ޖުލައި މަހު ރާއްޖެއަށް 2.8 ބިލިއަން ރުފިޔާގެ މުދާ އިމްޕޯޓްކޮށްފި
19 އޯގަސްޓު 2021 | ބުރާސްފަތި 08:04ފާއިތުވި މަހު ދިވެހިރާއްޖެއަށް އެންމެ ގިނައިން މުދާ އެތެރެކޮށްފައިވާ ގައުމުތަކަކީ ޗައިނާ ސިންގަޕޫރު އަދި އިންޑިއާ
ރާއްޖެއިން ބޭރުން އައިސްފައިވާ އުޅަނދާއި، ރާއްޖޭއިން ފުރާފައިވާ އުޅަނދުފަހަރުގެ އަދަދު ވެސް ވަނީ އިތުރުވެފައި
ޖުލައި މަހު ރާއްޖެއަށް 2.8 ބިލިއަން ރުފިޔާގެ މުދާ އިމްޕޯޓްކޮށްފިއެވެ.
ފާއިތުވި ޖުލައި މަހު ރާއްޖެއަށް އިމްޕޯޓް ކުރެވުނު މުދަލުގެ ސީ.އައި.އެފްއަގު 2020 ވަނަ އަހަރުގެ ޖުލައި މަހާ އަޅާބަލާއިރު 48 އިންސައްތަ އިތުރުވެފައިވާ ކަމަށް މޯލްޑިވްސް ކަސްޓަމްސް ސަރވިސް އިން ވަނީ ބުނެފައެވެ. ފާއިތުވި ޖުލައި މަހު ދައުލަތަށް ލިބުނު އާމްދަނީ 2020 ވަނަ އަހަރުގެ ޖުލައި މަހާ އަޅާބަލާއިރު 17 އިންސައްތަ ވަނީ ދަށްވެފައެވެ. 2020 ވަނަ އަހަރުގެ ޖުލައި މަހު 239 މިލިއަން ރުފިޔާ ދައުލަތަށް ލިބިފައިވާއިރު، މި އަހަރުގެ ޖުލައި މަހު މި އަދަދު ވަނީ 242 މިލިއަން ރުފިޔާއަށް ދަށްވެފައެވެ.
ފާއިތުވި މަހު ދިވެހިރާއްޖެއަށް އެންމެ ގިނައިން މުދާ އެތެރެކޮށްފައިވާ ގައުމުތަކަކީ ޗައިނާ ސިންގަޕޫރު އަދި އިންޑިއާއެވެ. ޗައިނާ އިން 434 މިލިއަން ރުފިޔާގެ މުދާ އެތެރެކޮށްފައިވާއިރު ސިންގަޕޫރުން 348 މިލިއަން ރުފިޔާގެ މުދާ އަދި އިންޑިއާއިން 330 މިލިއަން ރުފިޔާގެ މުދާ ފާއިތުވި މަހު ވަނީ އެތެރެކޮށްފައެވެ. ރާއްޖެއިން އެންމެ ގިނައިން މުދާ އެކްސްޕޯޓްކޮށްފައިވަނީ ތައިލޭންޑަށެވެ. އެގޮތުން ތައިލެންޑަށް 37 އިންސައްތަ މުދާ އެކްސްޕޯޓްކޮށްފައިވެއެވެ. އަދި ޖަރުމަނުވިލާތަށް 16 އިންސައްތަ މުދާ، އިނގިރޭސިވިލާތަށް 12 އިންސައްތަ މުދާ، އިޓަލީވިލާތަށާއި ފަރަންސޭސިވިލާތަށް 4 އިންސައްތަ މުދާ އެކްސްޕޯޓްކޮށްފައިވާ ކަމަށް ކަސްޓަމްސްގެ ތަފާސްހިސާބުތަކުން ދައްކައެވެ.
ޖުލައިމަހު ރާއްޖެއަށް ޕްރޮސެސްކުރެވުނު ޑިކްލަރޭޝަންއާއި ރާއްޖެއިން ބޭރުން އައިސްފައިވާ އުޅަނދާއި، ރާއްޖޭއިން ފުރާފައިވާ އުޅަނދުފަހަރުގެ އަދަދު ވެސް ވަނީ އިތުރުވެފައެވެ. މި އަހަރުގެ ޖުލައި މަހު ރާއްޖެއަށް ޕްރޮސެސްކުރެވުނު ޑިކްލަރޭޝަންގެ އަދަދަކީ 14660 އެވެ. 2020 ވަނަ އަހަރު މިއަދަދު އުޅުނީ 7718 ގައެވެ. ޖުލައިމަހު ރާއްޖެއިން ބޭރުން އައިސްފައިވާ އުޅަނދުގެ އަދަދަކީ 102 އެކެވެ. އަދި ރާއްޖެއިން ފުރާފައިވަނީ 120 އުނޅަދެވެ.
