ޔޫރަޕުގެ އެންމެ މޮޅު ފިރިހެން ފުޓްބޯޅަ ކުޅުންތެރިޔާގެ މަގާމަށް ވާދަކުރާ ލިސްޓުގެ ގަދަ ތިނެއްގައި އިނގިރޭސި ޕްރިމިއާ ލީގުގެ ތިން ކުޅުންތެރިން ހިމެނިއްޖެއެވެ.
މި ފަހަރުގެ ލިސްޓުގައި ހިމެނޭ ތިން ކުޅުންތެރިންނަކީ ޗެލްސީއަށް ކުޅެމުން އަންނަ ފްރާންސްގެ މިޑްފީލްޑަރު އެންގޯލޯ ކާންޓޭ އާއި، އެ ޓީމުގެ އިޓަލީގެ މިޑްފީލްޑަރު ޖޯޖީނިއޯ އަދި މެންޗެސްޓާ ސިޓީއަށް ކުޅެމުން އަންނަ ބްލެޖިއަމުގެ މިޑްފީލްޑަރު ކެވިން ޑި ބްރޭނާއެވެ.
މީގެ ތެރެއިން ކާންޓޭ އާއި ޖޯޖީނިއޯ ވަނީ ޗެލްސީއާއެކު މިދިޔަ ސީޒަނުގެ ޔުއެފާ ޗެމްޕިއަންސް ލީގު ކާމިޔާބުކޮށްފައެވެ. އެ މުބާރާތުގައި އެންމެ ބޮޑަށް ވިދާލި ކުޅުންތެރިއަކީ ކާންޓޭއެވެ. އެގޮތުން އޭނާ ވަނީ ޗެމްޕިއަންސް ލީގުގެ ސެމީ ފައިނަލް ދެ ލެގާއި، ފައިނަލް މެޗުގެ މޮޅު ކުޅުންތެރިޔާގެ މަގާމު ހޯދާފައެވެ. އެކަމަކު މި އަހަރުގެ ހޫނު މޫސުމުގައި ބޭއްވި ޔޫރޯ ފުޓްބޯޅަ މުބާރާތުގައި ކާންޓޭއަށް އެންމެ އެދެވޭ ކުޅުމެއް ދެއްކިފައި ނުވާއިރު، ޖޯޖީނިއޯ ވަނީ އިޓަލީއާއެކު ޔޫރޯ ކާމިޔާބުކޮށްފައެވެ. އެހެންކަމުން މި ފަހަރުގެ އެވޯޑް ލިބުން އެންމެ ގާތް ކުޅުންތެރިއަކީ ޖޯޖީނިއޯ ކަމަށް ރިޕޯޓުތައް ބުނެއެވެ.
ދެން މި ލިސްޓުގައި ހިމެނޭ ޑި ބްރޭނާ ވަނީ ސިޓީއާއެކު މިދިޔަ ސީޒަނުގެ ޕްރިމިއާ ލީގު ކާމިޔާބުކޮށްފައެވެ. އަދި މިދިޔަ ސީޒަނުގެ ޗެމްޕިއަންސް ލީގުގެ ފައިނަލަށް ސިޓީ ގެންގޮސްދިނުމުގައިވެސް ޑި ބްރޭނާގެ ދައުރު ބޮޑެވެ.
މި ފަހަރުގެ ޔުއެފާ އެވޯޑުގެ ގަދަ ތިނެއްގައި ޕްރިމިއާ ލީގުގެ ތިން ކުޅުންތެރިން ހިމެނުނުއިރު، ހަތަރުވަނައިގައި ހިމެނުނީ ލިއޮނަލް މެސީއެވެ. އަދި ފަސްވަނައިގައި ރޮބަޓް ލެވަންޑޯސްކީ އޮތްއިރު، ހަވަނައިގައި އޮތީ ޔޫރޯގެ މޮޅު ކުޅުންތެރިޔާގެ މަގާމު ހޯދި ގޯލްކީޕަރު ޖިއަންލުއީޖީ ޑޮންނަރުންމާއެވެ. ހަތްވަނައިގައި ކީލިއަން އެމްބާޕޭ އޮތްއިރު، އަށްވަނައިގައި އޮތީ ރަހީމް ސްޓާލިންއެވެ. އަދި ނުވަވަނައިގައި ކްރިސްޓިއާނޯ ރޮނާލްޑޯ އޮތްއިރު، ދިހަވަނައިގައި އޮތީ އާލިން ބްރައުޓް ހާލަންޑެވެ.
މި ފަހަރުގެ ޔޫރަޕުގެ އެންމެ މޮޅު ކޯޗުގެ މަގާމަށް ވާދަކުރަނީ ޗެލްސީގެ ކޯޗު ތޯމަސް ޓުޗެލް އާއި، ސިޓީގެ ޕެޕް ގާޑިއޯލާ އަދި އިޓަލީ ގައުމީ ޓީމުގެ ކޯޗު ރޮބާޓޯ މަންޗިނީއެވެ.
