއެންޑީއެފުން އަދި ހާމަކޮށްފައެއް ނުވެއެވެ.
މިފަދަ ހާދިސާތައް ދޭތެރެ ދޭތެރެއިން ކުރިމަތިވަމުން ދާއިރު، މިފަދަ ހާދިސާތަކުގައި ފަރަށް ލިބުނު ގެއްލުމުގެ ބަދަލު ހޯދުމަށް ބޮޑެތި އަދަދުތަކުން ޖޫރިމަނާކޮށްފައިވެއެވެ.
