އިބްރާހިމް މުހައްމަދު ޞާލިޙަކީ ރައްޔިތުންގެ ރައީސް - ނާޝިޒް
18 އޯގަސްޓު 2021 | ބުދަ 15:16ރައީސް ޞާލިހްގެ ނަން ތާރީހުގައި ލިޔެވިގެންދާނީ ކޮޅުމަޑުލުގެ ރައްޔިތުންގެ ހައްގުތައް ހޯދައިދިނުމަށް މަސައްކަތްކޮށްދެއްވި ރައީސްގެ ގޮތުގައި
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު އޮމަދޫއަށް ކުރެއްވި ދަތުރުފުޅުގެ ތެރެއިން
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙަކީ ރައްޔިތުންގެ ރައީސް ކަމަށް ރައްޔިތުންގެ މަޖިލީހުގެ ކިނބިދޫ ދާއިރާގެ މެމްބަރު މުހައްމަދު ނާޝިޒް ވިދާޅުވެއްޖެއެވެ.
ރައީސުލްޖުމްހޫރިއްޔާ ކޮޅުމަޑުލުގެ ރަށްތަކަށް ކުރައްވަމުން ގެންދަވާ ދަތުރުފުޅުގައި އޮމަދޫއަށް ވަޑައިގެން ބޭއްވި ޚާއްސަ ހަފުލާގައި ވާހަކަދައްކަވަމުން ރައްޔިތުންގެ މަޖިލީހުގެ ކިނބިދޫ ދާއިރާގެ މެމްބަރު ނާޝިޒް ވަނީ ރައީސް ޞާލިހްގެ ނަން ތާރީޚްގައި ލިޔެވިގެންދާނީ ކޮޅުމަޑުލުގެ ރައްޔިތުންގެ ހައްގުތައް ހޯދައިދިނުމަށް މަސައްކަތްކޮށްދެއްވި ރައީސްގެ ގޮތުގައި ކަމަށް ވިދާޅުވެފައެވެ. ރައީސް ޞާހަކީ އޮމަދޫ ރައްޔިތުންގެ ރައީސް ކަމާއި އޮމަދޫގެ ރައްޔިތުން ބޭނުންވި ބަދަލު އެ ރައްޔިތުންނަށް ހޯއްދަވައިދެއްވީ ރައީސް ކަމަށް ނާޝިޒް ވަނީ ވިދާޅުވެފައެވެ. އަދި ރައީސް ޞާލިޙް ރާއްޖޭގެ ބޮޑެތި ރަށްތަކާއި ކުދި ރަށްތަކުގެ މެދުގައި ތަފާތުކުރުންތައް ނުގެންގުޅުއްވާ ކަމަށާއި ތަރައްގީގެ މަޝްރޫއުތައް ހުރިހާ ރަށެއްގައި ހަމަހަމައަށް ކުރިއަށް ގެންދަވާ ކަމަށް ވެސް ނާޝިޒް ވިދާޅުވިއެވެ.
ނާޝިޒް ވަނީ ވެރިއެއް އިންތިޚާބުކުރުމުގެ ބޭނުމަކީ މިއީ ކަމަށާއި ރައްޔިތުންނަށް އޯގާތެރި ރައީސް އަކީ މިއީ ކަމަށް ވިދާޅުވެފައެވެ. އަދި ރައީސް ޞާލިޙަކީ ރައްޔިތުންގެ ހުވަފެންތައް ހަގީގަތަކަށް ހައްދަވައިދެއްވާނެ ރައީސް ކަމަށްވެސް ނާޝިޒް ވަނީ ވިދާޅުވެފައެވެ.
ސަރުކާރުން އެންމެ ފުރަތަމަ ފަށާ ޕްރޮޖެކްޓުތަކުގެ ތެރޭގައި އޮމަދޫގެ ބަނދަރުގެ މަސައްކަތް ފައްޓަވައިދެއްވާނެ ކަމަށް ވިދާޅުވެ އެ ވައުދު ރައީސް ޞާލިޙް މިވަނީ ވަރަށް ރަނގަޅަށް ފުރިހަމަކޮށްދެއްވާފައި ކަމަށް ނާޝިޒް ވަނީ ވިދާޅުވެފައެވެ. އަދި އޮމަދޫގެ ރައްޔިތުންގެ ހާލަތު ރަނގަޅުކުރުމަށްޓަކައި ރައީސް ޞާލިޙްގެ ސަރުކާރުން ކުރިއަށްގެންދާ ތަފާތު ޕްރޮޖެކްޓުތަކަށް 100 މިލިއަނެއްހާ ރުފިޔާ ޚަރަދުކުރަމުންދާ ކަމަށް ނާޝިޒް ވަނީ ފާހަގަކުރައްވާފައެވެ. އަދި މިޕްރޮޖެކްޓުތަކާއެކު ރައްޔިތުންގެ ދިރިއުޅުން ވަރަށް ބޮޑަށް ކުރިއަރަން ފަށާފައިވާކަމަށް ވެސް ވަނީ ވިދާޅުވެފައެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ކޮޅުމަޑުލުގެ ބައެއް ރަށްރަށަށް ކުރައްވަމުން ގެންދަވާ ދަތުރުފުޅުގެ ތެރެއިން އެ އަތޮޅު އޮމަދޫއަށް ވަޑައިގެން ސަރުކާރުން އޮމަދޫގައި ތަރައްގީކޮށްފައިވާ ބަނދަރުގެ ނިމުން ވަނީ ރަސްމީކޮށް އިފްތިތާހުކޮށްދެއްވާފައެވެ. ރައީސް އޮމަދޫއަށް ވަޑައިގެންނެވުމުން އެމަނިކުފާނަށް ވަނީ ރަށުގެ ރައްޔިތުންގެ ފަރާތުން ހޫނު މަރުހަބާއެއް ދަންނަވާފައެވެ.
