ކައިލީ ޖެނަރ ދެވަނަ ދަރިއަކަށް ބަލިވެއިންކަމުގެ ރިޕޯޓްތައް ފެތުރެން ފަށައިފިއެވެ.

އުމުރުން 20 އަހަރުގައި ފުރަތަމަ ދަރިފުޅު، ސްޓޯރމީއަށް މަރުހަބާ ކިޔާފައިވާ ކައިލީ, އިތުރު ކުދިން ބޭނުންވާކަމަށް ވަރަށް ގިނަ ޕްރެސް ތަކުގާއި އަދި މީސްމީޑިއާގެ އެކި ޕްލެޓްފޯމްތަކުގައި ބުނެފައިވެއެވެ.

ނަމަވެސް، ކައިލީއާއި ސްޓޯރމީގެ ބައްޕަ، މަޝްހޫރު ރެޕް އާޓިސްޓް ޓްރެވިސް ސްކޮޓްއާ 2019 ވަނަ އަހަރު ދުރުވުމާއެކު މިފަދަ ވާހަކަތައް މަދުވިއެވެ. ކައިލީ ބުނި ގޮތުގައި އޭނާގެ މަންމަ ކްރިސް ޖެނަރ ފަދައިން އޭނާ ވެސް ބޮޑު އާއިލާއެއް ބޭނުންވެއެވެ.

އިތުބާރު ހުރި ފަރާތަކާ ހަވާލާދީ, ކައިލީ ދެވަނަ ކުއްޖަކަށް ބަލިވެއިންކަން އެމެރިކާގެ ގިނަ ނޫސްތަކުން ރިޕޯޓް ކުރަމުންދާއިރު، ކައިލީ އަދި ޓްރެވިސް މިކަމާ ގުޅޭ ގޮތުން ބަހެއް ބުނެފައެއް ނުވެއެވެ.

މި ޚަބަރު ކައިލީގެ އާއިލާއަށް އެނގުނުއިރު މުޅި އާއިލާއަށް ސިހުމެއް ލިބުނު ކަމަށްވެސް އިތުބާރު ހުރި ފަރާތްތަކުން މީޑިއާއަށް މައުލޫމާތު ދީފައިވެއެވެ.

ކައިލީއާ ޓްރެވިސްގެ ގުޅުން އެހާ ރަގަނޅު ނޫންކަމަށް އެއްފަހަރެއްގައި މީޑިއާގައި ފެތުރެމުންދިޔައެވެ. އަދި ކައިލީއާ ޓްރެވިސް ދުރުވުމަށްފަހު އަލުން ގުޅުނީ މިއަހަރު ފުރަތަމަ ކޮޅުގައި ކަމަށްވެސް މީޑިއާތަކުގައި ވާހަކަ ދެކެވެމުންދެއެވެ. ކައިލީއާ ޓްރެވިސް ފުރަތަމަ ރައްޓެހިވެގެން އުޅޭކަން ހާމަކޮށްފައިވަނީ 2017 ވަނަ އަހަރުގައެވެ. އަދި އެ މީހުންގެ ފުރަތަމަ ދަރިފުޅު ސްޓޯރމީ ވެބްސްޓަރ ލިބިފައިވަނީ 2018 ވަނަ އަހަރުގެ ފެބްރުއަރީ މަހުއެވެ.

ކައިލީ ފުރަތަމަ ދަރިފުޅަށް ބަލިވެއިން ކަމުގެ ރިޕޯޓްތައް އޭރު ފެތުރުނު އިރުވެސް، ވިހެއުމާ ހަމައަށް އޭނާ އެކަން ސިއްރުކޮށްފައިވެއެވެ. ކައިލީ ބުނީ އެ ސިއްރު ހިފެހެއްޓުމަށްޓަކައި ފަހުންފަހުން އޭނާ ގެއިން ވެސް ނުނިކުންނަ ކަމަށެވެ.

ކައިލީއަށް 24 އަހަރު ފުރުނީ މި ހިގަމުންދާ އޮގަސްޓް މަހުގެ 10ވަނަ ދުވަހުގައެވެ. ޓްރެވިސްގެ އުމުރަކީ 30 އަހަރެވެ. އެ މީހުންގެ ދަރުފުޅު ސްޓޯރމީއަށް 3 އަހަރެވެ.