މަސްވެރިކަމަށް ޚާއްސަކޮށް މާބައިދޫގެ ބަނދަރު ތަރައްގީކުރުމާއެކު މަސްވެރިންނަށް ފަޅުގައި ދޯނިތައް އަޅާފައި ބޭއްވުމަށް ފަސޭހަތަކެއް ވެގެންގޮސްފައިވާކަމަށް މާބައިދޫ ކައުންސިލްގެ ރައީސް އިބްރާހީމް ވިސާމް ވިދާޅުވެއްޖެއެވެ.

ލ. މާބައިދޫގައި އައު ނެރެއް ކެނޑުމުގެ މަސައްކަތް އެމްޓީސީސީން ފެށީ 2019 ވަނަ އަހަރުގެ ނޮވެމްބަރު މަހުގެ 2 ވަނަ ދުވަހެވެ. 2020 ވަނަ އަހަރުގެ ޖުލައި މަހުގެ 17 ވަނަ ދުވަހު އެމްޓީސީސީން ވަނީ މި މަސައްކަތް ނިންމާލާފައެވެ. މަސައްކަތް ނިމުމުން މާބައިދޫ ރައްޔިތުންނަށް ލިބުނު ލުއިތައް އޮޅުންފިލުވައިލުމަށް އެމްޓީސީސީގެ ސީއީއޯ އާދަމް ޢާޒިމް ވަނީ މާބައިދޫއަށް ޒިޔާރަތްކުރައްވައި ކައުންސިލުން މިކަންކަން އޮޅުންފިލުއްވާފައެވެ.

މިކަންކަމުގެ މަޝްވަރާތައް ކުރިއަށްގެންދިއުމަށްފަހު މީޑިއާތަކަށް މައުލޫމާތުދެއްވަމުން މާބައިދޫ ކައުންސިލްގެ ރައީސް އިބްރާހީމް ވިސާމް ވިދާޅުވީ, މާބައިދޫއަކީ މަސްވެރިކަމަށް ޚާއްސަ ރަށަކަށް ވެފައި، މީގެ ކުރިން ބަނދަރުގެ ނެރު އޮތްތަނުގެ ސަބަބުން ކަނޑު ގަދަވާ މޫސުންތަކުގައި ފަޅުގައި އޮޑި އަޅާފައި ބޭއްވުމަށް މަސްވެރިންނަށް ވަރަށް ބޮޑަށް ދަތިވި ކަމަށެވެ.

މިހާރު އެމްޓީސީސީން ވަނީ އެރަށުގައި ކުރިން އޮތް ނެރު ބައްދައި، ހުޅަނގު ފަރާތުން ނެރު ކަނޑާފައެވެ. މިއާއެކު މިހާރު މާބައިދޫގެ ބަނދަރު އޮޑިތަކަށް ރައްކާތެރި ތަނަކަށް ވެފައިވާކަމަށް އެ ރަށު ކައުންސިލްގެ ރައީސް ވިދާޅުވިއެވެ. މި ފާއިތުވި ދެތިން މަހަކީ ކަނޑުގަދަ ދުވަސްތަކެއް ކަމަށާއި، އެ ދުވަސްކޮޅުގައިވެސް އެފަދަ އެއްވެސް ދައްޗެއް ނުވާކަން ކައުންސިލްގެ ރައީސް ވިސާމް ފާހަގަކުރެއްވިއެވެ.

ބަނދަރުގެ ނިމިފައިވާ މަސައްކަތްތައް ބައްލަވައިލެއްވުމަށްފަހު އެމްޓީސީސީގެ ސީއީއޯ އާދަމް ޢާޒިމް ވިދާޅުވީ މާބައިދޫ ބަނދަރު ތަރައްގީކުރުމުގެ މަސައްކަތުގެ ތެރެއިން އެމްޓީސީސީން ކޮށްފައިވަނީ, މާބައިދޫގައި ކުރިން ނެރު ކަނޑާފައި އޮތް ދިމާ ގަދަ ވާތީ އެހެން ތަނަކުން ނެރު ކެނޑުމާއި، ނެރު ފައިކަށި ދިގުކުރުމުގެ މަސައްކަތް ކަމަށެވެ. އަދި ބޭރުތޮށީގައި ރިވެޓްމެންޓް ޖެހުމާއި، ބަނދަރު މަތިން ރަށުގެ ބޭރު ތޮއްޓަށް އެރޭގޮތަށް ބްރިޖެއް އަޅާފައިވާކަމަށް އާޒިމް ވިދާޅުވިއެވެ. މި މަސައްކަތް ނިމުމާއެކު މީގެ ކުރިން ދިމާވި ދަތިތަކަށް ވަރަށް ބޮޑު ހައްލެއް ލިބިފައިވާކަން ކައުންސިލުން ފާހަގަކުރެއްވި ކަމަށް ޢާޒިމް ވަނީ ވިދާޅުވެފައެވެ.

މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން އެމްޓީސީސީއާ ހަވާލުކޮށްގެން ކުރިއަށްގެންދިޔަ މި މަޝްރޫޢަކީ 16.4 މިލިއަން ރުފިޔާގެ މަޝްރޫޢެކެވެ. މާބައިދޫ ބަނދަރުގެ ބޮޑުމިނުގައި 700 ފޫޓު ހުރެއެވެ.